Fakaaoga e tau Tala Fou ke Fakaohooho e Manatuaga
1 Loto nakai a koe ke puke noa hau a koloa he tau manatu mitaki ke fakafou tumau e fekafekauaga hau mo e fakaohooho e tau manatu he tau tagata ke he fekau he Tohi Tapu? Ati fakaaoga e tau mena tutupu mai he lalolagi katoa mo e he maaga hau ke kamata e tau fakatutalaaga. Futiaki mai e tau mena tutupu he taukalakala kaina mo e he motu po ke mai he lalolagi katoa. Ha ko e tau mena mole atu anei. (1 Kori. 7:31) Kia kikite e tau fakataiaga na.
2 Tau lekua fakatupe mo e tau mena totogi he moui ne fakaatukehe lahi e tau tagata. Haia, kia pehe age:
◼ “Logona nakai he nusi kua liu holo hake e totogi [talahau e mena]?” Po ke tutala a koe hagaao ke he tau tagata tokologa ne fakaokioki mai he tau gahua he taha fale gahua lahi, kaeke kua pihia. Kikite ni e koe e puhala mitaki ke fakamatutaki e tutalaaga, ti huhu age “Fa manamanatu nakai kua ha ne uka lahi ke leveki e moui?” po ke “To kaikavakava tumau ni kia a tautolu?”
3 Tau fakailoaaga he tau favaleaga, tuga e matematekelea ke he tau magafaoa po ke ki a lautolu he tau fuata aoga, e taha fakatutalaaga foki. Huhu age e koe:
◼ “Totou nakai e koe he nusipepa [talahau e matematekelea ne tupu he maga]?” Ati huhu “Manatu la, ko e heigoa ne fakalagalaga e favaleaga mahaki he lalolagi?” po ke “To hohoko atu nakai a tautolu ke he magaaho ka nonofo haohao mitaki?”
4 Tau nusi he tau fakapukeaga kelea, tau mafuike, mo e tau felakutaki ke he tau matakavi kehekehe he lalolagi kua maeke foki ke fakaohooho e manatuaga. Ke fakatai, huhu atu e koe:
◼ “Ko e Atua kia ne taute e [talahau e mena fakalutukia]?” Po ke matutaki ke he taha felakutaki fou ti pehe age: “Ha kua tokologa ne loto lahi ma e mafola, ko e ha ne uka lahi ai ke moua?”
5 Kia mataala ke he tau tala fou ke kamata aki e tutalaaga hau. Ha i ai e tau puhala ke fakaaoga he “Tau Tala Fou,” he lau 10-11, he tohi Reasoning. Ka e, aua laga ke he ha fahi fakapolitika po ke tau matematekelea he maaga. Ka e, fakatonu atu ke he Tohi Tapu mo e Kautu he Atua ko e puhala hokoia ni ke tali aki e tau matematekelea he tau tagata.