Kia Tapu e Tau Mahani Oti ha Mutolu
1. Ko e ha ne aoga ai ke tapu e tau mahani oti ha tautolu?
1 Ha ko e tau fekafekau he Atua tapu, ko Iehova, kua eketaha a tautolu ke tapu e tau mahani oti ha tautolu. (1 Pete. 1:15, 16) Kakano ai ke ukufakina a tautolu ke lalago e tau tutuaga ha Iehova ke he tau fahi oti he tau momoui ha tautolu. Ko e magaaho mitaki pauaki e fonoaga he fahimotu he tau nei ke fakatata e mahani tapu.
2. Maeke fefe ia tautolu ke fakakite e mahani mitaki he tau hotela?
2 He Tau Hotela: Taha e takitaki he hotela ne fakaaoga he tau tagata o fonoaga he tau kua mole ne pehe: “Ko e mitaki ha ia he Tau Fakamoli a Iehova he nonofo hinei. . . . Ko mutolu e vahega tagata ha mautolu ne manako.” Ko e muitua ke he tau fakamanatu nei ne mumui mai ka lagomatai a tautolu ke fakatumau e higoa mitaki: (1) Ua loga e poko ka fakamau ke he mena kua manako ki ai, ti ua loga e tagata ka nonofo he poko ke he mena kua fakaata ai. (2) Kaeke lata ke liuaki e poko hau ne fakamau, fakailoa fakamafiti ke he hotela. (3) Uta e peleo toho katoleta ka mau moli a koe ke fakaaoga. (4) Ua kaitunu he tau poko nakai kaitunu. (5) Ua fakaaoga fakahehe e tau kai pogipogi, kofe, mo e tau aisa ne tuku ke fakaaoga e tau tagata nonofo he hotela he mogo ka nonofo a lautolu he hotela. (6) Fakatata e tau fua he agaga he fehagai mo e tau tagata gahua he hotela, mua atu he magaaho lavelave he hohoko atu laia mo e o kehe mai ai.—Kala. 5:22, 23.
3. Ne liga fakafiafia fefe he mahani he tau fanau Fakamoli e falu?
3 Maeke he tau mahani mitaki ha tautolu ke foaki e fakamatala mua atu e malolo. He tau kua mole ne taha e Fakamoli fuata tote ne ole fakatotonu ke he tagata leveki he hotela ke he falu koloa tohitohi ti fakaaue ki a ia. Ne aamotia he mena nei e tagata gahua, ti logona a ia he pehe: “Nakai kitia e ha fuata tote kua mahani mitaki pihia he vaha nei.” Pete ia, he falu tutuaga gahoa, kua kitia e tau fanau hane kakau, fefeua he tau lifi, tutala fakalalahi, mo e tafepoi he tau ava loa. Nakai lata e tau matua ke toka holo e tau fanau ha lautolu ka e leveki tumau ki a lautolu ke iloa ko e tau mahani ha lautolu kua tamai e fakaheke ki a Iehova.—Fakatai 29:15.
4. Maeke fefe ia tautolu ke fakakite e manamanatu ke he falu ka kai he tau fale kai?
4 He Tau Fale Kai: Ne talahau he taha tagata tufa kai he taha fale kai ne tata ke he fonoaga: “Kua kehe e Tau Fakamoli. Ne fakalilifu a lautolu ke he falu.” Ko e mahani mitaki kua putoia e nakai tutala mo e feki fakalalahi ne liga fakatauhele e falu ne kai foki i ai. Pete he kai mo e inu, kua eketaha a tautolu ke taute e tau mena oti ke fakaheke e Atua.—1 Kori. 10:31.
5. Ko e heigoa kua putoia e mahani mitaki he matakavi fonoaga?
5 He Fonoaga: Kua lata ke mua atu e mahani mitaki ha tautolu he matakavi fonoaga. Fakamolemole kaufakalataha mo e takitakiaga he tau tagata leveki, ke he tau paakaaga motoka mo e i fale. (Hepe. 13:17) Kua lata e tau magafaoa ke nonofo auloa ka e nakai fakaata e tau fanau ha lautolu, putoia e tau fanau lalahi, ke nonofo mo e matakau he falu fuata. Ko e ha vahega poki ata, kia nakai palaki ke he ha fakatokaaga hila po ke leo kofe mo e fakaaoga ni he puhala ke nakai fakatauhele e falu. Ka poki ata a koe, ua fakalupa ai he magaaho he fonoaga. Ko e tau fakahoko fekau mo e tau telefoni utafano kua lata ke fakatoka ke nakai fakatauhele.
6. Fakaheke fefe he tau mahani ha tautolu he tau fonoaga e Atua?
6 Ko e tau mahani ha tautolu kua fakakehe aki a tautolu mai he falu mo e fakaheke e Atua. (1 Pete. 2:12) He fonoaga, ko e tau aga he Tau Fakamoli a Iehova to mamata ki ai. Ko e mena ia, kia eketaha ke tapu e tau mahani oti ha tautolu.
[Puha he lau 5]
Fakatata e Mahani Tapu
◼ Omaoma ke he tau matafakatufono oti he hotela
◼ Leveki fakamitaki e tau fanau
◼ Kia manamanatu ke he falu