Puhala ke Moua Lahi e Olioli Mai he Tau Feleveiaaga
1 Aoga lahi e tau feleveiaaga ke he moui fakaagaga ha tautolu. Ko e olioli kua moua e tautolu mai i ai na matutaki tonu ke he mena ka taute e tautolu ato kamata, magaaho ka hoko ai, mo e ka oti e tau feleveiaaga. Lagomatai fefe e tautolu a tautolu mo e falu ke fakatumau e olioli he o atu tumau ke he tau feleveiaaga?
2 Ato Kamata e Tau Feleveiaaga: Ko e mautauteute kua lauia tonu ke he olioli kua moua e tautolu mai he tau feleveiaaga. Ka mautauteute mitaki a tautolu, to hihiga lahi ni a tautolu ke fanogonogo mo e ke fai vala i ai. Lafi atu, ko e ha kotofaaga he feleveiaaga kua moua e tautolu kua lata ke tauteute fakamitaki, mo e tau foliaga ke talahau fakahako e vala tala hagaao ke he tau fakaakoaga mo e taofi mau e fiafia he toloaga. Kua lata ia tautolu ke tauteute he fatiaki fakamitaki. Ka fai vala a tautolu ke he tau feleveiaaga alaala mo e atihake kua aoga ke he tau tagata oti, ko e tupu fakatagata ha tautolu to kitia ai mo e to moua e tautolu e olioli lahi.—1 Timo. 4:15, 16.
3 Ka Hoko e Tau Feleveiaaga: Ke tali he tau feleveiaaga kua lagomatai a tautolu ke fiafia lahi ki ai. Ko e tau vala kua lauia e fakalatahaaga he toloaga kua lata ke onoono ki ai ko e kotofaaga fakatagata ma e tau tagata oti he fakapotopotoaga. Ko e tau tali ku mo e lautonu kua fa moua mai e lauia mitaki lahi. Ko e talahau fakaku he tau mena iloa kua lahi e ati hake mo e fakamalolo, ti kua lata ia tautolu ke mataala ke putoia foki e tau mena nei ka lautonu mo e fakaholoaga. (Fakatai 15:23; Gahua 15:3) Ka talahau e vala he feleveiaaga, kua lata ia tautolu ke vagahau mo e makai mo e malolo, he taute ai ke alaala, moli, mo e aoga.
4 Ka Oti e Tau Feleveiaaga: He talahau ke he falu e kupu totonu, feleveia fakakapitiga, mo e falu matapatu manatu ne moua he tau feleveiaaga ka aoga ki a tautolu oti. Fakakite e olioli ha tautolu he kitia a lautolu ne ikiiki, fuakau, mo e fou kua tali ne fakahokulo hifo e fakaalofa fakamatakainaga. He nakai tuhituhi ai falu kua nakai hohoko mai ke he tau feleveiaaga, kua lata ia tautolu ke fakalataha mo lautolu e olioli ha tautolu ha kua o atu, he fakamalolo a lautolu ke o atu foki.—Hepe. 10:24, 25.
5 Kia nakai puipui e tautolu a tautolu mai he foakiaga aoga nei he moua e fakafetuiaki he fakamaloloaga. (Roma 1:11, 12) He fakamakutukutu ai he foaki katoa e laliaga moli, kua maeke ia tautolu ke fakatumau e olioli he o atu ke he tau feleveiaaga Kerisiano.