Pulega Tuai!
1 Kua foaki he fakatokatokaaga a Iehova e fakaholoaga tumau he tau gahua fakateokarasi ne kua talaga ke fakamakona e tau manako fakaagaga ha tautolu. Ko e loto fakaaue kua omoi a tautolu ke fakaaoga katoa e tau mena oti kua fakatokatoka, tuga e aahi mai he leveki faifano, tau toloaga mo e tau fonoaga, mo e falu matagahua uho ne kua fakatoka he fakapotopotoaga. (Mata. 5:3) Pete ia, falu ne fakato e loga he tau foakiaga fakaagaga nei ha ko e falu fakatokaaga foki ha lautolu. Ko e heigoa ka taute ke puipui mai he mena nei? Ko e heigoa ka taute e tautolu ke nakai fakatauhele he tau matagahua nakai fakateokarasi e ‘tau mena kua mua e aoga’?—Filipi 1:10.
2 Pulega Pulotu Kua Latatonu: Kua fakamafana mai he Fakatai 21:5: “Ko e tau manatu he tagata ne malolo ke gahua kua hiku ia ke he muhu mena; ka ko lautolu kua fakatepetepe, kua fakatepetepe atu ni ke he nofogati hokoia.” Ke “muhu mena” fakaagaga, kua lata ia tautolu ke pulega tuai fakailoilo, he tokaloto e tau matagahua fakateokarasi ne kua fakatokatoka. Kua lata ia tautolu ke setulu e tau gahua fakatagata ha tautolu he magaaho ka nakai fakatauhele mo e fakalataha ha tautolu ke moua e tau monuina fakaagaga. Ka taute fakapouli noa e tautolu e tau pulega ke he tau mena ne manako a tautolu ni ki ai, mo e nakai manamanatu ke he tau gahua fakateokarasi mai i mua, to matamata ai ke “nofogati” fakaagaga a tautolu.
3 Aua Fakato! Igatia a tautolu mo e taute pulega ma e vaha anoiha, lauia e tau magaaho okioki, tau fenoga gahua, feleveia mo e tau magafaoa, mo e falu foki. Ato taute e tau pulega fakahiku hau, kikite e setulu ma e tau matagahua fakaagaga mai mua. Ka mailoga e koe kua hau fai e leveki takaiaga po kua setulu e toloaga ia he magaaho taha ka fano kehe a koe, kia liu fakatokatoka fakamitaki e tau matafekau ke maeke ia koe ke fakalataha ki ai. Kua iloa tuai e tautolu e tau mena tutupu lalahi ke lata mo e vaha i mua. To tala atu he tau motua e tau mena kua pulega ma e fakapotopotoaga.
4 He fakagahuahua tuai mo e pulega atu ki ai ma e tau mena kua mua atu e aoga, to “puke a mutolu ke he tau fua he mahani tututonu . . . ke tupu ai e fakaheke mo e fakaaue ke he Atua.”—Filipi 1:11.