Fakatumau He Ha ke Fakamatala?
1 Kua leva tigahau kia e taute he gahua fakamatala he Kautu he maaga hau? (Mata. 24:14) Kaeke ke pihia, liga logona e koe kua kaputia tuai e tau maaga takatakai he fakapotopotoaga. Ka fakamatala a koe, liga tokologa e tau tagata kua feleveia mo koe kua nakai manako ke he fekau he Kautu. Pihia foki, mailoga la e talahauaga hagaao ke he tau tutaki moli ha Iesu he lau 141 he tohi Isaiah’s Prophecy II: “He falu matakavi, ko e tau fua he fekafekauaga ha lautolu kua liga tote maka ka fakatatai ke he lahi he gahua mo e laliaga kua foaki ki ai. Ka e fakauka agaia a lautolu.” Ka ko e fakatumau he ha ke fakamatala?
2 Manatu a Ieremia: Ko e fakauka fakamoli ha tautolu he gahua fakamatala kua nakai lata ke falanaki ke he fanogonogo he tau tagata ki a tautolu po ke nakai. Ne fakamatala a Ieremia ke 40 e tau he matakavi taha mo e tokogahoa lahi foki a lautolu ne fanogonogo ki a ia mo e tokologa ne totoko ke he fekau hana. Ko e fakauka he ha a Ieremia? Ha kua taute e ia e gahua ne poaki age he Atua ki a ia ke taute mo e hana iloaaga ke he mena ka tupu he vaha anoiha ne fakalagalaga a ia ke fakatumau e fakamatala atu.—Iere. 1:17; 20:9.
3 Tatai ke he tuaga ha tautolu. Ne “poaki mai foki a [Iesu] kia [t]autolu ke fakamatala atu ke he tau tagata, mo e talahau fakatonu atu, ko ia ni kua kotofa he Atua ke eke mo fakafili ke he tau tagata momoui mo e tau tagata mamate.” (Gahua 10:42) Ko e fekau kua hahamo e tautolu ko e fakakiteaga he moui mo e mate ki a lautolu kua fakateliga ki ai. To fakafili e tau tagata ke he fakaveaga he ha lautolu a taliaaga ke he tala mitaki. Ha ko e mena ia, ko e matagahua ha tautolu ke taute fakatonu e mena ne poaki mai ki a tautolu ke taute. Ka matauka foki e tau tagata ke fanogonogo, kua foaki mai he mena nei e magaaho ki a tautolu ke fakakite e hokulo he fakaalofa ha tautolu ma lautolu mo e ha tautolu a fakamoli ki a Iehova he ukufeke ke taute e mena kua lata ia tautolu. Ka e lahi atu foki.
4 Aoga Ai ki a Tautolu: Ko e taute e finagalo he Atua, pete puhala tali mai he matakavi, kua foaki mai ki a tautolu e mafola he loto, makona, mo e fiafia lahi, ne nakai maeke ai ke moua he ha puhala taha. (Sala. 40:8) To moua he tau momoui ha tautolu e fai kakano mo e amaamanakiaga moli. Ko e lahi e gahua ha tautolu ke he fonua, kua lahi atu foki e hagaaki he tau loto mo e tau manamanatuaga ha tautolu ke he amaamanaki mo e olioli he moui ke he lalolagi fou he Atua. He takele mau ke he tau maveheaga nei he Tohi Tapu kua fakatupu ki mua ha tautolu a tuaga fakaagaga mo e fakamalolo e fakafetuiaga ha tautolu mo Iehova.
5 Pete ni e nakai kitia mafiti e tautolu e tau fua he ha tautolu a gahua fakamatala, kua liga to tuai e tega he kupu moli ke he loto he tagata ka gotogoto ai ke he magaaho ha Iehova. (Ioa 6:44; 1 Kori. 3:6) Nakai fai ia tautolu ka iloa ko e fiha ne toe ka o mai ke iloa e Kautu he puhala mai he tau laliaga he tau tagata a Iehova, he matakavi ia po ke he lalolagi katoa.
6 Nakai la pihia ia fakamua, kua lata ia tautolu ke fanogonogo ke he hatakiaga ha Iesu: “A mutolu, kia mataala a a mutolu, mo e liogi, ha ko e mena nakai iloa e mutolu po ke hoko mai a fe e aho ia. Ko e mena kua tala atu e au kia mutolu, kua tala atu ai e au ke he tau tagata oti, Kia mataala a.” (Mare. 13:33, 37) Ti ko e mena ia, kia fakatumau a tautolu oti ke fakapuloa e tala mitaki he Kautu, he taute e loto ha Iehova ke fiafia he fakalataha a tautolu ke fakatokoluga hana higoa lahi mo e tapu.