Fakatumau ke Fakamatala!
1 Ko e finagalo he Atua ke “fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:4) Ha ko e mena nei, ati foaki mai e ia ki a tautolu e kotofaaga ke fakamatala e tala mitaki. (Mata. 24:14) Kaeke ke loto fakaaue a tautolu ke he kakano kua lata ia tautolu ke fakatumau e fakamatala, to nakai lolelole a tautolu ka fehagai mo e ha fakalolelole po ke fakalavelave.
2 Fakatumau He Ha? Loga e tau fakalavelave he lalolagi kua fakatupu e tau tagata ke nimo po ke fakateaga ke he mena ne talahau atu e tautolu. Ti kua lata ia tautolu ke fakamanatu mau age ki a lautolu e fekau he Atua ke he fakamouiaga. (Mata. 24:38, 39) Lafi ki ai, ko e tau tutuaga he tau momoui he tau tagata kua hikihiki tumau. Nukua maeke ke mafiti lahi foki e tau tutuaga he lalolagi ke hiki. (1 Kori. 7:31) A pogi, tapu ka hau, po ke mahina ka hau, to fehagai e tau tagata ne fakamatala a tautolu ki ai mo e tau lekua fou po ke tau kapeletu kua fakatupu a lautolu ke manamanatu fakahokulo ke he tala mitaki kua talahau atu ai e tautolu. Nakai kia fakaaue a koe ha kua fakamakamaka tumau e Fakamoli ne talahau e kupu moli ki a koe?
3 Ke Fifitaki e Fakaalofa Hofihofi he Atua: Kua fakaata fakauka e Iehova e magaaho ke mole ato fakahoko e fakafiliaga ke he tau tagata mahani kelea. He puhala ia tautolu ne tumau a ia ke talahau atu ki a lautolu kua loto hako ke fuluhi mai ki a ia mo e fakamomoui ai. (2 Pete. 3:9) To fakamaligi toto a tautolu kaeke ke nakai fakatumau a tautolu ke fakapuloa e fekau fakaalofa hofihofi he Atua ke he tau tagata mo e hataki a lautolu hagaao ke he fakahoko mai he fakafiliaga he Atua ki a lautolu oti kua nakai fuluhi kehe mai he tau puhala kelea ha lautolu. (Eseki. 33:1-11) Pete ni kua fa fakaheu mai e gahua fakamatala ha tautolu falu a magaaho, kia nakai fakalolelole a tautolu he lali tumau ke lagomatai a lautolu kua loto fakaaue moli ke he fakaalofa hofihofi lahi he Atua.—Gahua 20:26, 27; Roma 12:11.
4 Ke Fakatata e Fakaalofa ha Tautolu: Kua poaki e Iehova ko e Atua ia Iesu Keriso ke fakamatala e tala mitaki ke he lalolagi oti. (Mata. 28:19, 20) Pete ne fakaheu e tau tagata ke fanogonogo, ha ha ia tautolu e magaaho ke fakakite e fakaalofa mo e mahani fakamoli ha tautolu ke he Atua he fakatumau ke taute e mena hako.—1 Ioane 5:3.
5 Kia fifili a tautolu ke fakatumau e fakamatala! Kia taute e tautolu mo e fakamakutu ato hoko mai e ‘aho ke fakamomoui.’—2 Kori. 6:2.