Fakamatala ke he “Tau Tagata Oti Kana”
1 Ka feleveia a tautolu mo e tau tagata kehekehe e tau aga fakamotu po ke tau feakiaga fakalotu, kua manatu e tautolu e finagalo a Iehova ke “fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:4) He lafi ke he numera he tau tuleke mo e tau porosua kua tauteute pauaki, ua e tohi mitaki lahi ha tautolu ka fakaaoga ke he ha magaaho ke lagomatai e tau tagata takitaha ne nakai fakaako ai he lotu ha lautolu a lautolu ke he kupu moli hagaao ke he Atua mo e Keriso.
2 Ko e tohi Mankind’s Search for God kua foaki mai e maama ke he kamataaga he tau lotu lalahi he lalolagi mo e ko e mena ia kua lagomatai ke he tau tagata oti ke taute e tau fakatataiaga he tau taofiaga ha lautolu ke he mena kua fakaako mai he Tohi Tapu hagaao ke he Atua moli tokotaha. He taha fahi, he fakamaama e moui a Iesu Keriso, kua maeke he tohi The Greatest Man Who Ever Lived ke lagomatai e tagata ke mahani lahi mo e Tama he Atua mo e fakatata atu ki a ia, tuga e tau tagata tokologa he senetenari fakamua. (Ioane 12:32) Ka lata ai, kua liga manako a koe ke fakaaoga e tau lagomataiaga nai he fakakite e tau tohi nei.
3 Ka manatu a koe kua lata ke foaki e tohi “Greatest Man” ke he taha, liga huhu a koe:
◼ “Ko e heigoa ne iloa e koe ka manamanatu a koe ki a Iesu Keriso? [Fakaata ma e tali.] Tokologa e tau tagata fakamau tala tuai kua fakakite a Iesu ko e tagata kua mua atu ne kua leva e moui. [Fatiaki e fakataiaga mai he fakafeleveiaaga he tohi Greatest Man.] Kua fakakite he Tohi Tapu e moui a Iesu ko e fakafifitakiaga ma tautolu ke mumuitua.” Totou 1 Peteru 2:21 mo e paratafa fakamua he lau fakahiku he fakafeleveiaaga he tohi Greatest Man. Ka fiafia e tagata he kaina he fakaako hagaao ki a Iesu, ti foaki e tohi. Ato fano a koe, totou Ioane 17:3 mo e huhu, “Uta fefe e koe e iloilo nei kua takitaki ke he moui tukulagi?” Taute e tau fakatokatokaaga ke liu atu mo e tali.
4 Ka liu a koe ke fakamaama e puhala ke uta e iloilo foaki moui, liga pehe a koe:
◼ “Ne mavehe au ke liu mai ke fakakite ki a koe e puhala kua maeke ia tautolu ke uta e iloilo kua takitaki ke he moui tukulagi.” He fakakite e tohi Iloilo, mo e fakaaoga e veveheaga fakamua, fakatata e fakaakoaga.
5 Ka manako a koe ke foaki e tohi “Mankind’s Search for God,” liga huhu a koe:
◼ “Ha ko e loga he tau lotu kehekehe he vaha nei, kua fa manamanatu nakai a koe ke he puhala ke fifili ha fe e lotu kua talia he Atua?” He mole e tali, hafagi e tohi Mankind’s Search for God ke he lau 377. Fakamaama e manatu numera 7, ti huhu ke he tagata he kaina kaeke ke talia a ia kua lata e lotu moli ke fakalataha e tau lanu tagata oti kana. Kikite ke he taha kupu tohi ne tu ai, ti ka fai magaaho, fakatutala falu manatu he tohi. Ka fakakite e fiafia moli, ti foaki e tohi. Ka to fano, liga ke huhu a koe, “Maeke fefe e lotu moli ke lauia e mahani he tagata?” Fakatoka ma e liu ahi atu ke tali e huhu ia.
6 Ka liu a koe ke fakamaama e puhala he lotu moli ka lauia e moui he tagata, liga ke huhu a koe:
◼ “Kua lata fefe e lotu he manatu e koe ke lauia e mahani he tagata? [Fakaata ma e tali.] Kua foaki mai e Keriso e tuaga ke lata he lotu ke fakatokoluga.” Totou Mataio 7:17-20 mai he lau 12 he tohi Mankind’s Search for God. Ti uiina e tagata he kaina ke totou e paratafa 20 he lau 13-14. Ka fai magaaho, fakatutala e paratafa 25-9 he lau 16-18. Liga to takitaki e mena nei ke he fakaakoaga he porosua Manako po ke tohi Iloilo.
7 Tau Puhala Kamata Fakatutala: Ha ha i ai loga e tau lagomataiaga fakaako he tohi Mankind’s Search for God kua maeke ke fakaaoga mo kamata aki e fakatutalaaga ke he aahi atu fakamua po ke liu ahi atu. Maeke ia koe ke kamata e fakatutalaaga he huhu e huhu kua lata. Ma e fakatai, mailoga e tau huhu mo e tau mataulu mo e tau lau nei ne kua fakamataulu ki ai:
“Tau Huhu kua Lata mo e Tali”—lau 17-18.
“Ko e Tala Fakalata Kia a Iesu?”—lau 237.
“Ko Hai ne Tohi e Tohi Tapu?”—lau 241.
“Ko e Qur’ān mo e Tohi Tapu”—lau 285.
“Fakamoliaga ke he Moli he Tohi Tapu”—lau 340-1.
“Talitonuaga he Tau Fakamoli a Iehova”—lau 356-7.
“Kitia Fefe e Lotu Moli”—lau 377.
8 Maeke ia koe ke fuluhi ke he (tau) lau pauaki he tohi Mankind’s Search for God mo e fakamaama e manatu ne kua fakatutala. Ti fakatoka e liu ahi atu he huhu e huhu ke tali ka liu atu mo e porosua Manako po ke tohi Iloilo. Kia tokaloto ke uiina e tagata he kaina ke he Feleveiaaga he Tau Tagata mo e toka e laupepa fakailoa. Fakaata ke he tau tagata takitaha ke foaki mena fakaalofa ke he gahua ha tautolu, liga he talahau, “Ko e falu kua manako ke foaki e mena fakaalofa tote ke he gahua he Sosaiete.”
9 Ko e tau tagata oti kua loto fakamoli kua kumi ma e kupu moli hagaao ke he Atua mo e Keriso. Kua maeke ia tautolu ke lagomatai a lautolu he gahua fakamatala ha tautolu. Ti, ko e mena ia, kia “gahua ai a tautolu, mo e fakakelea ai a tautolu, ha kua amaamanaki tuai a tautolu ke he Atua moui, ko ia ko e Fakamoui he tau tagata oti.”—1 Timo. 4:10.