Kumi e Lagomatai
1 Ko e tau kupu mai he agaga ne talahau fakatonu e tau vaha vihu ha tautolu ko e “tau aho uka.” (2 Timo. 3:1) Ti, heigoa hau ne lata ke taute ka fehagai a koe mo e tau totoko fakaagaga ne uka mo e logona e koe kua nakai fahia ke fakafeao?
2 Mahalo nakai a koe ke tutala ke he taha matakainaga matua fakaagaga he fakapotopotoaga? Ko e falu fa temagao ke taute pihia ha kua ma, po kua nakai manako ke fakalavelave atu, po kua mahalohalo he ha tagata ke lagomatai atu a ia. E moli, kua lata ia tautolu ke fua e tau kavega ni ha tautolu he puhala kua fahia, ka e lata foki ia tautolu he logona e ataina ke kumi e lagomatai hagaao ke he tau mena ne putoia ai e malolo fakaagaga ha tautolu.—Kala. 6:2, 5.
3 Ke Kamata i Fe: Ko e ha ne nakai finatu a koe ke he tagata takitaki tohi hau mo e pulega ke gahua tokoua a mua he fonua. He puhala nei, to maeke ia koe ke fakatutala ki a ia e manako hau ke tolomaki fakaagaga. Kaeke ko e fekafekau lagomatai a ia, fakailoa ki a ia e manako hau ke moua e lagomatai fakaagaga to tutala a ia ke he tau motua ke lagomatai a koe. Po ke finatu ki a taha he tau motua mo e ha mena ni ne lauia mo koe.
4 Ko e faga lagomatai ha kua lata mo koe? Fai mena kia kua fakamomoko aki e fakamakutu hau? Ko e matua tokotaha kia a koe ne lali ke lopoti fakatata e fanau hau ke he fakapotopotoaga? Ko e tagata motua kia a koe ne manako e lagomatai? Po kua fai lekua kia ne fakalolelole aki a koe? Kua uka moli ke fakafeao ai mo e tau vaha vihu ha tautolu—ka e nakai mafai ai. Kua maeke ke moua mai e lagomatai.
5 Hala he tau Motua ke Lagomatai: Ne lahi e fakaalofa he tau motua. To fanogonogo a lautolu ke he tau mena ne lauia mo koe. Kaeke fehagai e falu tagata fakamatala mo e tau mena fakalavelave pihia, to tokaloto e lautolu e tau mena nai he leveki ai e fuifui mamoe mo e fakaako e fakapotopotoaga. Ha ko e “tau fakafifitaki ke he fuifui mamoe,” ne mautali a lautolu ke gahua fakalataha mo koe mo e olioli. (1 Pete. 5:3) He fanogonogo atu ke he tau matakainaga lotomatala nei he vagavagahau mai e lautolu e tau matapatu fakaakoaga he Tohi Tapu to fakatolomaki e fekafekauaga hau mo e lagomatai aki a koe he mouiaga hau.—2 Timo. 3:16, 17.
6 Ne foaki mai e Iesu ki a tautolu loga “e tau mena fakaalofa ke he tau tagata.” (Efeso 4:8, matahui tala, NW.) Ko e kakano he mena nei, kua haia e tau motua ke fekafekau ki a koe. Kua ata ai a lautolu ke lagomatai a koe. Ti, tuga kua pehe, ko lautolu “ko e ha mutolu haia.” (1 Kori. 3:21-23) Ti aua fakatuai, ka e vagahau hake. Kumi e lagomatai ne lata mo koe.