Puha Huhu

◼ Ko e heigoa e tuaga he tau mena tui mo e tauteuteaga kua lata ke mailoga e tautolu ka ahi atu ke he tau kaina Peteli mo e tau la matakavi?

Ka ahi atu a tautolu ke he Peteli, ke kitekite he fale po ke feleveia mo e tau tagata he magafaoa Peteli, “ko e tau mena tui, tauteuteaga mo e mahani ha tautolu kua lata ke tatai ke he mena kua amanaki ki a tautolu he o atu ke he tau feleveiaaga ma e tapuakiaga he Fale he Kautu.” (om 131) Pete ia, kua mailoga ki ai he magaaho ka ahi atu ke he tau ofisa he la, fa hihiga e tau matakainaga tane mo e fifine ke fakatehana e tau mena tui ha lautolu. Kua nakai lata tonu e mena ia ka ahi atu ke he tau fale pehenei. Nukua lata e tau tauteuteaga ha tautolu ke mitaki, gali, mo e maimaina, he fakakite e fakafifitaki, maopoopo mo e lilifu kua lautonu ke he tau fekafekau ha Iehova ko e Atua.​—1 Timo. 2:9, 10.

Kua aoga pauaki e mena nei ka ahi atu ke he tau kaina Peteli mo e tau fale he la ha kua futiaki e onoonoaga he tokologa he tau tagata mamata mai ne nakai ko e Tau Fakamoli. Ko lautolu e tau tagata mamata mai kua fakatu e tau manatu hagaao ke he tau tagata he Atua mo e fakatokatokaaga hana ne fakave ke he tau mena kua kitia e lautolu. Kua mitaki lahi ke tutala mo e tau tagata fakaako Tohi Tapu mo e falu ka liga ahi mai, ke fakamanatu ki a lautolu e aoga he matakite ke he tau mena tui mo e tauteuteaga kua maopoopo. To loto fakaaue e magafaoa Peteli he taute e koe e mena nei.

Ha ko e tau fekafekau Kerisiano, kua lata ia tautolu ke fakaeneene ke nakai fakatupu ha fakatupetupe. (2 Kori. 6:3, 4) Ka e, mai he maopoopo mitaki ha tautolu, kia tumau a tautolu ke “fakalilifu ai . . . e tau kupu he Atua, ha tautolu a Fakamoui ke he tau mena oti.”​—Tito 2:10.