Gahua Fakalataha Fefe e Tau Tagata he Magafaoa—Ke he Tau Feleveiaaga he Fakapotopotoaga
1 Kua lata e tau magafaoa Kerisiano ke omaoma e poakiaga ke fakapotopoto auloa ke he tau feleveiaaga he fakapotopotoaga. (Hepe. 10:24, 25) Mo e kaufakalataha mitaki, to kautu oti he mautauteute, he fakalataha, mo e tali he tau feleveiaaga. Kehekehe e tau tutuaga he magafaoa, ka e ha ha i ai e tau mena kua lata ke taute he tane Kerisiano, hoana talitonu, po ke matua tokotaha ke fakatolomaki e fakalatahaaga he magafaoa ke he tau mena fakaagaga, pete ni ko e tokofiha e fanau he kaina mo e kehekehe e tau tau momoui ha lautolu.—Fakatai 1:8.
2 Fakalahi e Magaaho ke Tauteute: Kaufakalataha e tau tagata he magafaoa ke kitia kua igatia mo e tauteute fakamitaki ma e tau feleveiaaga he fakapotopotoaga. Tokologa kua tauteute auloa e vala tala ma e Fakaakoaga Kolo Toko he fahitapu. Falu kua tauteute ma e Fakaakoaga Tohi he Fakapotopotoaga po ke totou fakamagafaoa e Tohi Tapu fakafahitapu. Ko e foliaga ke tokaloto e tau alito manatu ato o atu he tau feleveiaaga. He puhala ia, to aoga oti a lautolu mai he mena kua logona ti to mautauteute ke tali ka maeke ai.—1 Timo. 4:15.
3 Pulega ke Tali: Igatia e magafaoa mo e foliaga he fakapuloa hana amaamanakiaga ke he falu he tali he tau feleveiaaga. (Hepe. 10:23) Kua manako lagomatai kia e tagata he magafaoa po ke fakamaloloaga ke taute e mena nei? Ko e heigoa e lagomataiaga kua lata he tau tagata takitaha mo e tauteute e tau kotofaaga ma e Aoga Fekafekau Fakateokarasi? Kua fakaaue e tau hoana ka fakalotomatala e tau tane ha lautolu mo e liga foaki taha fakataiaga kua latatonu po ke fakatokaaga kua aoga. Nakai lata ke logona he tau mamatua kua lata ia lautolu ke tauteute e tau vala ma e tau fanau ikiiki ha lautolu. He taute pihia ka fakatauhele aki e manamanatuaga he tau tama. Ka e lagomatai he tau mamatua e tau fanau ikiiki ha lautolu mo e fanogonogo ki a lautolu he totou fakaleo lahi.—Efe 6:4.
4 Fakatoka ke O Atu: Fakaako e tau fanau mai he ikiiki ke tauteute mo e mautali ke o tuai he feleveiaaga he magaaho kua kotofa. Kua lata e tau tagata he magafaoa ke fakalataha he leveki e tau gahua he kaina ke nakai mule.—Kikite e tau manatu he tohi Fiafia he Magafaoa, lau 112, mo e Young People Ask, lau 316-17.
5 Ko e tau mamatua mo e tau fanau kua maeke ke manamanatu ke he tau kupu ha Iosua i tuai, ne pehe: “Ko au mo e haku a magafaoa, to fekafekau a mautolu kia Iehova.” Ti fakamakai ke auloa he fakalataha katoatoa ke he tau feleveiaaga he fakapotopotoaga.—Iosua 24:15.