“Kia Eke e Mutolu e Tau Mena Oti ha Mutolu mo e Fakaalofa”

¹ “Kua fiafia moli e tau tagata ha mutolu; he fakakite e lautolu a lautolu fakalataha mo e manamanatu mo e fakalilifu.” Ko e kitiaaga ia kua hau he fonoaga mo e tau tagata ahiahi he maaga i United States ne leveki taha he tau fonoaga fahimotu ha tautolu. Kua fakamalolo e tau loto ha tautolu ke moua e nava pihia ke he puhala kua fai mahani a tautolu he toloaga tagata. Kua fakakite he mena nei ki a tautolu oti ‘ke eke e tau mena oti ha tautolu mo e fakaalofa.’ (1 Kori. 16:14) He magaaho taha, ha ha i ai falu mena tupetupe ka nakai fakahako to fakakelea e higoa mitaki he tau tagata he Atua.

² Tau Lekua he Fakamau e Nonofoaga: Ne loga e motela ne gugu he tau kua mole ha kua lahi mahaki e numera ne fakahiku noa ke tiaki. Ko e ha e mena nei? Ne toka he falu tagata ua e motela ka e kaumahala ke fakafano atu e tupe ke fakamau aki e motela fakamua po ke tala age ki a lautolu kua nakai manako a lautolu ke he fakamauaga ia ha kua loto a lautolu ke he taha motela. Taha mena foki, ne toka he falu matakainaga loga e poko he motela, he manatu kua manamanatu atu a lautolu ke he falu kua o fakalataha mo lautolu. Ka ko e magaaho ne hohoko atu ne talia ni e lautolu taha e poko ti tiaki e falu ne toe. Ne pehe e tau motela ne lauia ai nakai la tupu ia ha mena pihia ke he tau tagata he Kolo Toko.

³ Kua fakatupu he mena nei e tau lekua mamahaki ma e tau motela mo e fakatokaaga he fonoaga ha tautolu. Ne toka he tau motela falu poko ma e tau tagata ha tautolu mo e manatu ai to puke oti, ka e he magaaho fakamui ne moua he magahala fonoaga kua loga e tau poko tokanoa. Ka tumau e lekua, to eke ai mo fai vahaloto mo e tau motela nei ka taute e tau fakatokaaga ma e tau fonoaga i mua. Ke fehola kehe mai he mena nei, kia taute e tau fakamauaga ke lata ni mo e tau poko motela kua molioli ke fakaaoga. Lafi ki ai, kia tuku e tupe fakamau ke lata ni mo e tau poko kua toka. Ko e taute pihia ka fakaata e poko ke lata mo lautolu ne o mai mule. He tokaloto e mena nei, kua fakafano nakai e tupe hau ke fakamau aki e motela ne kua toka e koe ke nofo ai?

⁴ Mahani Mitaki ke he Tau Tagata Oti Kana: Ko e tau aga mitaki mo e mahani fakafifitaki kua omoomoi he fakaalofa ki a Iehova mo e tau katofia ha tautolu. (Mata. 22:37-39; Iako. 3:13) Kua fakamafana he Tohi Tapu a tautolu ke fakaalofa mo e manamanatu ke he tau tagata oti kana. (Kala. 6:10) Kua aoga moli e matapatu fakaakoaga ia ka nonofo a tautolu he tau motela. Ko e aga nakai makai ke kaufakalataha kua fakakelea e aga ha tautolu, fakahagahaga kelea e fakatokaaga ha tautolu ke fakatote hifo e totogi, mo e ita ke he tau matakainaga ha tautolu. Ka fifili e motela ke nakai foaki e totogi tau latalata, ko e falu ka o atu ke he fonoaga he maaga ia ka liga lauia kelea, mua atu ka nakai fahia a lautolu ke totogi e tau he poko tauuka.

⁵ Ka fakamau tuai e poko mitaki mo e tiaki he magaaho fakamui, kua kakano e mena nei to toe e taha matakainaga he magaaho ka lali a ia ke taute e fakamauaga. Ko e mena ia kua loa ai hana hala ke fina atu ai po ke talia e tau nonofoaga ne tote e loto ki ai. Ko e fakaalofa po ke manamanatu kia a ia? Lahi fefe mogoia e mitaki ke fakakite e fakaalofa mo e taute e mitaki ke he falu he tokaloto e fakaalofa lahi ki a lautolu ka e nakai ko e ha tautolu!​—Mata. 7:12; Ioane 13:34, 35.

⁶ Kua makai a tautolu ke o atu ke he Fonoaga he Fahimotu “Tau Faiaoga he Kupu he Atua.” Kua taute oti nakai e koe e tau fakatokatokaaga hau, putoia e tau fakamauaga he motela mo e tau fakatokaaga he fenoga? Kia fakakite tumau he tau mahani ha tautolu he motela mo e fonoaga e kupu moli he tau loto ha tautolu mo e fakaalofa ha tautolu ma e Tufuga ha tautolu.