Aperila—Ko e Magaaho ke Fakamakutu ke he Tau Gahua Mitaki!
1 He tatatata mai e afa ke he matakavi puke he tau tagata, kua fakamafiti lahi ke hataki e tau tagata ke he hagahaga kelea ka hoko mai. He tata mai e afa, kua malolo lahi e tau hatakiaga. Ko e ha? Ha kua hagahaga kelea e tau momoui! Liga fai tagata ne nakala logona e tau hatakiaga fakamua. Liga logona he falu ka e nakai lutulutu. Kua pihia foki ni e hatakiaga faka-Atua ne poaki ki a tautolu ke fakapuloa ato hoko mai e “hiohio” he ita tututonu he Atua ke puhi kehe e tau mena oti he lalolagi kelea nei. (Fakatai 10:25) Kua hagahaga kelea tuai e tau momoui tukulagi he tau piliona tagata! Kua lata ni ke fakapuloa e hatakiaga. Kua lata ia tautolu ke “fakamakutu ke he tau gahua mitaki.”—Tito 2:11-14.
2 He tau hogofulu tau, kua omoi e tau tagata ha Iehova ke taute e magahala Fakamanatuaga mo magaaho pauaki ke fakamakutu ke he fekafekauaga. He vaha tau tupu he 1939, ne foaki mai he Informant, ko e Ha Tautolu a Fekafekauaga he Kautu he mogo fakamua, e fakamafanaaga nei: “Ha ko e vaha tau tupu i mua, mo e mitaki e matagi, kua amanaki a tautolu ke fakalahi ua he tau tagata fakailoa [he fakapotopotoaga] e tau tula he fonua, mo e malikiti hake e tau tula he tau paionia. Kua lima e Aho Tapu ia Aperila. Kua lima foki e Aho Faiumu. Kia eke e tau Aho Faiumu mo e tau Aho Tapu oti he magahala a Aperila . . . mo magaaho ke fakamatala pauaki.” Ko e foliaga ne mua a ia ne fakatoka ma e tau matakainaga he tau tau 60 kua mole! He tau nei, tuga he 1939, kua lima foki e matahiku fahitapu he mahina a Aperila. Ko e heigoa e tau pulega hau ma e mahina nei? Ko e heigoa ne fakamailoga e koe he kalena hau ma Aperila 2000? Pulega ke fakalataha fakamitaki ke he tau gahua mitaki mo e falu tagata foki ha Iehova he magahala he mahina pauaki nei he gahua fakaagaga fakamafiti.
3 Amaamanakiaga ha Tautolu ke Fakakatoatoa: Ko e aho ne mua e aoga he tau 2000 kua taute he mahina nei. Ia Aperila 19, ko e fakamanatuaga a ia he matulei ha Iesu. Kia taute e tautolu e gahua pauaki ke uiina e tau tagata tokologa ke he Fakamanatuaga. Tuga ne fakakite he mahina kua mole, kia tohi hifo a lautolu oti ka liga o mai ke he Fakamanatuaga mo e liu kikite ki ai neke fai tagata ka tiaki. Kua lata ke putoia ki a lautolu ne uiina ko e tau tagata fakailoa nakai hakahakau, tau tagata fakaako Tohi Tapu, ko lautolu ne fa liu ahiahi ki ai, ko lautolu ne fakaako fakamua, tau tagata gahua auloa, tau kapitiga aoga, tau katofia, tau magafaoa, mo e falu a tagata iloa foki. Kua fai puhala peleoafi nakai a lautolu ia? Ka ai fai, maeke nakai a koe ke lagomatai? He po he Fakamanatuaga, kua ha ha ia tautolu e fiafia ke taute a lautolu oti ia ne o mai ke logona hifo e mafanatia. He mole e Fakamanatuaga, kua lata ia tautolu ke matutaki ke lagomatai fakaagaga a lautolu ia.
4 Ke “fakamakutu ke he tau gahua mitaki” he tau aho fakamua mo e he mole e Fakamanatuaga, ko e puhala mitaki a ia ke fakakite ki a Iehova ha tautolu a loto fakaaue moli ma e tau mena oti ne taute e ia ma tautolu. Ko e matagi mitaki he laulahi he tau matakavi, ka taute tokologa ia tautolu ke fakatolomaki ha tautolu a tau laliaga ke he gahua fakaevagelia. Kaeke hane paionia fakaku a koe, to manako a koe ke fakamole 50 e tula po ke lahi atu ke he fekafekauaga. (Mata. 5:37) Kia muitua tumau ke he setulu ne fakatoka e koe he kamataaga he mahina. (Fakama. 3:1; 1 Kori. 14:40) Lata ia tautolu oti ne toe ke fai magaaho ke foaki e lagomatai ke he tau paionia oti, he fakamalolo a lautolu mo e he gahua auloa mo lautolu he fonua. (Fakatatai 2 Patu. 10:15, 16.) Kaeke ke to e tautolu e tau tega loga he magahala a Aperila, ti lata ia tautolu ke falanaki ke moua e fiafia lahi mo e monuina mai ia Iehova. (Mala. 3:10) Liga ko e lakaaga anei ke fakatumau ke paionia fakaku po ke paionia tumau. Kia matutaki ke he tau mahina i mua e malolo fakaagaga ne moua e tautolu ia Aperila he fakatumau a tautolu mo tau tagata fakailoa tumau he Kautu.
5 Nakai taumaleku, ko e tau afe tagata ha Iehova he mahina nei to kamata e tau fakaako Tohi Tapu loga. Manako nakai a koe ke kamata taha fakaakoaga? Liogi fakatonu ke moua e fakaakoaga, ti gahua fakatatau atu ke he tau liogi hau. Mauokafua ai a koe to talia e Iehova hau a tau olelalo ma e lagomatai ke kumi taha tagata loto fakamoli ke fakaako.—1 Ioa. 3:22.
6 Hanei e fakafeleveiaaga ma e fonua ne kua mitaki he fakaaoga ke kamata aki e tau fakatutalaaga. Kia kamata a koe he huhu age: “Manatu kia a koe ko e tau favale oti he tau aoga ko e fua he tau gahua he tau temoni, po kua tupu mai he kaumahala he tau matua ke fakaako?” Toka ke tali. Kaeke tali e tagata ko e “tau gahua he tau temoni,” totou e Fakakiteaga 12:9, 12, mo e fakakite e puhala ne fakatolomaki he Tiapolo e matematekelea he lalolagi. Ti fufuke e porosua Manako ke he fakaakoaga 4, mo e huhu kua tuaha nakai a ia na hau la i fe e Tiapolo. Matutaki e totou mo e tutala ke he tau paratafa fakamua ne ua. Kaeke fifili he tagata ko e “kaumahala he tau matua ke fakaako” ati ha ha ai e favale he tau loto aoga, totou 2 Timoteo 3:1-3 mo e fakakite e tau mahani ne lafi ke he lekua nei. Ti fufuke e porosua Manako ke he fakaakoaga 8, totou e paratafa 5, ti matutaki e fakatutalaaga. Kaeke taute e koe taha fakaholoaga ke liu ahi atu, liga kua haia a koe he puhala ke kamata e fakaakoaga Tohi Tapu tumau mo e tagata ia. He magahala he tau ahiahi, huhu age kua iloa nakai e ia taha tagata kua liga manako ke logona e mena ne fa e fakaako e ia.
7 Taha puhala ke “fakamakutu ke he tau gahua mitaki” he magahala ia Aperila ko e fakalataha ke he tau puhala kehekehe he fakamatalaaga. Kua manamanatu nakai a koe ke fakamatala he paaka po ke he tau paaka motoka? He tuaga pasi po ke he tuaga tuleni? Po kua manako nakai a koe ke fakamatala he telefoni, he puhala tu, po ke he tau fahi pisinisi? Ko e ha he taute fakamoli e tau manatu ia he mahina nei? To lagomatai e Iehova a koe ke moua e malolo kua lata. (Gahua 4:31; 1 Tesa. 2:2e) Liga lata ia koe ke taute taha fakamauaga ke gahua mo e taha paionia po ke taha tagata fakailoa ne iloa lahi e tau puhala ia he fekafekauaga.
8 Ko e ha tagata ni ne fakamakai ke fakatolomaki hana gahua he fekafekauaga to manako ke fakalataha ke he fakamatalaaga he ha magaaho noa. Kua lata ni ke fakatutala fakakapitiga atu ke he tagata. Talahau taha tala ke he mena fa mahani, liga he fakaaoga e fakafeleveiaaga ne fakakite he paratafa 6. Ukufakina ke fakaaoga fakamitaki e tau magaaho ikiiki neke liga mole noa. Na nakai tiaki e tautolu e tama seleni tote ha kua nakai katoa e tala. Ko e ha mogoia he fakaaoga fakamitaki e lima minuti, hogofulu minuti, po ke kuata tula ke fakamatala he magaaho noa?
9 Magaaho ke Liu Manamanatu: Liu manamanatu ke he tau fakaakoaga malolo ne fakakite he taute-tala he Fonoaga he Fahimotu “Kupu Fakaperofeta he Atua” he tau kua mole. Ko e taute-tala, ne mataulu Kuku Mau e Tufaaga Fakaagaga ha Tautolu, ne taute a tautolu ke manamanatu fakaeneene ke he fekehekeheaki he vahaloto ha Iakopo mo Esau. Ne talahau e Esau ke tuga a Iakopo, kua fiafia foki a ia ke he tau mena fakaagaga, ka kua nakai fakakite pihia he tau gahua hana. (Kene. 25:29-34) Ko e hatakiaga malolo ha ia ma tautolu! Ke tuga a Iakopo, kia mautali a tautolu ke ukufeke, po ke taufetului foki, ke moua e monuina ha Iehova. (Kene. 32:24-29) Ko e ha he fakaaoga a Aperila mo e tau mahina oti i mua ke fakafou e makutu ha tautolu, mo e nakai uta fakateaga e tufaaga fakaagaga homo ue atu ha tautolu?
10 “Kua tata mai e aho lahi a Iehova, kua tata mai ni, kua fakaave mai ni.” (Sefa. 1:14) Kua lata lahi ke fakapuloa e tala mitaki he Kautu. Kua hagahaga kelea e tau momoui! Kia eke e mahina nei ke mua atu e monuina ma e tau tagata oti ha Iehova he kaufakalataha a tautolu ke fakakite kua “fakamakutu [a tautolu] ke he tau gahua mitaki.”
[Puha he lau 4]
Tau Fakamanatu ma e Fakamanatuaga
Kua taute e Fakamanatuaga he tau nei he Aho Lotu, Aperila 19. Kia matamua e tau motua ke he tau mena na ne mui mai:
◼ He fakatoka e magaaho ma e feleveiaaga, aua tufa e tau fakamailoga ato mole e toaga la.
◼ Kua lata ke fakailoa ke he tau tagata oti, pihia foki ke he tagata lauga, e tula mo e matakavi tonu he fakamanatuaga.
◼ Kia fakatoka tuai taha falaoa mo e uaina pauaki.—Kikite e Fepuari 15, 1985, Watchtower, lau 19.
◼ Kia ta mai e tau kapiniu kai, tau kalase inu, ko e laulau mo e ie ne kua gali mo e fakatokatoka tuai.
◼ Kua lata ke fakamea fakamua e Fale he Kautu po ke taha fale he feleveiaaga to hoko e magaaho.
◼ Kua lata ke fifili mo e fakatonu e tau tagata leveki mo e tau fekafekau ke he tau matagahua ha lautolu mo e ke he fakaholoaga kua lata.
◼ Kua lata ke taute taha fakaholoaga ma e ha tagata fakauku ne fakaameame mo e nakai fahia ke hoko mai.
◼ Ka fai fakapotopotoaga foki ne setulu ke fakaaoga e Fale he Kautu ia ni, lata he tau fakapotopotoaga ke fai fakatokatokaaga mitaki ke kalo mai he mapitapita i loto he fale, he hala o hui i fafo, mo e he paaka motoka.