Ko e Mitaki Ha Ia ke Fakalataha Tumau!
1 Ma e tau tau loga he Fahi Uta a Europa, tokologa e tau matakainaga fakahele ha tautolu ne pa mai he feleveia fakalataha. Manamanatu la ke he olioli ha lautolu he magaaho ne lagaki e tau paaga mo e tokanoaaga ha lautolu ke feleveia auloa!
2 Hagaao ke he ahi atu hana ke he taha fakapotopotoaga pihia, ne tohi he fekafekau leveki he takaiaga: “He afiafi Ua, ke he kamataaga he ahi atu haku, ne malona e tokaaga fakavela. I fafo, ko e fuafuaaga ne tumau ke makalili lahi, mo e i fale, ne kavi ni ke 32 e tokoluga he Fahrenheit. Ne tui he tau matakainaga e tau peleue, tau fakapeka, tau afi lima, tau kepe mo e tau puusi ha lautolu i loto. Nakai fai tagata ne hafagi e Tohi Tapu, ha kua nakai maeke ke fuke e tau lau. He tu he tulana mo e tui e suti, ne mao niniva au, mo e tau magaaho oti ne vagahau au, ne ahua e gutu haku. Ka e ko e mena ne nava ai au ha kua nakai logona e au ha kupu taha he gugu. Ne talahau e tau matakainaga oti ko e fulufuluola ha ia mo e mitaki ke fakalataha!” Nakai manamanatu foki e tau matakainaga ia ke fakato e feleveiaaga ia!
3 Pihia Nakai e Logonaaga ha Tautolu? Kuku mau nakai e tautolu e magaaho ke fakapotopoto fiafia he tau feleveiaaga fakafahi tapu ha tautolu? Po ke fakateaga a tautolu ke he tau feleveiaaga ka fai tuaga kua mahomo atu? Ko e fakalataha tumau ke he tau feleveiaaga liga nakai ko e mena mukamuka, ti he falu magaaho nakai fai kakano hako a tautolu he nakai fakalataha atu ai. Nakai nimo, mogoia, ko e mena ha ha ai a lautolu mo tautolu kua momotua, tau tino gagao lahi, tau tino nakai katoatoa, mamafa e tau fakaholoaga gahua, mo e falu matagahua lalahi kua kitia e aoga lahi he tau feleveiaaga mo e kua teitei tumau ni ke fakalataha. Ko e tau fakafifitakiaga mitaki ha ia ma tautolu ke mumuitua ki ai!—Fakatatai Luka 2:37.
4 Kia eke e tautolu mo aga fa mahani ha tautolu ke lagomatai e tapuakiaga moli he fakalataha tumau ke he tau feleveiaaga Kerisiano ha tautolu, mai he matakau fakaako tohi tote ke he fonoaga lalahi. Ko e ha kua lata ia tautolu ke uta fakahokulo e fakalataha ke he tau feleveiaaga nei? Ha ko e fakamafanaaga faka-Atua a ia ke fakalataha auloa a tautolu. Ka e fai kakano aoga foki. Kua lata oti a tautolu ke aoga mai he fakaakoaga faka-Atua mo e he lagomatai he agaga tapu, ne kua moua mai he tau feleveiaaga. (Mata. 18:20) Kua ati hake a tautolu ha ko e fefakamaloloaki he fakalatahaaga mo e tau matakainaga ha tautolu.—Hepe. 10:24, 25.
5 Ke he fakafaliuaga, ne pehe a Peteru, “Ko e Iki na e, mitaki he nonofo a tautolu i hinai.” (Luka 9:33) Kia pihia foki e logonaaga ha tautolu ke he tau feleveiaaga Kerisiano ha tautolu. Moli, kua mitaki ha ia ke fakalataha tumau!