Kia Eke mo Fakafifitakiaga he Tau Gahua Mitaki
1. Ko e ha kua lata ia tautolu ke mua atu e manamanatu ke he tau mahani ha tautolu he fonoaga he fahimotu?
1 Ka tokologa a tautolu ka fakapotopoto ke he tau fonoaga he fahimotu, to kitia maaliali he tau tagata kitekite e tau tauteaga mena ha tautolu mo e puhala ne fakafehagai mo e falu. Igatia a tautolu, mogoia, he lata ke kikite fakalahi ke he tomatomaaga he Tohi Tapu: “Kia mahani fakalatalata a [t]autolu. Kia eke a koe mo fakafifitakiaga ke he tau gahua mitaki ke he tau mena oti.” (Tito 2:6, 7) Liga lahi atu e malolo kua lata ke “aua neke takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu.” (Filipi 2:4) O mai la ke fakatutala ke he falu fahi ka maeke ke fakagahua e tautolu e fakamaloloaga nei ke he Fonoaga he Fahimotu “Kia Fakaheke Atu ke he Atua” hane gutu mai.
2. Ko e heigoa ha tautolu kua lata ke manatu ke lata mo e tau fakatokaaga nonofoaga?
2 Tau Fakatokaaga Nonofoaga: Ko e magaaho mitaki lahi ke fakakite e tautolu e tau gahua mitaki ka taute e tau fakatokaaga nonofoaga. Fakamolemole fakamau ni e poko he motela ne amanaki a koe ke fakaaoga. Kia fakamoli ke ta atu tuai e tupe fakamau kua lata. Ke he magaaho lavelave he hohoko atu laia po ke taute ke o kehe mai he motela, kua loto fakaaue lahi ka fakakite e tautolu e tau fua he agaga he Atua. (Kala. 5:22, 23) Ma e fakatai, liga nakai maeke ke igatia oti mo e poko ne nakai ula tapaka, pete he ole tuai e koe he magaaho ne fakamau ai.
3. Maeke fefe ke ‘mahani mitaki a tautolu ke he tau tagata oti’ he motela?
3 Ko e ha tautolu a fiafia fakatagata ke he falu kua lata ke kitia ke he puhala ne fakaaoga aki e tautolu e tau fakatokaaga kai pogipogi ne mai noa. Kua nakai hagahaga mitaki ke uta ke he fonoaga e tau mena kai ne tuku mai ma e tau tagata ne nonofo he motela. Kua loto fakaaue mai ki a tautolu ka omaoma mai he tau loto manamanatu ke he tau matafakatufono he motela mo e fakakite e manamanatu ke he tau tagata gahua. Ke he tau puhala nei kua “mahani mitaki a tautolu . . . ke he tau tagata oti” mo e fakamatala mitaki atu ke he falu.—Kala. 6:10.
4, 5. Maeke fefe e tau fanau ke fakaheke a Iehova, mo e ko e heigoa e gahua he tau matua?
4 Tau Matua mo e Tau Fanau: Ke he lalolagi ne tokologa e tau fuata ne nakai fai mahani, kua kitia maali e kehe he tau fanau ha tautolu, ti tamai he mena nei e fakahekeaga ki a Iehova mo e hana fakatokatokaaga. Pete ia, ke he tau magaaho, kua tupu mai e tau lekua he nakai leveki fakamitaki e tau fanau. (Fakatai 29:15) Nakai lata e tau matua ke toka e tau fanau hoko lautolu ni he motela, putoia e pa koukou, po ke matakavi he fonoaga.
5 Ato hoko e fonoaga ko e falu mamatua kua moua e lagomatai he liu fakamanatu ke he tau fanau ha lautolu e vahega mahani kua amaamanaki mai ia lautolu. (Efe 6:4) Kua lagomatai e lautolu e tau fanau ke maama e fakaalofa Kerisiano moli ne “nakai mahani fuafuakelea” po ke “nakai kumi ke he hana tau mena.” (1 Kori. 13:5) Ko e fonoaga he fahimotu ko e magaaho kua tuku kehe ke fakaako e Iehova, ti ko e tau fanau mo e tau tagata lalahi foki kua maeke ke fakakite e fakalilifu ma e fakatokatokaaga nei ha ko e tau mahani ha lautolu ke he matakavi he fonoaga mo e ha matakavi ni.—Isaia 54:13.
6. Lauia fefe e falu ha ko e mahani mitaki ha tautolu?
6 Ko e tau mahani mitaki ha tautolu ka totoko e tau iloaaga hehe mo e futia mai e tau tagata ke he tapuakiaga moli. (Mata. 5:16; 1 Pete. 2:12) Kia moua e lautolu oti ne feleveia mo tautolu he ha tautolu a fonoaga he fahimotu e fakamatala mitaki mai he tau puhala taute mena mo e fakafehagai ha tautolu mo lautolu. He puhala nei kia ‘eke a tautolu mo tau fakafifitakiaga he tau gahua mitaki’ mo e fakaheke a Iehova.—Tito 2:7.
[Puha he lau 4]
Kia Manamanatu ke he Falu
▪ Toka ni he poko ne amanaki a koe ke fakaaoga
▪ Kia fakahautoka he hohoko atu laia mo e o kehe he motela
▪ Ua fakaaoga fakahehe e tau foakiaga kai pogipogi
▪ Leveki fakamitaki e tau fanau ha mutolu