Ha Ha Nakai ia Koe e Aga Foaki Noa?
1 Ko e loto fakaaue ke he gahua nakai lotokai ha Iesu Keriso ma e tau tagata kua lata ke fakalagalaga a tautolu oti ke fakaaoga ha tautolu a tau lotomatala, tau malolo, mo e tau mao ke he puhala foaki noa. Kua ole mai e tau Tohiaga Tapu: “Kia tuku atu e mutolu ha mutolu a tau tino ke he Atua, ko e poa moui, mo e tapu, ke talia mo e fiafia, ko e fekafekauaga haia.” (Roma 12:1) Ko e kumikumiaga fakatumau hau ni ki a koe ka lagomatai a koe ke kitia kua fakakite katoatoa e koe e aga pihia, ka maeke he tau tutuaga fakatagata hau.
2 He Tutuli e Iloilo he Tohi Tapu: Kua fakatoka kehe nakai e koe e magaaho ma e totouaga mo e fakaakoaga fakatagata hau he Tohi Tapu ke he tau magaaho oti? Taofi mau nakai a koe ke he setulu ia? Ko e puhala nakai a ia hau ke tauteute fakamitaki ma e tau feleveiaaga he fakapotopotoaga? Kaeke ko e ulupule magafaoa a koe, taute tumau nakai e koe e fakaakoaga Tohi Tapu mo e magafaoa hau? Ko e taute e tau mena nei kua lata ke fakaaoga e magaaho ne mole noa he kitekite televisoni po ke, he komopiuta po ke falu tutuliaga foki. Pete ia, ko e foaki noa tote nukua taute, he iloa ko e magaaho ne fakaaoga ke he Kupu he Atua ka lagomatai ke takitaki a koe ke he moui tukulagi!—Ioane 17:3.
3 Ko e Fakamahaniaga he Fanau Hau: Ko e magaaho mitaki lahi ke kamata fakaako e puhala he foaki noa he vaha tama. Fakaako e fanau hau ko e mena ha ha i ai e magaaho ke fefeua, kua fai magaaho foki ma e gahua mo e tau matagahua fakateokarasi. (Efeso 6:4) Age falu gahua aoga he kaina ke taute e lautolu. Taute e setulu fakatumau ke gahua fakalataha mo lautolu ke he fekafekauaga. Fakamalolo e fakaakoaga hau aki e fakafifitakiaga mitaki ni hau.
4 He Tau Matagahua he Fakapotopotoaga: Kua malolo e fakapotopotoaga ka taute he tau tagata oti i loto e tau foaki fakamakai noa ke fakakatoatoa e tau mena kua aoga ma e tau tagata oti. (Hepe. 13:16) Maeke nakai ia koe ke fakalahi e magaaho ke he gahua fakamatala he Kautu mo e taute tutaki? Maeke nakai ia koe ke lagomatai a lautolu kua gagao po ke momotua, liga ke lagomatai a lautolu ke uta ke he tau feleveiaaga?
5 Ato taute e foaki noa mua ue atu he hana moui tino tagata, ne tomatoma e Iesu hana tau tutaki ke hagaaki e onoonoaga ha lautolu ke he tau mena he Kautu, ti mumui mai e tau mena oti ne toe he moui. (Mata. 6:33) Tutuli e aga he foaki noa ka ta mai ki a tautolu e fiafia lahi he fakatumau a tautolu ke fekafekau ki a Iehova mo e olioli.