Fakaaue ke he Fakaalofa-Totonu ha Iehova
Ke Fakamanatu e Mate he Keriso ia Mati 24
1. Fakakite fefe e Iehova e fakaalofa-totonu ki a tautolu?
1 Ne fakapuloa he salamo: ‘Kia fakaheke atu e tau tagata kia Iehova ha ko e hana fakaalofa-totonu, mo e hana tau mana kua eke ke he fanau he tau tagata.’ (Sala. 107:8) Ko e fakaalofa-totonu he Atua ne nakai ni ko e logonaaga fakaalofa hana ma e tau tagata. Kua maaliali e mena ia ke he talahauaga omoomoi he fakaheke: “Ti toto hake ai au he hāu a [fakaalofa-totonu], Iehova na e.” (Sala. 94:18) Ko e fakaalofa-totonu kehe ue atu ha ia ne fakatata e Iehova he foaki e Tama fuataha hana ke lata mo tautolu!—1 Ioa. 4:9, 10.
2. Maeke fefe ia tautolu ke fakakite e fakaaueaga ki a Iehova?
2 He gutu mai e Fakamanatuaga he mate ha Keriso, maeke fefe ia tautolu ke fakaaue ke he ‘Atua fakaalofa-totonu’? (Sala. 59:17) Manako oti a tautolu takitokotaha ke fai magaaho ke manamanatu fakahokulo ke he tau aho fakahiku ha Iesu he lalolagi. (Sala. 143:5) To aoga foki ke muitua e totouaga Tohi Tapu ne setulu pauaki ma e Fakamanatuaga, tuga ne tohi he Kumikumi e Tau Tohiaga Tapu he Tau Aho Takitaha—2005 mo e, ka maeke, taute e totouaga lafi ki luga mo e kumikumi ke he veveheaga 112-16 he tohi Tagata Mua Ue Atu fakalataha mo e falu tohi ne fakave ke he Tohi Tapu. Manamanatu fakahokulo ke he tau vala ne totou e koe, ti fakamahani ki ai. (1 Timo. 4:15) He fakaata e Kupu he Atua ke he liogi ne nakai ni fakamalolo e tau loto ha tautolu ka e fakakite foki e fakaalofa ha tautolu ma Iehova.—Mata. 22:37.
3, 4. (a) Maeke fefe ia tautolu ke fifitaki e agaga he tau matakainaga i Liperia? (e) Ko hai ne amaamanaki a koe ke uiina ke he Fakamanatuaga?
3 Fakalagalaga e Falu ke Fakaaue ke he Atua: He tau kua mole 16,760,607 ne fakalataha ke he Fakamanatuaga he lalolagi katoa. He maaga ko Liperia, ne tohi he tau matakainaga e tohi ke he takitaki he taone, he tala age ki a ia ke he amaamanakiaga ha lautolu ke fakamanatu e Kaiaga Afiafi he Iki he taone hana. Ne age he takitaki e fakaataaga ke he tau matakainaga ke fakaaoga e male pele lakapi ke lata mo e matafekau ti fakapuloa ai ke he taone ia, he uiina e tau tagata ke hohoko atu. Pete ni e tokolima e tagata fakailoa he maaga ia, kua 636 ne o atu ke he Fakamanatuaga!
4 Pihia foki, manako a tautolu ke lagomatai e tokologa ke maeke ke fakalataha auloa ke he Fakamanatuaga. Ko e ha he nakai tohi hifo a lautolu kua manako a koe ke uiina? Ko e tau fakataiaga i tua he Awake!, Mati 8 mo e Watchtower Mati 15 ne foaki foki e uiina. Maeke foki ke fakaaoga e tau uiina Fakamanatuaga. Lomi po ke tohi fakamitaki e magaaho mo e matakavi he Fakamanatuaga he laupepa, ti toka mo e tau tagata takitaha ne uiina e koe. He tata mai a Mati 24, ahi atu ke fakamanatu ki a lautolu takitokotaha mo e fakakatoatoa e tau fakatokaaga.
5. Maeke fefe ia tautolu ke fakamalolo e tau tagata fakaako Tohi Tapu ke o mai?
5 Maeke fefe a tautolu ke lagomatai e tau tagata fakaako Tohi Tapu kua nakai la o mai ke he tau feleveiaaga mo e aoga katoatoa mai he fakamanatuaga? Fakaaoga falu minuti gahoa he tau fakaakoaga takitaha ke ati hake e loto fakaaue ma e aoga he fakamanatuaga. Ko e tau vala tala mitaki lahi mahaki kua moua he Watchtower, Mati 15, 2004, lau 3-7, mo e tohi Reasoning, lau 266-9.
6. Ko e ha ne aoga ke feleveia mo e falu he Fakamanatuaga?
6 Feleveia mo Lautolu ka O Mai: He Fakamanatuaga, tutala mo e fakafeleveia ki a lautolu ka hohoko mai. (Roma 12:13) Fakatoka ke nonofo mo lautolu ne uiina e koe, ti mailoga kua fai Tohi Tapu mo e tohi lologo a lautolu. To manako moli a tautolu ke fakailoilo ke fakafeleveia fakamitaki e tau matakainaga kua leva e lolelole ne eketaha ke o mai. Ko e fiafia fakaalofa ha tautolu ka lagomatai a lautolu ke liu fakalataha tumau mai ke he fakapotopotoaga. (Luka 15:3-7) He magaaho tapu lahi nei, maeke ia tautolu ke taute e tau mena kua maeke ia tautolu ke fakamalolo e falu ke fakalataha mo tautolu he fakaaue ki a Iehova ma e hana a ‘fakaalofa-totonu homo ue atu.’—Sala. 31:21.