Ko e Aahi Ka Eke mo Monuinaaga
1 Kua fiafia lahi a Sakaio he aahi atu a Iesu ke he hana loto kaina. Mo e kua monuina ha e aahi ia!—Luka 19:2-9.
2 He vaha nei, ko e Ulu he fakapotopotoaga, ne poaki e Iesu Keriso e tau motua ke ‘leveki e fuifui mamoe he Atua.’ (1 Pete. 5:2, 3; Ioa 21:15-17) Ke lafi atu ke he fakaakoaga he tau feleveiaaga mo e takitaki ke he fekafekau he fonua, ne foaki he tau leveki he fakapotopotoaga e laveaki fakaalofa mo e fakatagata ki a lautolu takitokotaha he fakapotopotoaga. Ti he falu a magaaho, liga fiafia a koe ke moua e aahi fakatagata mai he tau motua, he loto kaina hau, he Fale he Kautu, ka fakatauo he fekafekau he fonua, po ke he falu a magaaho. Kua hopoate kia a koe ha ko e aahi he motua? Nakai pihia. Kua nakai o atu a lautolu ha kua hehe a koe ke he taha puhala. Ti, ko e heigoa e kakano he aahi leveki ia?
3 Ne talahau e Paulo kua manako a ia ke aahi e tau matakainaga “po ke fefe a lautolu.” (Gahua 15:36) E, ko e tau leveki fakaalofa, kua tokaga lahi e tau motua po ke fefe a koe. Manako a lautolu ke foaki e laveaki fakaagaga ka lagomatai mo e ati hake ki a koe. Kua manako ha tautolu a Leveki Mamoe ko Iehova ke igatia a tautolu ke moua e levekiaga fakatagata pihia.—Eseki. 34:11.
4 Fakafeleveia Fakamitaki e Tau Aahi he Tau Motua: Ne aahi e Paulo e tau matakainaga hana ke ‘ta atu kia lautolu taha mena fakaalofa ke lata mo e Agaga ke fakatumau ai a lautolu, kia fefakamafanaaki.’ (Roma 1:11, 12) Kua lata ia tautolu oti ke moua e fakamaloloaga fakaagaga he tau aho fakahiku uka nei, mo e manako lagomatai a tautolu ke fakatumau ke mauokafua he tua. Ko e hau a kitiaaga mitaki ke he aahi leveki ka fua mai moli e fefakamafanaaki kua lata.
5 Kia fakaaue lahi ke he tau aoga loga ka moua mai he tau gahua leveki he tau motua. Kaeke ke fai lekua po ke ha huhu ne kua kapeletu a koe ki ai, kia manatu ko e haia e tau motua he fakapotopotoaga ke lagomatai. Aua neke fakauaua ke tala age ki a lautolu ha lekua hagaao ke he levekiaga fakaagaga hau. Kia fakaaue lahi ke he fakaholoaga nei mai ia Iehova, mo e olioli ke he tau monuina ne moua ha ko e aahi ia.