Aoga e tau Feleveiaaga mo e tau Tagata Fuata
1 Kua talahau e tama afine: “Falu magaaho ne manatu au kua uka lahi e moui he tau tagata fuata. Kua agaagai a mautolu mo e tau tagata ne mahani feuaki, ne fakaaoga e tau tulaki, mo e inu kava.” Manatu kia a koe pihia? Ka pihia, ti heigoa kua lata ia koe ke taute ke lagomatai a koe ke totoko atu ke he tau lauiaaga kelea nai? Lata ia koe ke tua, ke tua mauokafua ke he tonuaga he tau puhala a Iehova, he kaeke noa mo e mena ia to “nakai maeke ke fakafiafia kia ia.” (Hepe. 11:6) He o atu ke he tau fakapotopotoaga, kia lagomatai ai a koe ke fakamalolo e tua faka-Kerisiano hau mo e fifiliaga ke kalo kehe mai he tau mena kelea.
2 Loga e tau mena ne Foaki Atu Ki a Koe he tau Feleveiaaga: Ko e heigoa ne fakafiafia ai e kaiagamena mo e tau kapitiga? Nakai kia ko e kai he tau mena lolo fakalataha mo e tau kapitiga hofihofi? Ko e tau feleveiaaga foki ha tautolu ne foaki pihia e fiafia, ka e he puhala fakaagaga.
3 Ko e tau mena ne ati hake kua fakatutala he tau feleveiaaga, mai he tau mena ne lauia e moui he tau aho takitaha ke he tau fakaakoaga fulufuluola he tau perofetaaga he Tohi Tapu. Ko e tau fakaakoaga aoga ne fakakite ka fakaako ke fakahaohao fakamitaki e moui hau mo e fakafehagai mo e tau paleko ka fakaalaia e puhala hau. Ko e tau matakainaga ne ha ha i ai he tau feleveiaaga kua mua atu e mitaki he ha mena foki, mo e fulufuluola e matagi fakaagaga mo e hao mitaki. (Sala. 133:1) Naia kua pehe e taha fuata: “Ne fano au he aho loa ke he aoga, ka e fakalolelole lahi a au. Ka e ko e tau feleveiaaga kua tuga e huaga talumelie he tutakale, ne fakafou aki au ke liu atu he aho hake ke he aoga.” Taha foki ne pehe: “Kua kitia e au ka fakalataha fakatata mo e falu ne fakaalofa ki a Iehova kua lagomatai au ke fakatata tumau ki a ia.”
4 He hu he Aoga Fekafekau Fakateokarasi, to fakaako a koe ke fakaputuputu e tau iloaaga he Tohi Tapu, ti taute fakapapahi e lauga, mo e fakatutala fakamahifi ki mua ia lautolu ne fanogonogo he Fale he Kautu. Manamanatu la e aoga ha kua fakamahani ke fakaako e kupu moli ne fakamoui fakamakutu mai he Kupu he Atua! To moua mai fe foki he tau tagata fuata e fakaakoaga uhoaki pihia?
5 Puhala ke Moua e Aoga Lahi he tau Feleveiaaga: Ke moua e aoga lahi mai he tau feleveiaaga, kua putoia ai ke tolu e mena ne mua ue atu. Ko e tau mena nei ko e tauteuteaga, ke tali hake, mo e fakaaoga.
6 Tauteute Tuai ma Lautolu: Fakatoka pauaki tumau e magaaho ke tauteute tuai ma e tau feleveiaaga. Aua neke fakata ha matagahua he aoga, e gahua magaaho, po ke tau hakahakau fakafiafia ke kaiha e magaaho hau ne lata ke fakaaoga fakamua ke he tau mena ka fakatutala he tau feleveiaaga takitaha. Kua aoga lahi ke fakatoka fakamitaki e fakaholoaga. Fakamua mo e mua atu, kia fakatumau e setulu ke totou fakafahitapu e Tohi Tapu ma e Aoga Fekafekau Fakateokarasi. Na fiha ni e tau minuti ka fakaaoga he tau aho takitaha ke totou mo e manamanatu hifo e tau veveheaga ne kotofa. Kia fakatoka kehe e magaaho ke tauteute tuai e Fakaakoaga Tohi he Fakapotopotoaga mo e Fakaakoaga he Kolo Toko. Na taute he falu e mena nei ke taha po ke ua e aho ato o atu ke he tau feleveiaaga ia. Ka fai magaaho foki, kia fakatoka pihia e tau vala he setulu ma e Feleveiaaga Fekafekau he tau fahitapu takitaha.
7 Tali Hake i Ai: Ne talahau e Tohi Tapu he hoko e tau 12, ne moua atu a Iesu he faituga, ne fanogonogo, mo e huhu mena, mo e ne tali atu e tau kupu. (Luka 2:46, 47) Ti kitia moli, ne putoia lahi a ia ki ai. To lauka atu e aoga ka moua e koe mai he tau feleveiaaga he eketaha a koe ke tali hake i ai.—Fakatai 15:23.
8 Lata ia koe ke hakahakau he tau mena ne fakaako he tau feleveiaaga. Falu magaaho, kua uka lahi ke fakanogonogo ke he lauga ka e nakai kaeke ka lauga. He ha? He fa agi noa e manatu hau he magaaho ka vagahau e taha tagata. Ti maeke fefe ia tautolu ke totoko e mena nai? Kia fakamau hifo e tau lauga. Fakamau hifo e tau mena aoga ne lata mo koe ke fakaaoga foki he taha magaaho. He fakamau hifo e tau lauga kua lagomatai ai a koe ke fakatuloto e manatu hau ke he fakaholoaga. Pihia foki, kumikumi e tau kupu Tohi, ti muitua atu he totou mai he gutuvagahau.
9 Lafi atu, kia folia ke tali hake he tau fakatutalaaga takitaha ne taute ke fetaliaki he tau feleveiaaga. To lauka atu e aoga hau kaeke manamanatu fakamitaki e koe e tau mena hau ne manako ke talahau. Kua pehe mai e Tau Fakatai 15:28: “Kua manamanatu e loto he tagata tututonu, kia tali atu a ia.”
10 Fakaaoga e Mena ne Ako e Koe: Ko e lakaaga fakahiku ke fakamoli ko e mena ne ako e koe kua “gahua ai ni i loto ia mutolu.” (1 Tesa. 2:13) He fakaaoga e koe e tau matakupu mitaki ne ako e koe he tau feleveiaaga takitaha, to fakatata atu a koe ki a Iehova ko e Atua. To iloa moli e koe a ia, mo e logona e koe e olioli lahi mo e makona a koe he “eke e mahani he kupu moli,” he taute ai ma hau ni.—3 Ioane 4.
11 Ma e tau matakainaga fuata tane mo e afine, he tauteute tumau a mutolu ma e tau feleveiaaga, kia tali hake i ai, mo e fakaaoga e tau mena ne ako e koe, to logona e koe e fiafia katoa mai he tau feleveiaaga. He magaaho taha ia, to moua e koe e aoga katoa mai ia lautolu. To fakamalolo e tua hau, tuga foki e fifiliaga hau ke piki mau ke he hau a Matua he lagi, ko Iehova.—Sala. 145:18.