‘Fekafekau Kia Iehova mo e Fiafia’
1. Ko e heigoa e punaaga kua mua atu e fiafia ma e tau fekafekau ha Iehova?
1 “Kia fiafia a mutolu ke he Iki,” he tohia he aposetolo ko Paulo. “To liu foki tala atu e au, kia fiafia.” (Filipi 4:4) Ko e kotofaaga lilifu he folafola e tala mitaki mo e lagomatai a lautolu ne loto tuga e tau mamoe ke tapuaki ki a Iehova ko e punaaga kua mua atu e fiafia. (Luka 10:17; Gahua 15:3; 1 Tesa. 2:19) Pete ia, ka logona e tautolu he falu magaaho kua nakai fiafia a tautolu he fekafekauaga, ko e heigoa kua maeke ia tautolu ke taute?
2. Maeke fefe he manatu tumau ke he punaaga he ha tautolu a poakiaga ke lafi ke he fiafia ha tautolu?
2 Ko e Gahua ne Fakauku Faka-Atua: Manatu ko e ha tautolu a poakiaga ke fakamatala kua mai ia Iehova. E, kua monuina ha ia ha “ko e tau ekegahua a [t]autolu fakalataha mo e Atua” he fakapuloa e fekau he Kautu mo e taute tutaki! (1 Kori. 3:9) Kua fakalataha a Iesu Keriso mo tautolu ke he gahua nei ka nakai liu ke taute foki. (Mata. 28:18-20) Ko e tau agelu kua hakahakau foki he kau auloa mo e gahua mo tautolu he heleheleaga fakaagaga lahi mahaki hane taute mogonei. (Gahua 8:26; Fakakite. 14:6) Ko e tau Tohiaga Tapu, pihia mo e tau mena tutupu ke he tau tagata he Atua, kua foaki e fakamoliaga mahino ko Iehova hane lalago e gahua nei. Magaaho ka fakamatala a tautolu, ko e magaaho ia, kua o atu a tautolu mo e “vagavagahau atu e [t]autolu ha ia Keriso mo e loto mitaki mai he Atua, ki mua foki he Atua.” (2 Kori. 2:17) Ko e kakano malolo ha ia ke fiafia!
3. Ko e heigoa e matagahua he liogi ne taute ke tumau ai e fiafia ha tautolu he fekafekauaga ke he Atua?
3 Kua aoga lahi e liogi ke tumau ai e fiafia ha tautolu he fekafekau ke he Atua. (Kala. 5:22) Ha kua maeke ni ia tautolu ke taute e gahua he Atua he hana ni a malolo, kua lata ia tautolu ke ole ki a ia ma e hana agaga, nukua foaki fakaalofa e ia ki a lautolu ne ole ki a ia. (Luka 11:13; 2 Kori. 4:1, 7; Efeso 6:18-20) Ko e liogi hagaao ke he fekafekauaga ha tautolu ka lagomatai a tautolu ke fakatumau e onoonoaga hako he magaaho ka fehagai a tautolu mo e tau tali kelea mai. To lagomatai a tautolu ke matutaki e fakamatala fakamalolo mo e fiafia.—Gahua 4:29-31; 5:40-42; 13:50-52.
4. Maeke fefe he tauteute fakamitaki ke lagomatai ke fakamalikiti e fiafia ha tautolu he fakamatala, mo e ko e heigoa falu puhala aoga kua maeke ia tautolu ke tauteute ai?
4 Tauteute Fakamitaki: Ko e puhala aoga ke fakamalikiti e fiafia ha tautolu ka fakalataha ke he fekafekauaga ko e tauteute fakamitaki a tautolu. (1 Pete. 3:15) Ko e tau tauteute pihia kua nakai lahi e magaaho ka fakaaoga. Na gahoa ni e minuti ke liu kitekite ke he tau fakataitaiaga kua fakakite mai hagaao ke he tau mekasini fou po ke fakamatalaaga ne kua felauaki mo e tohi kua amanaki a koe ke foaki. Ma e fakafeleveiaaga kua felauaki, maeke ia koe ke fakakia e tohi Reasoning po ke tau fufuta kua mole he Ha Tautolu a Fekafekauaga he Kautu. Kua moua he falu tagata fakailoa he Kautu e aoga lahi he tohi hifo e fakamatalaaga ku he laupepa. Ke he taha magaaho mo e taha magaaho, to fakahela hifo a lautolu ke he laupepa nei ke liu fakamanatu ki a lautolu. Lagomatai he mena nei a lautolu ke kautu mai he hopoate mo e foaki ki a lautolu e loto malolo ke fakamatala mo e fakamalolo.
5. Aoga fefe e fiafia ki a tautolu mo e falu?
5 Tamai he fiafia e loga he tau fua aoga. Ko e tuaga fiafia lahi kua fakamahomo e mitaki he fekau ha tautolu. Fakamalolo he fiafia a tautolu ke fakauka. (Nehe. 8:10; Hepe. 12:2) Ki luga he tau mena oti, kua fakaheke he fekafekauaga fiafia ha tautolu a Iehova. Ko e mena ia, “kia fekafekau a [ta]utolu kia Iehova mo e fiafia.”—Sala. 100:2.