Fakatumau e Mahani Mitaki kua Fakatokoluga e Atua
1 Ko e ha mena ni kua ha ha ai a tautolu, ko e tau mahani, tauteuteaga, mo e maopoopo ha tautolu kua fakamatala hagaao ki a tautolu mo e Atua ne tapuaki a tautolu ki ai. Kua mailoga lahi e mena nei ke he tau fakalatahaaga lalahi he tau tagata he Atua, ne kua mamata ai e tokologa he tau tagata ki a tautolu. Ka eke a tautolu mo fakafifitakiaga, kua fakatokoluga ai e higoa a Iehova. (1 Pete. 2:12) Pete ia, ko e mahani kelea po ke tau gahua fakahanoa he falu tagata tokofiha ka ta mai e tutuhia ke he higoa he Atua mo e hana tau tagata. (Fakama. 9:18e) He tokaloto ai ko e tau mahani ha tautolu kua fakafili he tau tagata i fafo e fakatokatokaaga ha tautolu mo e Atua kua tapuaki a tautolu, ti kua lata ke maimaina a tautolu he ‘eke e tau mena oti kana ke fakaheke ai ke he Atua.’—1 Kori. 10:31.
2 Tau Mahani Fakafifitaki he Tau Motela: Laulahi ai, ne nava lahi e matakau motela ke he maopoopo, tau mahani mitaki, mo e tu mea he Tau Fakamoli a Iehova. Taha e takitaki, ne talahau ai ke he tau magafaoa Fakamoli ne nonofo he motela hana, ne pehe: “Nakai la kitia ia au ha fanau mahani mitaki tuga e tau fanau he Tau Fakamoli a Iehova! Kua tauteute a lautolu tuga e tau fifine mo e tau tagata tane; kua totonu a lautolu, kua manamanatu, mo e mahani mitaki; ti nakai fakatupu lekua a lautolu. Kua nava moli ki a mutolu ha ko e ha mutolu a tau fanau ikiiki. Kua fiafia a mautolu ke he tau fanau ha mutolu he nonofo hinei.” Ko e tau talahauaga pehenei kua tupu mai ni ha kua maeke ia lautolu ne fehagai mo tautolu ke kitia e fakaalofa mo e fakalilifu kua ha ha ai ke he tau tagata ha Iehova.
3 He taha fahi, ko e tau talahauaga he falu matakau motela kua fakakite nukua fai lekua agaia mo e falu kua fakahanoa ha lautolu a tau mahani po ke fakaaoga hehe e tau koloa he motela. Kua fakatupu he mena nei e tau lekua mo e fakatu e tau tutuhia kua nakai lata ke tupu. Kua gugu falu he tau takitaki ha kua hoha mo e nakai fai akonakiaga e tau fanau mo e tau fuata mui, nakai leveki he tau mamatua he fakaaoga e pa koukou po ke falu poko fakafiafia.
4 Laulahi he tau motela kua fai matafakatufono na kua lata he tau tagata i ai ke muitua. Kua moumou he falu matakainaga e tau matafakatufono nei hagaao ke he hohoha po ke tunu kai he tau poko ha lautolu. Kua talahau he tau takitaki motela ki a tautolu, ko e tunu kai ke he matakavi ne nakai fakaata, ko e hehe fa mahani mau he motela ha lautolu. Nakai ni malona e tau poko ka e mau e namu ne kua fakamataofi e fakaataaga ke fakaaoga ke he loga e tau aho po ke tau fahitapu he mole. Ato kehe ai ni ka fakaata pauaki e poko ke tunu aki e tau mena kai.
5 Ko e laliaga moli kua lata ke taute he kau auloa katoatoa mo e takitakiaga. Moli, kua nakai manako a tautolu ke toka e onoonoaga nakai mitaki he tau tagata ha Iehova. Ko e tau Kerisiano, kua lata ia tautolu ke mahani fakamoli a tautolu he tau magaaho oti. Nakai lata ia tautolu ke uta e tau kafu po ke falu “mena tokiofa” mai he motela, ha ko e kaiha a ia; po ke nakai fakamoli a tautolu he hokotaki e numera tagata kua pulega ki ai a tautolu ke nonofo he poko he magaaho ka taute e tau fakatokatokaaga po ke ka o atu ke fakakia.
6 Maopoopo Mitaki he Fonoaga: Pete ni ko e faga fale fefe ne fakaaoga, kua lata ke onoono ki ai ko e Fale he Kautu kua lata ma e fonoaga. Ko e tauteuteaga kua gali mo e maopoopo kua lata ke eke mo fakamoliaga tuga ni he o atu a tautolu ke he tau feleveiaaga he fakapotopotoaga ha tautolu he matakavi. He magaaho mo e ka oti e tau fakaholoaga he fonoaga, kua lata e tau matakainaga ke fakamamao mai he tui e tau tapulu nakai gali mo e fasone ne kua fakaata e aga he lalolagi mo e taute a tautolu ke uka ke mailoga e kehekeheaga moli. Kua lata e tau matakainaga fifine ke mailoga kua hagahaga mitaki mo e gali e loloa he tau patutiti mo e tau tapulu ha lautolu. (1 Timo. 2:9, 10) He o atu ke he fonoaga, nonofo he motela, kai he fale kai, po ke o ke he fale koloa, kua lata ia tautolu he tau magaaho oti ke fakaata ko tautolu ko e tau fekafekau he Atua, he nakai fakatupu ha fakatupetupe.—2 Kori. 6:3.
7 To taute e papatisoaga he pogipogi Faiumu he fonoaga. Kua fakamaama mai he Watchtower ia Aperila 1, 1995, lau 30, e aga kua lata ke fakatata e tautolu he magaaho ia. Ne talahau ai ki a tautolu “kua lata ke fakakite e hokulo kua latatonu he papatisoaga. Nakai ko e magaaho ke fakakite e tafeauhi, fiafia, po ke vaiga. Ka e nakai ko e magaaho fakatutuku po ke momoko foki.” Kua nakai lata he tau tagata, tane po ke fifine, ke tui e tau taute koukou tokanoa ka amanaki ke papatiso. Ka kua lata ke fakaata oti e hokulo lahi mo e olioli he papatisoaga Kerisiano.
8 Kua fakamanatu e Peteru ki a tautolu ‘po ke fefe ha tautolu a mahani ke lata ai ke he tau mahani mitaki mo e tau mahani Atua.’ (2 Pete. 3:11) Kia eke e tau kupu mo e tau gahua ha tautolu ke he Fonoaga he Fahimotu he “Eke mo Tau Tagata Omaoma ke he Kupu he Atua” ke lagomatai a lautolu ne kua loto moli ke iloa mo e tapuaki e Atua lahi ha tautolu, nukua lata mo e fakalilifuaga mo e fakahekeaga oti.—1 Kori. 14:24, 25.