Tapulu mo e Tauteuteaga kua Gali
1 “Ko e tau tane oti, pihia mo e tau fanau tane ikiiki, kua tau heketi. Ko e tau fifine mo e tau tama fifine, lautolu ne fuata mui mo lautolu ne ikiiki, ne tui tapulu po ke patutiti. Ne nakai kitia ha fihui paku po ke ha kola fakamamaga. Ko lautolu oti hinei kua fulufuluola lahi.” Pihia he hokotaki he tagata tohi tala. Ko e tutala ke he vahega toloaga fe? Ko e toloaga politika? Ko e taha feua sipote? Ko e konesete roko? Mamao ligo! Kua tutala hagaao ke he matakau he tau matakainaga ke he toloaga lahi he fonoaga fahimotu he tau kua mole.
2 He taha taone ne fono ai foki, ne pehe e talahauaga he tagata tohi tala ma e nusipepa hagaao ke he toloaga he Tau Fakamoli: “Mea e tau tagata tane oti mo e tui peleue mo e heketi. Ko e tau fifine kua gali e tau tauteuteaga ka e fulufuluola.” Ko e tagata kitekite ke uaaki, ko e tagata leveki ne pehe: “Ko mutolu ko e tau tagata kua to lahi e mahani mitaki, fakalilifu, mea, mo e maopoopo. Ko e tau mena ne kitia e au kua fulufuluola. He lalolagi kiva nai, kua maeke ia mutolu ke tatafi kehe e kiva!” Ko e tau talahauaga mitaki ha ia ma tautolu! Kua nakai kia fakaaue a tautolu ha kua talahau fakatokoluga pihia ke he ha tautolu a tau matakainaga. Moli, ko lautolu oti he toloaga kua kau auloa ke he tau hokotaki mitaki ha ko e ha lautolu a tau fakafifitakiaga ke he tau tauteuteaga.
3 Kua iloa mitaki ke he lalolagi katoa e kehe ha tautolu ha ko e tau tauteuteaga. (Mala. 3:18) Ko e ha? Ha kua mumuitua a tautolu ke he tomatomaaga faka-Tohiaga Tapu ke ‘taute a tautolu ke he tau tapulu kua gali, mo e maimaina kua lata mo tautolu kua mahani Atua.’—1 Timo. 2:9, 10.
4 Ko e Heigoa kua Fakakite e Koe ke he Tapulu mo e Tauteuteaga Hau? Ko e tau mena tui ne tui e tautolu mo e puhala ne tui aki e tautolu kua taute e talahauaga ki a tautolu—ha tautolu a tau taofiaga, aga, mo e tau amaamanakiaga. Ko e tau vahega mena tui ka fifili e tautolu to talahau ko hai a tautolu mo e fakakite ko hai ne hukui e tautolu. Kua nakai lata a tautolu ke fakahakehake e tau manamanatu fakateaga mo e tau aga talahaua he lalolagi. Nakai kapaletu a tautolu ko e vahega mena tui fe ne mua atu e fasone ka e ki a felauaki mo e taha kua totoku ko e fekafekau he Atua. (Roma 12:2) He nakai fifili e tauteuteaga ne fakakite e agaga tutokotaha po ke fakakite e puhala moui mahani kelea, kua manako a tautolu ke fakakite moli a tautolu kua ‘fakaheke ke he Atua.’—1 Pete. 2:12.
5 Ke he tau magaaho, ko e taha ne fou, temotemoai e iloaaga, po ke lolelole fakaagaga ka liga talia fakahanoa e tau tapulu mo e tau tauteuteaga kua fakatata he lalolagi ka e nakai manamanatu fakamua ko e fakaata fefe he mena ia a Iehova mo e hana a fakatokatokaaga. Lata a tautolu oti ke kumikumi fakamakutu ni e tagata ki a ia ke kitia kua fakaohooho kia he tau manamanatuaga he lalolagi a tautolu. Kua maeke ia tautolu ke o atu ke he tau matakainaga lilifu mo e motua fakaagaga mo e ole ke talahau fakamoli mai hagaao ke he ha tautolu a vahega mena tui mo e tauteuteaga ti onoono fakahokulo ke he manatu ka foaki atu.
6 Ko e falu kua talia fiafia kua lata moli ia lautolu ke fakaeneene ke he tau puhala tauteute ha lautolu he o atu ke he fonoaga. Ka kua fakatokolalo e lautolu e tuaga tauteute ha lautolu ka taute ha feua he tau magaaho okioki ka hili e fonoaga. Fakatumau ke he tuaga tokoluga kua felauaki mo e tau fekafekau Kerisiano. (2 Kori. 6:3, 4) Ke he ha matakavi ni ka o a tautolu ki ai, ko e tau pine fakamailoga ha tautolu ne tau he o atu ke he fonoaga pihia mo e tau tapulu mo e tau tauteuteaga kua gali ha tautolu ka fakakite a tautolu ko e Tau Fakamoli a Iehova. Ko e mena ia, ko e tau mena tui ha tautolu kua lata ke maopoopo mo e gali tumau, kua fakakite ko tautolu kua ‘nakai ko e vala he lalolagi.’—Ioane 15:19.
7 Kia taute e tautolu e tau mena kua fahia a tautolu ki ai he Fonoaga Fahimotu “Tau Tagata Fakapuloa Fakamakai he Kautu” he tau nei ke fakakite moli ko tautolu ko e “motu tapu kia Iehova ha [tautolu] a Atua.” Ko e talahauaga mitaki ka puna mai i ai ka lafi ke he “fakahekeaga, mo e talahaua, mo e fulufuluola” ha Iehova.—Teu. 26:19.
[Puha he lau 4]
Puhala ke Fakaheke a Iehova:
■ Tauteute ke he puhala kua felauaki mo e fekafekau he Atua.
■ Kalo kehe mai he tau vahega mena tui kua muitua ke he agaga he lalolagi.
■ Fakatata e gali, nukua fakaata e mahani fakalatalata.