Ko e Fakamatala Malolō Lahi ka Foaki
1. Lafi ke he lauga, ko e heigoa foki ka fiafia ki ai a lautolu ne o mai ke he Fakamanatuaga? Fakamaama.
1 A fe? He po he Fakamanatuaga. Kua lahi e gahua ne foaki ke uiina e tau tagata ke fakalataha mai mo tautolu. Nakai ni ko e tau mena ne logona he tau tagata ka fiafia a lautolu ki ai. He mole e Fakamanatuaga, taha e fifine ne talahau pauaki hagaao ke he tau mena haana ne kitia—ko e fekapitigaaki he tau tagata oti, fulufuluola mo e meā he fale ne kua talaga mo e leveki he tau tagata lagomatai. Ko e mena haia, ko tautolu oti nakai ni ko e tagata lauga hokoia ka fakalataha ke foaki e fakamatalaaga ke lata mo e fekau uho lahi mahaki nei he tau.—Efeso 4:16.
2. Maeke fēfē ia tautolu takitokotaha ke fakamatala ki a lautolu ne o mai?
2 Fakafeleveia Mafanatia ke he Tau Tagata O Mai: Ko e ha tautolu a mamali mafanatia mo e ui fakaalofa fiafia ke he tau tagata o mai ka foaki e fakamatala. (Ioane 13:35) Pete ni ka nakai maeke a koe ke tutala mo e tau tagata oti, maeke agaia ia koe ke feleveia mafanatia atu ki a lautolu kua tata ki a koe. (Hepe. 13:1, 2) Mataala ke he tau tagata o mai ne nakai iloa ha tagata. Ne liga moua e lautolu e uiina he magahala ne tufa ai. Liga hūhū pehē a koe, “Ko e hau fakamua kia anei haau?” Uiina a ia ke nofo mo koe, ti talia ke tali e tau hūhū haana kaeke kua fai. Kaeke kua mafiti e fakapotopotoaga haau ke o kehe ka e fakaatā taha fakapotopotoaga ke fakaaoga e kaina, liga pehē a koe: “Manako au ke iloa haau a manatu ke he fakaholoaga. Fai puhala nakai ke matutaki au mo koe?”
3. Fakafeleveia fēfē e tautolu a lautolu ne nakai gahuahua fakaagaaga?
3 Fakafeleveia ki a Lautolu ne Nakai Gahuahua Fakaagaaga: Nakai fakauaua, ko lautolu e tau tagata fakailoa ne kua nakai gahuahua fakaagaaga mogonei to fakalataha auloa mo lautolu ne fakakaupā e tau magaaho ke fakalataha lagataha he tau mo e fakapotopotoaga ke he Fakamanatuaga. Fakafeleveia atu ki a lautolu mo e fakailoa age e haau a fiafia mooli he kitia a lautolu. (Roma 15:7) To maeke e tau motua ke feleveia atu ke he tau kaina ha lautolu mo e fakamafana ke fakatumau ke feleveia auloa mo e fakapotopotoaga. Kua liogi a tautolu ko e tokologa kua fakalataha mai to omoomoi ke fakaheke e Atua, nakai ni ha ko e tau mena ne logona e lautolu ka e pihia foki ha ko e tau mena ne kitia e lautolu ‘ka kitekite a lautolu ke he tau gahua mitaki ha tautolu.’—1 Pete. 2:12.