“Kua Gahua Lagaloga e Fonua ha Mautolu!”
1 Fa manatu nakai a koe nukua gahua lagaloga tuai e fonua hau ti liga nakai toe ha tagata ne tuga e mamoe i ai? Liga kua pehe a koe: ‘Iloa tai e au e tau puhala ka tali e tau tagata. Ti, ke liu mo ha ki a lautolu kua nakai talia?’ Na moli kua loga e tau matakavi he fonua fa gahua lagaloga. Ka e, kua lata ke onoono mo e fakailoilo ke he mena nei, nakai ke fakalolelole. He ha ia? Mailoga la e tau kakano fa na i lalo.
2 Kua Tali e Tau Liogi ha Tautolu: Ne pehe a Iesu: “Kua loga e tau saito ke helehele, ka ko e tau tagata gahua, kua tokogahoa a lautolu; kia olelalo a mutolu ke he Iki hana e tau saito ke helehele, kia fekau atu e ia e falu ke gahua ke he hana tau saito ke helehele.” (Luka 10:2) Kua loga e tau tau ne ole e tautolu a Iehova ke foaki fakalahi mai e lagomatai. Anei, kua loga e tau matakavi ne ha ha i ai e tau ekegahua ne lata, ti kua gahua tumau e fonua ha tautolu. Nakai kia lata ia tautolu ke fakaaue ki a Iehova ha kua taui mai e tau liogi ha tautolu?
3 O Atu Tumau mo e Moua e Fua Mitaki: Pete ni kua gahua lagaloga e tau matakavi, ne talia agaia he tau tagata e tala he Kautu mo e tolo mai agaia ke iloa e kupu moli. Koenaia, kua lata ia tautolu ke o atu ti liliu atu ke kumi a lautolu ne ha ha i ai e loto fakamoli. (Isa 6:8-11) Tuga e tau tutaki i tuai ha Iesu, kia “o atu” tumau ke he tau tagata he tau matakavi fifili ma mutolu, mo e lali ke fakaohooho e tali ha lautolu ke he Kautu he Atua.—Mata. 10:6, 7.
4 I Potukala, ne loga e tau fakapotopotoaga kua o atu he tau fahitapu takitaha, ka e moua agaia e lautolu e tau tagata ne tuga e tau mamoe. Ha ha i ai e matakainaga fifine ne aga mitaki pauaki. Ne pehe a ia: “Na liogi fakamua a au ki a Iehova he tau pogipogi oti to finatu ke he fonua, ke lagomatai mai au ke moua e tau tagata kua talia ke fakaako e Tohi Tapu.” Taha e aho ne pulega a ia mo e falu he fale gahua hifi ulu ke fakaako ai. Ne fakahiku, taha maka e tagata ne finatu ke he fakaakoaga. Pehe e tagata ia: “Nakai talia e falu, ka e talia a au.” Ha i ai he mahina ia ne kamata e ia ua e fakaakoaga he Tohi Tapu hana ni. Nakai leva ti papatiso a ia, ti fakahiku ai ne fakaholo atu a ia ke he fekafekauaga paionia!
5 Maeke Agaia e Gahua: Tuga ni he talahau tuai e Iesu, kua maeke agaia e tala mitaki ke fakamatala. (Mata. 24:14) Mai ia he tau matakavi ne “nakai mafai a lautolu ke fanogonogo kia [tautolu],” kua fakalagalaga atu a lautolu he kakano he gahua fakamatala. Iloa e tautolu to fakatuli e tau teliga he falu po ke fetoko ke he kupu moli. Ka e, lata lahi mo lautolu ia e fakapuloaaga he magaaho ka hoko mai e fakafiliaga a Iehova.—Eseki. 2:4, 5; 3:7, 8, 19.
6 Aila Fakaoti e Gahua ha Tautolu: Nakai ha ha ia tautolu ke fifili e magaaho ke taofi e gahua fakamatala. Ko Iehova ni ne iloa tonu e magaaho kua lata ke fakaoti. Iloa e ia po ke fai agaia nakai ke aila talia e tala mitaki. He vaha nei, falu ne pehe nakai talia a lautolu, ka ko e tau mena tutupu fakalutukia ne fa hiki e tau momoui ha lautolu—oti mo e gahua, gagao kelea, mate a ia ne fakahelehele—ke fakamafoki mai a lautolu he taha magaaho kehe. Kakano he fili tagata po ke lavelave lahi ni ke fanogonogo, naia kua tokologa ne nakala logona mitaki e mena ne fakamatala atu e tautolu. Ka e ka liliu atu tumau mo e mata fiafia ati maeke ia lautolu ke fakateliga mai mo e fanogonogo.
7 Ko lautolu kua tutupu hake he tau tau fou e ne mole mo e moua foki ha lautolu a tau magafaoa ne manamanatu hifo fakalahi ke he tau momoui ha lautolu ti ati hake e tau huhu ne maeke ke tali mai ni he Kupu he Atua. Taha e matua afine ne uiina tokoua e Tau Fakamoli ke he kaina hana ti tala age: “He vaha ne tote agaia au, ai maama e au kua ha ne vega he matua fifine haku e Tau Fakamoli ti tala age nakai talia a ia, ha kua fiafia a lautolu ke tutala ke he Tohi Tapu. Ti manatu au kaeke lahi hake au, mo e faitane, ti fai kaina, ato uiina e au e Tau Fakamoli a Iehova ke o mai mo e fakamaama ki a au e Tohi Tapu.” Kua fiafia ha e Tau Fakamoli ne o atu ki a ia, ha ko e mena a na ne taute e ia.
8 Maeke Nakai ke Fakalaulahi e Gahua Hau? Nakai ko e tau tagata foki ne o atu a tautolu ki ai ne fa fakatauhele e gahua lagaloga he fonua. Falu magaaho, ka e ko tautolu ni. O atu kia a tautolu mo e tau manamanatu fakalolelole? Maeke he mena ia ke lauia e aga ha tautolu tuga ni mo e puhala vagahau mo e fofoga ha tautolu. Fakakite e aga fiafia mo e mata mitaki. Lali ke fakaaoga e puhala fou. Fiofio e tau puhala he tutalaaga hau, ti lali ke fakalaulahi atu. Ka e ha he fakakehekehe hau a tau huhu po ke fakaaoga e taha kupu Tohi kehe. Huhu ke he falu a matakainaga tane mo e fifine e tau puhala kua fakaaoga e lautolu ne olaola ke he fonua. Gahua mo e tau matakainaga kehekehe he fekafekauaga pihia foki mo e tau paionia, ti mailoga na lauia fefe e tau fekafekauaga ha lautolu.
9 Kua talia mo e fakamonuina e Iehova e fakamatalaaga he Kautu, mo e tau gahua ne taute e tautolu i ai ne fakamoli e fakaalofa ha tautolu ki a ia mo e tau katofia ha tautolu. (Mata. 22:37-39) Ati hahamo a e tautolu e gahua ha tautolu ke he fakaotiaga, ti aua fakalolelole ha kua gahua lagaloga ke he fonua.