“Kia Kamatamata”—Fefe?
1 He tupu ki mua e fakatokatokaaga a Iehova, kua lata lahi ma e tau matakainaga tane ne lotomatala ke ekegahua ko e tau fekafekau lagomatai. Tokologa e tau matakainaga ne aila fifili, fakalataha mo e tau fuata, kua manako lahi ke gahua i loto he fakapotopotoaga. He kotofa ki a lautolu e tau gahua loga, ne logona e lautolu e aoga mo e fiafia he foliaga. Ko e tolomaki ki mua ha lautolu ne falanaki ke he ha lautolu a “kamatamata.” (1 Timo. 3:10) Kua maeke fefe e mena nei?
2 Ko e Gahua he tau Motua: Ko e vala he fuafuaaga he matakainaga tane ha ko e tau kotofaaga he Tohi Tapu ma e tau fekafekau lagomatai ia 1 Timoteo 3:8-13, to kamatamata he tau motua e lataaga he matakainaga tane ke hahamo e tau matagahua. To kotofa e lautolu a ia ke lagomatai mo e tau fekau ne tutaki ke he tufatufaaga he tau mekasini mo e tau tohi, tauteaga he tau maikorofoni, levekiaga he Fale he Kautu, mo e tau mena pihia. To kitekite he tau motua e tau gahua hana mo e tokaga hana ke he tau kotofaaga. To onoono a lautolu ke he tau mahani falanakiaga hana, hoko fakamua tumau, makutu, fakatokolalo, aga fakamakai, po kua fiafia ke fakalataha auloa mo e falu. (Flp 2:20) Gali mitaki nakai e fakafifitakiaga hana he tapulu mo e tauteuteaga? Na manamanatu nakai a ia ke he hana matagahua? Manako a lautolu ke kitia “he tau mahani mitaki hana tau gahua mo e loto holoilalo ha i ai e iloilo.” (Iako. 3:13) Moli kia kua foli atu a ia ke eke mo lagomataiaga he fakapotopotoaga? Moli kia kua omaoma a ia ke he poaki a Iesu ke “eke e tau motu oti kana mo tutaki” he fakalataha fakamakutu ke he gahua he fekafekauaga?—Mata. 28:19; kikite e Sepetema 1, 1990, Kolo Toko, lau 18-28.
3 Pete kua nakai fakakaupa he Tohi Tapu e tau he tagata ke kotofa mo fekafekau lagomatai, kua pehe mai he tau matakainaga pihia ko ‘lautolu he feua he tiakono.’ Kua nakai amanaki a tautolu ki a lautolu ne fuata mui po ke vahaloto e fuata, mua atu ha kua totoku mai ko e ligaliga ni kua fai hoana mo e tau fanau. (1 Timo. 3:12, 13) Kua nakai lata e tau tagata tane pihia ke omaoma ke he “tau manako lahi he tau fuata” ka e lata ke fakakite e mahani loto matala, mo e ha ha i ai e tuaga mitaki mo e manamanatuaga mea ki mua he Atua mo e tau tagata.—2 Timo. 2:22.
4 Pete kua aoga lahi e lotomatala pauaki, ko e mahani mo e aga he tagata e mena ne manako moli. Manako kia mo e fakatokolalo e matakainaga ke fakaheke e Atua mo eke ke fekafekau ke he hana tau matakainaga? Kaeke pihia, to fakamonuina e Iehova e tau laliaga hana ke tolomaki ki mua i loto he fakapotopotoaga.