Foaki he Tau Fekafekau Lagomatai e Tau Gahua Uho
1 “Kua fakatata e lautolu a lautolu ko e tau tagata tane tukulele moli kua ha ha i ai e tua ne fakakite e fakamakamaka ke he gahua he Kautu mo e he lagomatai falu ke mauokafua ke he tua.” Talahau pihia he Organized to Accomplish Our Ministry, he lau 57, hagaao ke he tau fekafekau lagomatai. Moli, ko e fakataiaga fakaagaga kua fakatoka he tau fekafekau lagomatai ha tautolu kua latatonu he fakafifitaki. He gahua fakalataha mo lautolu mo e tau motua kua “ati hake ai he tino e ia a ia ni ke he fakaalofa.”—Efeso 4:16.
2 Kua taute he tau fekafekau lagomatai e holoaga aoga i loto he fakapotopotoaga. Manamanatu ke he tau gahua uho oti ha lautolu! Kua leveki e lautolu e tau fakamauaga tupe, tau tohi, tau mekasini, tau ota mekasini fakahu, mo e tau matakavi; kua eke a lautolu mo tau tagata totou; leveki e tau leo fakatagi, mo e lagomatai he leveki e Fale he Kautu. Kua fakalataha a lautolu he Aoga Fekafekau Fakateokarasi mo e Feleveiaaga Fekafekau. Kua taute he falu ia lautolu e tau lauga he toloaga po ke falu vala he tau feleveiaaga he fakapotopotoaga. Tuga ni e tau lala he tino, kua taute he tau fekafekau lagomatai e tau gahua kua lata mo tautolu.—1 Kori. 12:12-26.
3 He kitia e tau fekafekau lagomatai kua fakalataha auloa mo e tau motua ko e vala he taha e kau leveki ha ko e fefakalilifuaki mo e femaamaaki kua fakamalolo e falu ke taute pihia. (Kolo. 2:19) He taute fakamoli katoatoa ha lautolu a tau matagahua he tau fahitapu oti mo e fakakite e fiafia fakatagata ke he falu, kua lafi atu e lautolu ke he fakapotopotoaga tupu fakaagaga.
4 Ko e heigoa ha tautolu ka taute ke fakakite aki ha tautolu a fakaaue ke he tau fekafekau lagomatai gahua malolo? Kua lata ia tautolu ke mahani mo e ha lautolu a tau matagahua kotofa ti fakakite e mautali ke gahua fakalataha ka manako ke he ha tautolu a lagomatai. Ke he tau kupu po ke gahua, kia fakailoa e tautolu ki a lautolu e fakaaue ke he gahua ha lautolu. (Fakatai 15:23) Ko lautolu kua gahua malolo ke lata mo tautolu kua lata ma e mailogaaga moli.—1 Tesa. 5:12, 13.
5 Kua fakakatoa he Kupu he Atua e matagahua mo e lata he tau fekafekau lagomatai. (1 Timo. 3:8-10, 12, 13) Ko e gahua tapu uho ha lautolu kua latatonu ke he holoaga he fakapotopotoaga. Kua tokiofa he tau tagata tane pihia e fakamaloloaga fakatumau ha tautolu, he ha ha ia lautolu oti e “fakamakai nakai noa ke he gahua he Iki.”—1 Kori. 15:58.