Kia Fekafekau mo e Fiafia
1 Na talahau e Iesu he vaha ka haele mai a ia, a to tuga ni e vaha a Noa, he tokologa ka ‘nakai iloa.’ (Mata. 24:37-39) Ti, tuga he amaamanaki, to tokologa e tau tagata ka nakai fanogonogo ke he tala mitaki he Kautu. Ko e heigoa ke lagomatai a tautolu ke fakatumau e agaga fiafia he taute e tautolu e fekafekauaga ha tautolu?—Sala. 100:2.
2 Fakamua, kia tokaloto e tautolu ko e fekau mo e kotofaaga ha tautolu ke fakamatala ne mai he Atua. Kaeke kua nakai talia e fekafekauaga, pete kua lali fakalahi a tautolu, ko e fakatikaiaga moli a ia ia Iehova. He liu manatu ko e taliaaga hana he fakamoliaga ha tautolu ke fakamatala ka lagomatai aki a tautolu ke fakatumau e olioli ha tautolu mo e loto fiafia ha ko e tau fekafekau he gahua he Atua.—Iako. 1:25.
3 Ke uaaki, ha i ai agaia e tau tagata ne talia e puhala fakamouiaga a Iehova. Pete kua tokologa ne fakateaga, tokai agaia a lautolu tuga e tau mamoe ke fakapotopoto mai, he magahala nei, ne hokulo ke he vaha fakahikuhiku. Kia fakatumau a tautolu ke fakamatala, ke o atu ke he tau “māga, po ke magamotu” ke “huhu po ko hai ha i ai kua lata.”—Mata. 10:11-13.
4 Kia Tumau mo e Agaga Fiafia: Ko e fakamauaga kelea he tau lotu fakavai ne fakaatukehe lahi e falu. Ko e falu foki “ne fakafita a lautolu, mo e tiaki atu ai” he fakatokatokaaga nai. (Mata. 9:36) Tokologa ne kapaletu nukua ai fai gahua, ha leveki tino, po ke ha levekiaga. Ko e maamaaga he mena nei ka lagomatai a tautolu ke fakauka he gahua ha tautolu. Kia lali ke kamata e tau tutalaaga hagaao ke he tau mena ne lauia lahi mo e tau tagata he matakavi ha tautolu. Lagomatai a lautolu ke kitia ko e Kautu he Atua ni hokoia e tali. Fakaaoga e tau kupu Tohi mo e tau manatu tonu mai he tau tohi ke amotia e tau loto ha lautolu mo e tala mitaki.—Hepe. 4:12.
5 Ko e tau fekafekau fiafia ke he gahua he Atua ne mauloto: “Ko e fiafia kia Iehova ko e malolo ha [mautolu] haia.” (Nehe. 8:10) Ti nakai lata ke galo e fiafia ha tautolu. “Kaeke foki kua lata e magafaoa ia, to hoko atu ki ai ha mutolu a fakamonuina; kaeke foki kua nakai lata, ti liliu mai ai kia mutolu ha mutolu a fakamonuina.” (Mata. 10:13) Kua fakafou e Iehova e fiafia ha tautolu mo e fakamalolo tuga ni he fakauka fakatekiteki a tautolu he fekafekauaga tapu hana, mo e fakamonuina e tua fakamoli ha tautolu.