Puha Huhu

◼ Ko hai ne lata ke liogi he tau fakapotopotoaga?

Ke liogi he tau fakapotopotoaga ko e mena mua atu he tapuakiaga ha tautolu. Ke hukui e falu ki mua a Iehova ko e kotofaaga homo ue atu mo e matagahua mamafa. Ha ko e aogaaga hana, kua lata he tau motua ke fifili fakamitaki e matakainaga tane ne lata ke taute e liogi he tau feleveiaaga. Tau matakainaga tane papatiso ne hukui e fakapotopotoaga kua lata mo tau fekafekau Kerisiano motua ne talahaua ko e tau fakafifitakiaga mitaki mo e fakalilifu ki ai e fakapotopotoaga. Kua lata he fakakite he tau liogi ha lautolu e fakahekeaga mo e fakalilifu he fakafetui mo Iehova ko e Atua. Ko e tala “Liogi Ki Mua he Falu Mo e Loto Fakatokolalo” he fufuta The Watchtower, Me 15, 1986, ne fakatoka e tau matapatu fakaakoaga aoga ke lagomatai pauaki a lautolu ne liogi ki mua he fakapotopotoaga.

To nakai fakaaoga he tau motua e matakainaga ke taute e liogi ne kua iloa ke fa mahalohalo noa po ke mahani fefeua. Ko e matakainaga fa mahani ita po kua hagahaga ke fakaaoga e tau magaaho liogi ki mua he tau tagata ke fakakite hana totoko ka nakai kotofa. (1 Timo. 2:8) Pete ni kua papatiso e matakainaga tane fuata, kua lata agaia ni he tau motua ke fifili po kua ha ha nakai ia ia e mahani motua fakaagaga ke liogi ki mua he fakapotopotoaga.​—Gahua 16:1, 2.

He falu magaaho ka fakapotopoto ke he gahua he fekafekauaga, kua lata ma e taha matakainaga fifine ne papatiso ke taute e liogi kaeke nakai fai matakainaga tane ne kotofa ke hukui e matakau. Lata ia ia ke ufiufi hana ulu mo e taha mena ne lata. Ka ligaliga ni kua nakai maeke ha matakainaga tane ne kotofa ke finatu he falu magaaho gahua he fekafekauaga, kia lata he tau motua ke kotofa e matakainaga fifine ne lata ke takitaki ai.

Fa mahani e tagata nofoa he Feleveiaaga Papiliki ke hafagi aki e liogi. Ka e falu fakapotopotoaga, ka tokologa e tau matakainaga tane ne ata, ko e tagata kehe mai he matakainaga ne hafagi e feleveiaaga po ko ia ne kotofa ai e vala fakahiku ka maeke ke ui ke hafagi po ke fakaoti aki e liogi. Ko e mena ia, ko e matakainaga ka ui ke liogi he fakapotopotoaga kua lata a ia ke iloa fakamua ke tauteute tuai e mena hana ke liogi. Ati maeke ia ia ke liogi fakamakutu, mo e maamaaga ne lata mo e feleveiaaga ma e magaaho ia.

Tau liogi pihia kua nakai lata ke loa. Ka taute he matakainaga e liogi ki mua he tau tagata, fa mahani ia ia ke tu hake ke logona mitaki e tau kupu, ti vagahau fakaleo lata, mo e fakaleo mahino mitaki. Ko e mena nei to maeke a lautolu katoa ne fakapotopoto ke logona e liogi ti talahau he fakaotiaga mo e loto fakaheke “Amene.”​—1 Nofo. 16:36; 1 Kori. 14:16.