Fakamatala he Lalolagi Hikihikifano
1 Ko e mafiti ha ia he tau mena ke hikihiki! Mo e amanaki ni ti eke e mena tupu pauaki, e hagahagakelea fakatupe, e mavehevehe fakapolitika, po ke matematekelea fakatapakupaku lahi mo matakupu fakatutala. Ka e, mafiti pihia foki, ne fuluhi kehe e onoonoaga he tau tagata ke he falu mena foki. (Gahua 17:21; 1 Kori. 7:31) He lalolagi hikihikifano nei, maeke fefe ia tautolu ke moua e fanogonogo he tau tagata ke maeke ke talahau e fekau he Kautu ki a lautolu?
2 Mailoga e Tau Tupetupe he Falu: Taha puhala ke maeke ke moua e onoonoaga he tau tagata he fakatutala ke he tau mena tutupu fou nei. He fakamalolo e tau tagata fanogonogo hana ke manatu fakahokulo ke he tuaga ha lautolu mo e Atua, he taha magaaho ne tutala a Iesu ke he tau matematekelea nakai la leva nei ne ha ha he tau manamanatuaga ha lautolu. (Luka 13:1-5) He manatu pihia, ka talahau e tala mitaki, kua mitaki ke fakaaoga e tautolu e tau mena tutupu fou po ke tau matakupu he maaga ia nukua aamotia e tau momoui ha lautolu. Pete ia, ka tutala ke he tau mena pihia, kua lata ia tautolu ke mataala ke nakai tu fahi fakapolitika po ke tau kaufakalatahaaga.—Ioane 17:16.
3 Iloa fefe e tautolu ko e heigoa he tau tagata kua manamanatu mogonei ki ai? Liga ko e puhala mitaki lahi ko e huhu ti fanogonogo ki ai. (Mata. 12:34) Ko e fiafia ke he tau tagata ka omoi a tautolu ke mailoga e onoonoaga he falu mo e huhu fakailoilo atu foki. Ko e talahauaga fakaofo he tagata he kaina ka fakakite e manatu ne ha ha he tokologa ti maeke mogoia ke hafagi e puhala ke fakamatala.
4 Tauteute e Fakataitaiaga: He tauteute ma e fekafekauaga he fonua he lalolagi hikihikifano, maeke ia tautolu ke fakaaoga e tohi Reasoning. Ko e tau manatu lagomatai ke he puhala ke fakahu mai e tau mena tutupu ke he fakataitaiaga ha tautolu kua tohi he lau 10-11, i lalo hifo he “Crime/Safety” mo e “Current Events.” Maeke foki ke moua e vala tala pihia he Ha Tautolu a Fekafekauaga he Kautu ia Sepetema 2000, lau 4. Ka tauteute e fakataitaiaga hau, kia manatu ke fakaaoga e kupu tohi kua latatonu.
5 He tokaloto e tautolu e tau manamanatu hikihikifano ha lautolu he matakavi ha tautolu, kua lata ke hikihiki foki e fakataitaiaga ha tautolu he tala mitaki. He puhala ia, tutala a tautolu ke he tau tagata hagaao ke he tau mena kua lauia hokulo e tau loto ha lautolu. Ti ko e mena ia, lagomatai e tautolu e tokologa atu foki ke o mai ke iloa a Ia kua nakai hiki hana tau mahani mo e tau tuaga.—Iako. 1:17.