Fakakite he Tauteuteaga Maopoopo e Fakalilifu ke he Atua
1. Fakakite fefe e tautolu e loto fakaaue ha tautolu ke he fonoaga he fahimotu hane hau?
1 To nakai leva ti moua e tautolu e lilifu ko e tau tagata kua uiina e Iehova ke he Fonoaga Fahimotu “Kia Fakaheke Atu ke he Atua” he 2003. Ko e fakaaue ha ia ha tautolu ki a Iehova he uiina a tautolu ke he galue monuina fakaagaga pihia! Maeke ia tautolu ke fakakite e fakalilifu ki a ia mo e tau loto fakaaue ha tautolu ma e hana tau foakiaga fakaagaga ke he tau tapulu mo e tau tauteuteaga ha tautolu.—Sala. 116:12, 17.
2. Ko e ha ne aoga ai ma tautolu ke mea mo e tauteute fakamaopoopo?
2 Mea mo e Maopoopo: Ko e tauteuteaga tino ha tautolu kua lata ke fakaata e tau tutuaga he Atua ha tautolu, nukua mea mo e maopoopo. (1 Kori. 14:33; 2 Kori. 7:1) Ko e ha tautolu a tau tino, tau ulu, mo e tau mahina matalima kua lata ke mea, mo e lata ia tautolu ke tauteute fakamaopoopo. Mahani mau e tau tauteuteaga fulufagu he vaha nei. Ka e, pete he fulufagu e tauteuteaga he tagata talahaua he taute kifaga po ke tau toa sipote kua nakai fai kakano e Kerisiano ke tauteute pihia. Ka muitua a tautolu ke he tau fasone, to uka e tau tagata ke kitia e kehekehe ha lautolu ne fekafekau ke he Atua moli mo lautolu ne nakai fekafekau ki a ia.—Mala. 3:18.
3. Puhala fe ke iloa moli e tautolu to felauaki e tau tauteuteaga tino ha tautolu mo e tomatomaaga ia 1 Timoteo 2:9, 10?
3 Tauteuteaga kua Lata ma e Tau Fekafekau Kerisiano: Magaaho ne tohi he aposetolo ko Paulo ke he leveki Kerisiano ko Timoteo, ne fakamalolo e ia “e tau fifine, kia taute e lautolu a lautolu ke he tau tapulu kua gali, mo e maimaina mo e mahani fakalatalata, . . . kia taute a lautolu ke he tau gahua mitaki, (ko e mena haia kua lata mo e tau fifine kua talahaua e lautolu a lautolu kua mahani Atua.)” (1 Timo. 2:9, 10) Ke iloa moli kua gali e tau tauteuteaga ha tautolu kua lata ni ke manamanatu fakamitaki. Kua lata e tau mena tui ke maopoopo, mea, mo e gali—nakai fia kitia, kalahi, po ke fakaohooho.—1 Pete. 3:3.
4, 5. Ko e heigoa e tau hatakiaga kua lata e tau tagata tane mo e tau fifine Kerisiano ke muitua?
4 Ne hataki foki e Paulo ke he molea e “taute mo e lauulu fili, po ke auro, po ke tau penina, po ke tapulu fakafua lahi.” (1 Timo. 2:9) Ko e fakaaoga lagotatai he tau koloa fakamanaia tino, tau koloa valivali mata, mo e falu fakamanaia ko e puhala iloilo haia ma e tau fifine Kerisiano ke muitua ki ai.—Fakatai 11:2.
5 Ko e hatakiaga ne talahau e Paulo ke he tau fifine Kerisiano kua lauia foki e tau tagata tane Kerisiano. Lata e tau matakainaga tane ke kalo mai he tau vahega mena tui ne fakaata e manamanatu he lalolagi. (1 Ioane 2:16) Ma e fakatai, ke he falu motu kua mahuiga e tau mena tui gafugafu mo e lalahi, ka e ko e tau vahega mena tui pehenei kua nakai fakakite e tauteuteaga kua felauaki mo e fekafekau he Atua.
6. Ko e ha kua lata ke fakatumau e tuaga tokoluga he tau tapulu mo e tau tauteuteaga ha tautolu ka o atu mo e o mai he fonoaga, haia ke he fonoaga, mo e ka hili e fakaholoaga he tau aho takitaha?
6 He Taute ha Feua he Tau Magaaho Okioki: Ka o atu ke he fakaholoaga, laulahi he tau matakainaga tane mo e fifine kua fakatoka e fakafifitakiaga mitaki lahi ke he tau tapulu mo e puhala tauteute. Pete ia, kua kitia ke he tau hokotaki e fakateaga he falu ka o atu mo e o mai he fonoaga po ke ka taute ha feua he tau magaaho okioki ka hili e fakaholoaga he aho. Moli, ko e ha tautolu a tau foliga fakatagata—he fonoaga po ke falu magaaho foki—kua fakaohooho e puhala ne onoono e falu ke he tau tagata he Atua. Ha kua tau e tautolu e tau pine fakamailoga he fonoaga, kua lata ia tautolu ke tauteute ke he puhala kua felauaki mo e tau fekafekau Kerisiano. Kua fakalagalaga he mena nei e falu ke tokutoku mitaki ki a tautolu mo e hafagi e puhala ke fakamatala.—1 Kori. 10:31-33.
7. Ko e heigoa e lauiaaga ke he falu ha ko e tau tapulu mo e tauteuteaga maopoopo ha tautolu?
7 Ke tuga ni he fakamahomo atu he mamali totonu e mitaki he tau fofoga ha tautolu, ti ko e tau tapulu mo e tau tauteuteaga maopoopo ka fakatokoluga e fekau ne hahamo e tautolu mo e fakatokatokaaga ne hukui e tautolu. Ko e falu ka kitekite ki a tautolu he magaaho ka fakahoko ai e tau Fonoaga he Fahimotu “Fakaheke Atu ke he Atua” he tau nei to liga fakaohooho ke huhu e kakano ne kehe ai a tautolu mo e liga hiku ke talahau: “To o a tautolu mo mutolu; ha kua logona [mo e kitia] e mautolu ha ha ia mutolu e Atua.” (Saka. 8:23) Kia igatia a tautolu mo e fakakite e fakalilifu ha tautolu ki a Iehova ke he tau tapulu mo e tauteuteaga ha tautolu.
[Puha he lau 5]
Foaki e Foliga Fakalilifu
▪ Ka o fenoga
▪ Haia ke he fonoaga
▪ He taute ha feua he tau magaaho okioki