Kakano he Liliu Atu Tumau a Tautolu
1. Ko e heigoa e tau hūhū ne lagā mai hagaao ke he gahua fakamatala ha tautolu?
1 Ke he loga he tau matakavi, kua fa gahua tumau e fonua ha tautolu. Kua liliu atu tumau a tautolu ke he tau fale agaia ni, pete kua tala mai e tagata he kaina ki a tautolu kua nakai manako a ia. Ko e ha ati fakatumau a tautolu ke tutala ki a lautolu ne nakai fiafia he tau magaaho fakamua?
2. Ko e heigoa e matapatu kakano ne fakauka a tautolu he fekafekauaga?
2 Fakaalofa ki a Iehova mo e Tau Tagata: Ko e matapatu kakano ne fakauka a tautolu he fekafekauaga ha ko e fakaalofa ha tautolu ki a Iehova. Kua omoi he tau loto ha tautolu a tautolu ke fakatumau ke tala age ke he falu hagaao ke he Atua lahi ha tautolu. (Luka 6:45) Ko e fakaalofa ha tautolu ma Iehova kua omoi a tautolu ke omaoma ke he haana tau poakiaga mo e lagomatai e falu ke taute pihia foki. (Fakatai 27:11; 1 Ioa. 5:3) Ko e fakauka tua fakamooli ha tautolu ke he gahua nei kua nakai fakavē ke he tali he tau tagata. Pete kua favale ke he tau Kerisiano he senetenari fakamua, ne fakatumau a lautolu ke fakamatala mo e “nakai oki foki.” (Gahua 5:42) Ka nakai fanogonogo e tau tagata, ua fakaatā e mena nei ke fakalolelole aki a tautolu, kia tutū mauokafua a tautolu, he fakatātā e lahi he fakaalofa mo e fakamooli ha tautolu ki a Iehova.
3. Lagomatai fēfē he fakaalofa ke he tau tagata a tautolu ke fakatumau e fakamatala?
3 Kua fakauka foki a tautolu ha kua fakaalofa a tautolu ke he katofia. (Luka 10:27) Nakai finagalo a Iehova ke malaia taha. (2 Pete. 3:9) Pete ni he tau matakavi ne gahua tumau, kua moua agaia e tautolu a lautolu ne manako ke fekafekau ki a Iehova. Ma e fakatai, i Kuatelupe, ne 1 mai he 56 e tagata ne ko e taha he Tau Fakamoli a Iehova, ne 214 ne papatiso he tau kua mole. Ne teitei 20,000 ne o atu ke he Fakamanatuaga, kavi ke he 1 mai he 22 e tagata i Kuatelupe!
4. Ko e puhala fe ne hikihiki ai e tau matakavi?
4 Tau Hikiaga he Matakavi: Kua hikihiki tumau e matakavi ha tautolu. Ko e taha magaaho ka liliu atu a tautolu ke he kaina ne nakai fiafia he magaaho fakamua, kua feleveia mo e taha tagata kehe he magafaoa—liga ko ia ne nakaila logona ia e fekau ha tautolu—ka hafagi e gutuhala ti fanogonogo. Po ke liga moua e tautolu e tau tagata foou ne fiafia mooli kua hiki mai ke he fale. Ko e tau fanau ne totoko e tau matua kua lalahi ti toka e kaina. Ko lautolu pihia kua liga makai ke fanogonogo ke he fekau he Kautu.
5. Ko e heigoa ne liga fakatupu e falu ke talia fiafia?
5 Kua hikihiki foki e tau tagata. Ko e aposetolo ko Paulo ne “vagahau kelea fakamua, to favale, to fakakelea atu.” (1 Timo. 1:13) Pihia foki, tokologa hane fekafekau ki a Iehova he vahā nei ne nakai fiafia ke he kupu mooli he magaaho fakamua. Ko e falu ne hokotia ke totoko ke he tala mitaki he taha vahā. He hiki e tau tuaga he lalolagi, ko e falu tagata ne totoko po ko lautolu ne nakai talia kua liga omoomoi ai ke fanogonogo. Ko e falu kua liga talia fiafia he mole e matematekelea fakatagata, tuga e mate taha he magafaoa, oti e gahua, ko e lekua fakatupe, po ke lekua ke he malolō tino.
6. Ko e ha kua lata ia tautolu ke fakatumau ke fakamatala mo e fiafia?
6 Ko e fakatokaaga nei he lalolagi hane hifo fakahaga ke he fakaotiaga, ka e hane mafiti e gahua fakamatala mo e fakaako ha tautolu. (Isaia 60:22) Ko e mena ia, kia fakatumau a tautolu ke fakamatala fakamalolō mo e eketaha ke fakatumau e aga fiafia. Neke fanogonogo e taha tagata foki ka tutala a tautolu ki ai. Kua lata a tautolu ke fakatumau ke tutala! ‘Ha ko e mena ka eke e tautolu e mena ia ti fakamoui ai e tautolu a tautolu, katoa mo lautolu kua fanogonogo kia tautolu.’—1 Timo. 4:16.