Makai Kia a Koe ke Hikihiki?
1. Ha kua hikihiki e lalolagi, ko e heigoa e tau hikihikiaga ha tautolu kua lata ke taute?
1 He 1 Korinito 7:31, ne fakatatai he Tohi Tapu e lalolagi ke he tuaga kua hikihiki tumau ti pihia foki e tau tagata i ai. Ha ko e tau hikihikiaga he lalolagi, kua lata ia tautolu ke taute e tau hikihikiaga ke he tau puhala fakamatala, ke he fakaholoaga, mo e tau talahauaga ha tautolu. Kua makai kia a koe ke hikihiki?
2. Ko e ha kua lata ia tautolu ke hikihiki ke fakatatau mo e fakatokatokaaga?
2 Haau a Tau Puhala Fakamatala: Ko e fakapotopotoaga Kerisiano kua maeke tumau ke hikihiki. He magaaho fakamua ne fakafano atu e Iesu e tau tutaki haana, ne tala age a ia ki a lautolu ke nakai uta ha mena kai po ke tupe he tau kato tupe ha lautolu. (Mata. 10:9, 10) Ka kua hiki e ia he mogo fakamui e tau hatakiaga ia ha ko e mena to favale he vahā i mua ke he tau tutaki haana mo e to fakalaulahi atu e gahua fakamatala ke he falu matakavi. (Luka 22:36) He senetenari kua mole, ne fakaaoga he fakatokatokaaga ha Iehova e tau puhala kehekehe ke fakamatala—ma e fakatai, ko e tau lapa fakailoa, letiō, mo e tau motoka fai leo taogo—ke felauaki ni mo e manako he magahala. He vahā nei, ha kua ai nonofo tumau e tau tagata he kaina he loga e matakavi, kua lahi e fakamalolōaga ke lafi ke he ha tautolu a gahua he taha fale ke he taha fale e fakamatala he tau toloaga mo e magaaho noa. Kua fakamalolō foki a tautolu ke o atu he taha fale ke he taha fale he tau magaaho afiafi kaeke kua gahua e tau tagata he aho. He hikihiki e puhala kua holo ai e kariota ha Iehova, kua fakatatau nakai a koe ki ai?—Eseki. 1:20, 21.
3. Lagomatai fēfē he maeke ia tautolu ke hikihiki ke lauia mitaki he fonua ha tautolu?
3 Haau a Talahauaga: Ko e heigoa he tau tagata he matakavi haau kua tupetupe ki ai he mogonei? Ko e tuaga fakatupe? Magafaoa? Felakutaki? Kua aoga ke mataala ke he tau lekua he mogonei mo e tau tuaga kua fa mahani he matakavi ha tautolu ke maeke ia tautolu ke tauteute tuai e talahauaga kua lata. (1 Kori. 9:20-23) Ka fakakite he tau tagata he kaina e manatu hokulo ha lautolu, he nakai ni talahau e tali fa mahani ti matutaki ke he talahauaga ha tautolu kua fitā e tauteute, kua mitaki lahi ke hikihiki ai ke felauaki mo e tau tupetupe ha lautolu.
4. Ko e ha kua lata ia tautolu ke mafiti ke hikihiki?
4 To nakai leva ti fakaoti ai e tuaga fakahiku he lalolagi nei, mo e kamata ai e matematekelea lahi. “Kua gahoa e tau aho kua toe.” (1 Kori. 7:29) Ko e aoga ha ia mogoia ke hikihiki mo e ke nakai fakamule, ke maeke ia tautolu ke lahi e mena ka taute he magaaho kū ne toe!