‘Fakamalolo Nakai Noa ke he Mena Mitaki’
1 Kua putoia e puhala moui Kerisiano he ‘fakamalolo nakai noa ke he mena mitaki mo e tau tagata oti kana.’ (1 Tesa. 5:15) Ka o atu ke he tau fonoaga fahimotu ha tautolu, loga e tau puhala ke taute e tautolu e taha mena mitaki ma e falu. He tau magaaho ia, kua mailoga he tau tagata a tautolu, mo lautolu kua matuuta mo tautolu kua fakatutu e tau manatu hagaao ki a tautolu ke he matapatu puhala nukua taute atu e tautolu ki a lautolu. Ke tumau e aga he Tau Fakamoli a Iehova, kua lata ia tautolu ke fakakite e tau gahua ha tautolu he “fakalilifu . . . ke he tau tagata oti kana.” (1 Pete. 2:17) Putoia ai e “aua neke takitokotaha mo e manamanatu ke he tau mena [ha tautolu], ka e takitokotaha mo e manamanatu ke he tau mena he falu.” (Filipi 2:4) Manamanatu ke he puhala kua fakaaoga e mena nei ke he tau fakatokaaga he tau nonofoaga ma e fonoaga.
2 Kua fita nakai e taute hau a nofoaga he motela? (1) Ha kua manako e motela ke fakaaoga oti e tau poko tokanoa ha ha i ai, ua fakamau loga e tau poko ne nakai amanaki a koe ke nofo ai. (2) Ua amanaki to fakamau he motela e poko hau ato toka tuai aki e koe taha tupe. (3) Ka fina atu a koe ke he motela, fakakite e fakauka mo e fakalilifu ke he kau gahua motela ha kua mautali a lautolu ke leveki a koe. (4) Ka atu noa e kai pogipogi, ua fakaaoga hehe e foakiaga nei, nukua taute ni ma e tau tagata ne nonofo he motela. (5) Muitua ke he tau matafakatufono he motela ke he puhala ke fakaaoga aki.
3 Fakaako e Tau Fanau ke he Puhala Taute e Mitaki: Falu magaaho, ko e tau fanau ne tokanoa nakai fai levekiaga mitaki he tagata lahi he tau motela ne fakatupu ai e tau lekua. (Fakatai 29:15) He falu mena tupu, ne lavelave e tau mamatua he falu gahua ti nakai fai levekiaga e tau fanau ha lautolu he poko, he pa koukou, po ke falu matakavi he motela. Ne fakahanoa lahi falu fanau ti ko e mena ia kua tonuhia e pule leveki ke hataki a lautolu he fakaaoga falu koloa, po ke pa e pa koukou, po ke falu matakavi fakafiafia. Ne fakaita he mena nei falu tagata he motela, ko lautolu e Tau Fakamoli mo lautolu ne nakai Fakamoli.
4 Tau mamatua, ato hoko e fonoaga, to lagomatai lahi ka fai magaaho a koe mo e fanau hau ke liu kitekite e puhala he mahani Kerisiano ne kua amanaki mai ia lautolu he tau magaaho oti mo e he tau matakavi oti. (Efeso 6:4) Ma e fakatai, fakakite age ki a lautolu ko e fakaalofa Kerisiano moli kua “nakai mahani fuafuakelea, nakai kumi e ia hana tau mena, nakai ita vave.” (1 Kori. 13:5) Maeke he tau tagata lalahi ke peehi e tau kupu nei he fakatoka e fakafifitakiaga hako ma e tau tagata ke kitia. Tau fanau, maeke ia mutolu ke tutuli e mena mitaki he omaoma ke he tau mamatua ha mutolu, he fakakite e fakalilifu ma e koloa he motela, mo e manamanatu ki a lautolu ne takatakai ia koe. (Kolo. 3:20) He lali auloa a tautolu ke taute e mitaki ke he tau tagata oti, “fakalilifu ai e [tautolu] e tau kupu he Atua, ha tautolu a Fakamoui ke he tau mena oti.”—Tito 2:10.
5 Ko e mahani mitaki ha tautolu kua fai lauia mitaki nakai ni ke he tau tagata ne mamata mai ka ki a lautolu foki ne kumi kelea ki a tautolu ke he tau kakano kehekehe. Ko e tau mena oti nukua taute e tautolu he fonoaga mo e he matakavi ia ka fakahoko ai e fonoaga—he fano he puhala tu, kai he fale kai, okioki he motela, po ke fakaaoga e tau magaaho ke fakamatala noa atu—kua lata e tau kupu mo e tau gahua Kerisiano ha tautolu ke fakamoli aki kua manako a tautolu ke tutuli e mitaki.
[Puha he lau 4]
Fakamolemole Manatu:
■ Kia fakauka mo e fakalilifu ke he matakau gahua motela.
■ Muitua ke he tau matafakatufono he motela, ke aoga katoa ai e tau tagata oti.
■ Ua fakaaoga hehe e tau kai pogipogi ne foaki noa atu.
■ Kia matakaki fakamitaki e tau gahua he tau fanau hau.