To Logona Fēfē e Lautolu?
1. Liga paleko fēfē e gahua fakamatala, ti ko e ha kua fakatumau a tautolu?
1 He tata lahi mai e aho a Iehova, kua manako mafiti ke lagomatai e tokologa ke moua e iloilo tonu he Atua mo e finagalo haana ma e tau tagata. (Ioane 17:3; 2 Pete. 3:9, 10) Liga uka e mena nei he falu magaaho, ha kua tokologa ne fakateaga po ke liga vaiga a tautolu ha ko e gahua fakamatala ha tautolu. (2 Pete. 3:3, 4) Pete ia, ha ha ia tautolu e tau kakano ke talitonu kua fai agaia he fonua ha tautolu ka talia e tala mitaki ka logona e lautolu. To logona fēfē e lautolu ia ka nakai fai tagata ka fakamatala atu?—Roma 10:14, 15.
2. Fakamalolō fēfē he fifitakiaga he aposetolo ko Paulo a tautolu?
2 Fehagai mo e Totokoaga: Ke lata mo lautolu ne fiafia ke he fekau he Kautu, nakai lata ia tautolu ke fakalolelole. Ko Filipi e maaga fakamua i Europa ke logona e aposetolo ko Paulo ne fakamatala e tala mitaki. He tukupau fakakelea ki a Paulo mo Sila, ne fahi a laua aki e tau akau ti tuku he fale puipui. (Gahua 16:16-24) Ko e fakamamahi fakatino pihia ne nakai fakamatakutaku aki a Paulo. He aahi atu a ia ki Tesalonia, ko e maaga ka holo a ia ki ai he fenoga misionare haana, ne ‘fakamalolo a ia ha ko e Atua.’ (1 Tesa. 2:2) Nakai kia fakakite he fifitakiaga a Paulo e kakano ha tautolu ke “nakai fakalolelole”?—Kala. 6:9.
3. Ko e heigoa kua liga fakatupu falu ke hiki e tau loto pete he nakai fiafia fakamua?
3 Tokologa ne fakaheu ke fanogonogo he tau tau loga ne hiki e tau loto. Ko e lekua fakatupe, gagao, mate taha he magafaoa, po ke tau hokotaki he tau mena fakatupetupe he lalolagi ne liga fakatupu mafiti e hikiaga ia. (1 Kori. 7:31) Fai ne totoko he tau matua ka kua lalahi tuai ti fiafia ke fanogonogo. He fakatumau ha tautolu ke fakamatala kua foaki ki a lautolu ia e magaaho ke ‘ui ke he higoa ha Iehova’ neke to mui lahi.—Roma 10:13.
4. Ko e heigoa kua fakalagalaga a tautolu ke “nakai oki” he fakatumau he fekafekauaga?
4 “Nakai Oki”: Ko e fakaalofa ha tautolu ke he Atua mo e katofia to fakalagalaga a tautolu ke “nakai oki” he fakatumau ke he gahua fakamatala mo e taute tutaki, tuga ne taute he tau aposetolo he senetenari fakamua. (Gahua 5:42) Tokologa he vahā nei ne “tauoi mo e mānu ha ko e tau mena vihiatia” hane tutupu mogonei. (Eseki. 9:4) To moua e lautolu ia e amaamanakiaga mo e hahau mooli ka logona e lautolu e tala mitaki! Pete he laulahi e tau tagata ne fakaheu ke fanogonogo, ha ha ia tautolu e fakamooliaga faka-Tohi Tapu kua fiafia lahi a Iehova ke he tau laliaga ha tautolu.—Hepe. 13:15, 16.