Kia Mahani Mitaki mo e Moua e Fakahekeaga!
1 “Ha ha ia lautolu e mahani totonu ne nakala kitia e au ke he ha kau tagata.” “Kua fiafia ha ia ke moua e matakau nei.” Ko e tau talahauaga mitaki anei fa mahani pauaki ke moua mai he tau tagata i tua he oti e fonoaga fahimotu he tau kua mole, mo e fakamau moli e talahaua mitaki ke he fakatokatokaaga ha tautolu. (Fakatai 27:2; 1 Kori. 4:9) Fakahiku ai, ko e fakahekeaga a ia ki a Iehova. (Mata. 5:16) Taha magaaho homo ue atu foki ke fakaheke atu e Atua kua foaki ki a tautolu he Fonoaga Fahimotu “Tau Faiaoga he Kupu he Atua” he tau nei.
2 He tau tau takitaha kua fakamanatu fakamafana ki a tautolu ke he tau mahani kua gali he tau fonoaga. Ko e ha? He holo ki mua e kelea he aga, tau tauteuteaga, mo e tau mahani he lalolagi, kia kalo kehe a tautolu mo e nakai fifitaki ki ai. Nakai manako a tautolu ke takiva ha tautolu a talahaua mitaki. (Efeso 2:2; 4:17) Kia tokaloto la e tautolu e tau hatakiaga na kua foaki.
3 Kia Mahani Mitaki—He Tau Hotela mo e Motela: Kua iloa a tautolu ko e tau tagata mahani mitaki. (Hepe. 13:18) Ti lata ia tautolu he talahau fakamoli e numera he tagata ka nonofo auloa mo tautolu he tau poko hotela po ke motela. Nakai lata ia tautolu ke kaitunu he poko kaeke nakai fakagofua e mena nei. Taha e leveki hotela ne pehe kua maeke ia ia ke tukuhifo e totogi he tau poko ma e Tau Fakamoli a Iehova he nakai fa hukui e ia e tau touela hana ne fa galo. Iloa e ia to tokaga fakamitaki e lautolu e tau koloa. Mo e moli, nakai utakehe e tautolu ha “tokiofa” he tau hotela po ke motela. Taha mena foki, kia mahani fakalilifu tumau mo e fakauka ke he tau tagata gahua motela.
4 Na navanava he tau tagata i tua e tau fanau ha tautolu ha kua kitia e lautolu kua mahani fakalilifu mo e omaoma. (Efeso 6:1, 2) Tau mamatua, fakamolemole, kia leveki e tau fanau ha mutolu ke nakai fakalavelave e falu, pauaki he tau magaaho ka fakaaoga e tau pa koukou po ke falu poko fakafiafia tino. Lata oti ke ua pa fakalahi e tau gutuhala po ke tafeauhi, mua atu ke he tulotopo.
5 Maeke ia tautolu ke taute e mahani mitaki he manamanatu na ha ha i ai e tau tagata i tua ne fakaaoga foki e fale. Nakai ko e mahani mitaki ke fakaaoga fakahanoa e tau mena kai fakatoka ke he mafoa po ke fakapuke e tau lupo mo e inu kofe ke fakaaoga a magaaho. Aua neke manamanatu kua kehe a tautolu hagaao ke he tau takitakiaga pauaki he motela.
6 Kia Mahani Mitaki—He Fonoaga: Kua logona mai he falu a matakainaga kua nakai felagomataiaki mo e tau fekafekau leveki, mo e vagavagahau nakai faka-Kerisiano ki a lautolu. Kua nakai muitua ke he tau takitakiaga he tau matakainaga tane ti kua paaka he tau mena nakai kaga, ti kua toho kehe e tau peleo afi he falu matakainaga. Moli ni, ko e aga ko au-ni to nakai fakamailoga e tagata mahani mitaki, po ke fakakite e fakahekeaga ki a Iehova ko e Atua. Haia, kia taute e tautolu e mahani fakaalofa, fakauka, mo e gahuahua auloa.—Kala. 5:22, 23, 25.
7 He hafagi e tau gutuhala he hola 8:00 a.m., ha ne fa e kitia e tau matakainaga tane mo e fifine ne tafepoi, fepokaaki, mo e ukuuku atu ke moua e tau nofoa ‘mitaki.’ Kua pakia e falu he tau faga mahani pehe. Pete kua ole atu ke fua mai e oho mama ha tautolu he kailaa, nakai lata ke fakatutu e tau laulau he tau paakaaga peleoafi ti fakatoka e kai lahi. To tuga a ia ke he tau fefeua sipote ne fa e mahani ke taute e tau fakafiafiaaga pihia.
8 Kia Mahani Mitaki—Tau Tapulu mo e Tauteuteaga ha Tautolu: He fakahikuaga he taha fonoaga fahimotu he tau kua mole, tohia e etitoa he taha nusipepa lahi: “Mua atu he ha mena foki, ko e tau tauteuteaga he Tau Fakamoli a Iehova ne mua atu e mitaki. Kua hauhau ha ia ke kitekite e tau tagata tokologa ne tui e tau taute gali mo e fakalilifu. Tauteute he tau tapulu tui Tapu mitaki ha lautolu, ne tolo fakatekiteki atu e tau magafaoa tokoteau he tau lanu tagata mo e tau motu kehekehe ke he male. Kua kehe lahi e tau mahani ha lautolu ke he moto tagata fa mahani ke tolo ke he male. Hanai, kua kehe lahi e Tau Fakamoli ke he tau moto tagata ne fa mahani pauaki. Ha ne mahani lahi he vaha nei ke kitia e tau tagata mahani hemu. . . . Moli ni, kua mitaki e mahani he moto tagata Fakamoli.” Kia nakai fakagofua e tau mena tui mo e tauteuteaga po ke mahani ha tautolu ke fakakelea aki ha mena he fonoaga fakaagaga.”—Filipi 1:10; 1 Timo. 2:9, 10.
9 Kia Mahani Mitaki—He Papatisoaga: Kia lautolu ka papatiso kua lata he fakakite e fakalilifu kua latatonu nei mo e papatisoaga. Kia tui e tapulu koukou kua gali mo e fakakite e mahani fakalilifu ma e magaaho tapu ia. Kua mitaki lahi ki a lautolu ne fakaako e Tohi Tapu ke totou fakalataha mo lautolu ne ako tohi fakamua e “Tau Huhu Mai He Tau Tagata Totou” he fufuta The Watchtower, ia Aperila 1, 1995, to o atu ke he fonoaga.
10 Ko e tau tauteuteaga mo e mahani faka-Atua ha tautolu kua fakamoli e tau talitonu faka-Kerisiano ha tautolu mo e fakamukamuka aki a lautolu mo e loto totonu ke kitia maali e kupu moli. Ti, o mai la tautolu, “kia mahani mitaki” ke moua ai e fakahekeaga he fakalataha ke he Fonoaga Fahimotu “Tau Faiaoga he Kupu he Atua.”—Roma 13:3.