Tauteuteaga Fakatagata kua Mea mo e Lilifu
1. He fakatokatoka ma e fonoaga he fahimotu, ko e ha kua lata ia tautolu ke manamanatu ke he tauteuteaga ha tautolu?
1 “Kua mitaki lahi e Tau Fakamoli a Iehova! Ko e tau tagata ha mutolu kua totonu mo e tauteute mitaki, ti lahi e fakalilifu ha lautolu.” Pihia he talahau he hukui he hotela hagaao ke he tau matakainaga he taha fonoaga he fahimotu he tau kua mole. He taha fonoaga foki, ne talahau he tagata gahua he hotela: “Kua kitia moli ko e tau tagata ha mutolu kua tauteute ma e Atua.” E, ko e tau tagata o fonoaga kua kitia he falu. Ati manako a tautolu ke tauteute ‘kia lata e tau mahani mo e vagahau mitaki,’ ti fa omoomoi e tau tagata i tua ke nava ki a tautolu mo e kitia maaliali ai ko tautolu ko e tau fekafekau he Atua. (Filipi 1:27) He fakatokatoka a tautolu ma e fonoaga he fahimotu, kua hagahaga mitaki ke manamanatu tuai ke he tauteuteaga ha tautolu.
2. Ko e ha ko e paleko ke tapulu mo e tauteute fakamea e tagata?
2 “Ko e iloilo mai luga, kua fakamua hana a mea,” he tohia he tutaki ko Iakopo. (Iako. 3:17) Kua eke mo paleko ke fakaata e tauteuteaga mea ha tautolu. Ko e lalolagi kelea ha Satani kua fakaohooho e tau tagata ke talia e tau tauteuteaga nakai gali, fakataki, mo e kehe ne nakai felauaki. (1 Ioa. 2:15-17) Ko e mena ia, ka taute e tau fifiliaga ke he tau tapulu mo e tauteuteaga, kua lata ia tautolu ke omaoma ke he tomatomaaga he Tohi Tapu ke ‘tiaki e tautolu e tau mahani hepehepe, katoa mo e tau manako lahi he lalolagi, ka kia nonofo fakalatalata a tautolu mo e tututonu ke he mouiaga nai.’ (Tito 2:12) Kua nakai manako a tautolu ke fakatupetupe e falu ha ko e tau tauteute ha tautolu, pete ko e tau matakainaga ha tautolu, tau tagata gahua he hotela mo e tau fale kai, po ke falu tagata kitekite.—1 Kori. 10:32, 33.
3. Ko e heigoa e tau huhu ka lagomatai a tautolu ke onoono ke he tau tauteuteaga fakatagata ha tautolu?
3 Tapulu kua Gali mo e Fakalatalata: Ka fakatokatoka ma e fonoaga, huhu ki a koe ni: ‘Kua gali nakai e tau mena tui haku, po ke kua taute ke onoono mai e tau tagata ki a au? Kua lilifu nakai ke he logonaaga he falu? Kua tokolalo lahi kia e mataao he tau matapatu tapulu haku po ke ku lahi? Kua aleale kia e tau tapulu haku po ke makoto? Mea nakai mo e manogi e tau tapulu haku? Ka fano ke tamai e kai pogipogi mai noa he hotela po ke he okioki ka hili e fakaholoaga, to mea nakai e tauteuteaga haku ke tuga e fekafekau he Atua, po ke fulufagu, fasone lahi, fakateaga lahi, mo e nakai felauaki ko e tagata fano he fonoaga ne tau e pine fakamailoga? To fakama kia he tau tapulu haku ne tui a au ke nakai fakamatala he magaaho noa?’—Roma 15:2, 3; 1 Timo. 2:9.
4. Maeke fefe falu ke lagomatai a tautolu ke mea e tauteuteaga?
4 Maeke ia tautolu ke aoga mai he tau lagomatai he tau Kerisiano kua motua. Ko e tau hoana kua lata ke huhu ke he tau tane ha lautolu to liga fefe e kitiaaga mai he falu ke he tau mena tui ha lautolu. Ko e tau matua mahani Atua ka lagomatai e tau tama fuata mui ha lautolu ke he mena nei. Mua atu, ko e tau matakainaga fifine motua kua maeke ke ‘fakaako a lautolu ke he tau tamāfine kia mahani fakalatalata’ ke he tau tauteuteaga ha lautolu “neke eke fakakelea e kupu he Atua.” (Tito 2:3-5) Kua foaki mai he tau tohi ha tautolu e tau fakataiaga lagomatai ke he tapulu kua gali mo e lilifu.
5. Maeke fefe ia tautolu oti ke fakaheke a Iehova he magaaho he fonoaga?
5 Tamai e Fakaheke ki a Iehova: Kua tamai he fonoaga he fahimotu e magaaho mitaki lahi ma tautolu oti, nakai ko e tau tagata kua o atu ni ki ai, ke fakaheke a Iehova. Moli, ko e tau mahani faka-Kerisiano mo e tau kupu vagahau ha tautolu ka fakaheke a ia. Ka e ko e mena fakamua ka kitia he tau tagata onoono ko e tapulu mo e tauteuteaga ha tautolu. Kia tamai e tautolu oti e fakaheke ki a Iehova he mea mo e lilifu ha tautolu a tau tauteuteaga.—Sala. 148:12, 13.
[Puha he lau 6]
Tau Lagomatai ke Lilifu e Tauteuteaga
◼ Kupu he Atua
◼ Onoono hifo ke he tagata ni
◼ Kitiaaga he falu
◼ Tau tohi faka-Kerisiano