Kia Fanogonogo ke he Tau Kupu Tapu he Atua
1 Nakai lata pauaki ke fanogonogo katoatoa ke he tau mena oti ne vagahau he tagata. Ka ko e magaaho ka vagahau ai e Atua, kua fai kakano aoga lahi ke fanogonogo. (Teu. 28:1, 2) Fakaaue ai, ha kua tohi hifo he tau tagata ne omoomoi he agaga e “tau kupu [tapu] he Atua” ke lata mo e aoga ma tautolu ni. (Roma 3:2) Ko e fonoaga he fahimotu ha ne gutu mai ka foaki e tau magaaho uho ke logona e tau kupu nei he totou ki ai mo e fakatutala ai. Maeke fefe a koe ke fanogonogo fakamakuikui?
2 Hohoko Mai Tuai he Tau Pogipogi Oti: Manamanatu la ke he fiafia he tau Isaraela he magaaho ne tala age ki a lautolu ke feleveia mo Iehova he Mouga ko Sinai ke logona hana Fakatufono! (Eso 19:10, 11, 16-19) Ka ha ha ia koe e aga pihia ke moua e fakaakoaga ha Iehova ke he fonoaga he fahimotu, to taute e koe e tau fakaholoaga ke hoko mai tuai he tau aho oti. Nakai maeke a tautolu ke fanogonogo ke he fakaholoaga katoa ka o mai mule a tautolu mo e fakalavelave falu ha ko e lali ha tautolu ke kumi nofoa. To hafagi ai e tau gutuhala he fonoaga he matahola 8:00 a.m., ti kamata e fakaholoaga he matahola 9:30 a.m. he tau aho oti.
3 Ka ko lautolu foki ne o mai tuai ne nakai nonofo he tau nofoa ha lautolu ato kamata e fakaholoaga. Ko e ha e mena nei? Kua fakatali a lautolu ato talahau he tagata nofoa e lologo hafagi to oti laia e tutala ha lautolu mo e tau kapitiga mo e kamata ke o atu ke he tau nonofoaga ha lautolu. Kua lata ke mailoga e tautolu na fai minuti ato hoko e lologo hafagi he tau fakaholoaga takitaha, to nofo e tagata nofoa i mua ka e ta e leo kofe he Kautu ke kamata aki. Ko e fakakiteaga ki a tautolu anei kua lata tuai ke nonofo! Ti, ka totoku ai e lologo hafagi, to mautali a tautolu ke fakalataha he lologo fakaheke ki a Iehova.
4 Fanogonogo Auloa ko e Magafaoa: He magaaho ne totou ai e tau kupu tapu kua amanaki ai ke he fakapotopotoaga Isaraela, tau magafaoa, putoia foki e “tau tama ikiiki” ke fanogonogo mo e ako mai ai. (Teu. 31:12) He tau fonoaga ha tautolu, kua nakai lata ke “toka noa” e tau fanau. (Fakatai 29:15) Tau mamatua, kia fakatoka e magafaoa katoa hau ke nonofo auloa—mo e tau fuata mui. Ne leo falu matua ke kamata e lologo hafagi ke uta e tau tama ikiiki ha lautolu ke he fale okioki. Pete ia, to nakai fakaako he mena nei e aoga lahi he tau lologo mo e tau liogi he tapuakiaga ha tautolu ke he tau fanau. Kua mitaki lahi ha ia ke leveki e tau manako he fale okioki ato kamata e tau fakaholoaga takitaha kaeke kua maeke!
5 To lagomatai a tautolu ke fanogonogo kaeke ke lahi e okioki he tau po oti mo e nakai kai lahi he aho. Hagaaki ke he mena kua vagahau mai he tagata lauga. Ua tokaholo e manamanatuaga hau. Muitua ke he Tohi Tapu ka totou e tau kupu tohi. Tohi fakaku e tau manatu. He taute ai e tau lauga takitaha, liu fakamanatu ke he manamanatuaga hau e mena ne talahau he tagata lauga, ti manamanatu e puhala ke fakagahuahua aki e koe e vala tala. He fakahikuaga he aho, fakatutala e vala tala fakamagafaoa. Ko e heigoa e tau manatu ne fiafia ki ai e tau tagata takitaha? Fakaaoga fakamitaki fefe he magafaoa hau e vala tala nei?
6 Fakakite e Fakalilifu ma e Kupu he Atua: Foaki mai he tau fonoaga e magaaho mitaki ma tautolu ke tutala ke he tau kapitiga mo e olioli e feoakiaga atihake. He o mai tuai, to moua e tautolu e magaaho ke tutala ato kamata e fakaholoaga. Ka kua taute he falu e fakatutalaaga he magaaho fono, manamanatu hepe ai to nakai fakalavelave e mena nei ki loto he poko fono lahi. Pihia foki ka taute e tau feleveiaaga he tau matakavi lalahi, ko e magaaho a ia ke fanogonogo, tuga ni he o atu ke he feleveiaaga he Fale he Kautu. Ko e fakaaoga he tau telefoni, tau fakahoko fekau, tau pokiata vitio, mo e tau pokiata kua nakai fakaata ke fakalavelave he magaaho fono.
7 He magaaho ne moua e Mose e Fakatufono mai ia Iehova, “nakai kai ai e ia ha mena, ti nakai inu foki ha vai.” (Eso 34:28) Tatai ai, nakai tonu ke kai po ke inu ka hoko ai e tau fakaholoaga he fonoaga. Ato kaga ni ka fai kafokia hagahagakelea e tino, kia fakatali to hoko ‘hana ni a magaaho’ ma e mena nei.—Fakama. 3:1.
8 He falu fonoaga, kua fakatumau ni e lekua nei ke he tokologa he tau matakainaga mo e pihia foki e tau fanau ikiiki hane tamea he tau avaloa ke he tau magaaho fono. To fekau he tau matakainaga leveki a lautolu nei ke liliu ke he poko fono. Kua lata e tau tagata gahua he tau fahi gahua kehekehe ke nonofo he toloaga ka oti e tau gahua ha lautolu he taute. Ato kehe ai ka kotofa a lautolu ke taute e tau gahua kua lautonu mo e magaaho fono, kua lata ia lautolu he nonofo ke fanogonogo ke he fakaholoaga. Ua o fano a lautolu ke he tau fahi gahua, he ahiahi atu ke he falu ka e fono agaia.
9 Nakai manako a tautolu ke ‘eke a tautolu mo tau tagata teligatuli’ ka fanogonogo ke he Kupu he Atua. (Hepe. 5:11) Ko e mena ia kua lata ia tautolu ke fifili ke fakakite e fakalilifu he fanogonogo fakamakuikui he fakatutala mai e tau kupu tapu a Iehova ke he fonoaga he fahimotu ha tautolu hane gutu mai mua.