Lata a Tautolu ke Aahi mo e Liu Aahi Foki
1 Ne talia fiafia nakai e koe e tala mitaki he magaaho fakamua ne fakamatala atu ki a koe? Ka nakai, ati liga fakaaue ni a koe kua liliu aahi atu tumau e Tau Fakamoli a Iehova ato talia e koe e fakaakoaga he Tohi Tapu. Kua tonu lahi ke tokaloto e mena ia ka gahua tumau a koe he fonua ne kotofa atu ki a koe.
2 Fa hikihiki tumau e tau momoui he tau tagata. Kua fehagai a lautolu mo e tau lekua po ke tau tuaga fou, fa logona e tau tutupuaga fakaofoofo ke he maaga po ke lalolagi, tau hikihikiaga fakatupe, po ke auhia he gagao po ke mate e taha he magafaoa. Tau mena pihia ne fa omoi a lautolu ke kumikumi e kakano he tau mena fakakono nei. Kua lata a tautolu ke loto matala ke he tau mena ne pehi hifo e tau manamanatu he tau tagata ti tali aki e fekau mafanatia.
3 Ko e Gahua Laveaki Anei: Manamanatu la ke he tau tagata laveaki ka to e mauku he matakavi. Pete ni kua gahoa e tau tagata momoui ne moua he kumikumiaga he falu, ne nakai fakaeto a lautolu po ke toka noa ha kua tokologa ne momoui he moua he tau matakainaga ne gahua auloa ke he taha fahi kehe. Ne nakala oti ia e gahua ha tautolu. He tau tau takitaha, kua afe e tau teau kua manako ke hao mai “he matematekelea lahi” ne moua.—Fakakite. 7:9, 14.
4 “Ha ko e mena fakamomoui a lautolu oti kana kua ui ke he higoa he Iki.” (Roma 10:13-15) Kua lata he tau kupu nei ke fakalagalaga kia tautolu oti takitaha e manako ke fakamalolo tumau e fakamatalaaga. Tali mai he kamataaga ne gahua e fonua ha tautolu, kua lalahi tai e tau fanau ti maeke anei ke manamanatu fakalahi ke he ha lautolu a tau vaha i mua mo e fakaaogaaga he moui. Ne nakai iloa e tautolu ko hai ka fanogonogo mai. (Fakama. 11:6) Tokologa ia lautolu ne totoko he tau mogo fakamua kua talia ai e kupu moli. Ko e gahua ha tautolu, nakai ke fakafili e tau tagata, ka e foaki age tumau ki a lautolu e puhala ke logona mo e fakahao mai he lalolagi tuai nai. Tuga ni e tau tutaki fakamua a Iesu, kua lata a tautolu ke “o atu” ke he tau tagata mo e lali ke fakalagalaga hake e fiafia ha lautolu ke he fekau he Kautu.—Mata. 10:6, 7.
5 Ha ko e mena kua fakata agaia a tautolu ke fakamatala kua fakakite mai ai e fakaalofa hohofi noa a Iehova. (2 Pete. 3:9) He fakata atu e tautolu e falu ke liu foki ti liu foki fanogonogo ke he fekau, kua fakamatalahi e tautolu e fakaalofa he Atua, mo e he puhala nei kua fakaheke e tautolu a ia.