‘Eke e Mena Nai ha ko e Tala Mitaki’
1. Ko e heigoa he tagata fakamatala he Kautu kua makai ke taute ma e falu, ti ko e ha?
1 Ne logona hifo he aposetolo ko Paulo ko e kotofaaga fakatagata ke fakamatala e tala mitaki ke he falu. (1 Kori. 9:16, 19, 23) Pihia foki he manamanatu a tautolu ke he mitaki tukulagi he tau tagata ka omoomoi a tautolu ke eketaha ke fakamatala e tala mitaki ki a lautolu.
2. Ka fakamatala, ko e heigoa e tau hikiaga kua makai a tautolu ke taute, ti ko e ha?
2 Fakamatala he Matakavi mo e Magaaho ka Fai Tagata: Ne liti he tagata takafaga ika mitaki e afo po ke kupega haana, nakai ke he matakavi mo e magaaho ne hagahaga mitaki ki a ia, ka ke he matakavi mo e magaaho ka liga fai ika. Ko tautolu foki ko e tau “takafaga ke he tau tagata,” kua liga lata ke taute e falu hikiaga fakatagata ke moua ai e tau tagata he fonua ti olioli katoa e kotofaaga he moua e “tau ika kehekehe oti.” (Mata. 4:19; 13:47) Maeke nakai ia tautolu ke fakaaoga e tau magaaho afiafi ke moua e tau tagata he tau kaina po ke magaaho pogipogi ke fakamatala he puhalatū? Ko e foliaga ha Paulo ke ‘talahau fakatonu atu e tala mitaki,’ ti fakaaoga fakamitaki e ia e tau magaaho kua lata ke taute pihia.—Gahua 17:17; 20:20, 24.
3, 4. He ha ha he fekafekauaga, ko e heigoa e tau puhala ka hikihiki e tautolu, ti ko e heigoa e tau fua?
3 Hikihiki e Fakafeleveia Haau ke Felauaki: Kua hiki tumau he tau tagata takafaga ika e tau puhala ha lautolu ke moua e tau ika pauaki. Maeke fēfē ia tautolu ke foaki e tala mitaki ke he Kautu he puhala omoomoi ke he tau tagata he fonua? Lata ia tautolu ke fakailoilo he talahau e matakupu ne tupetupe e tau tagata tokologa ti fanogonogo fakamitaki ke he tau manatu ha lautolu hagaao ke he matakupu ia. (Iako. 1:19) Liga hūhū e tautolu e hūhū ka fakakite e manatu ha lautolu. (Fakatai 20:5) Ke he puhala nei maeke ia tautolu ke hikihiki e fakafeleveia ha tautolu ke he tala mitaki ke he puhala kua lauia e tau momoui ni ha lautolu. Ne eke a Paulo “mo tau mena oti ke he tau tagata oti.” (1 Kori. 9:22) Kua aoga lahi e hikihiki ke hokotia ke he tau loto he tau tagata.
4 Ko e olioli ha ia ke fakamatala e “tala mitaki”! (Isaia 52:7) Kia eke e tautolu ‘e mena nai ha ko e vagahau mitaki’ ke maeke ke hokotia ke he tokologa.—1 Kori. 9:23.