Fakalaulahi Hau a Olioli he Fakamatala
1 Ko e olioli he folafola e tala mitaki—iloa pihia nakai e koe he fekafekauaga hau? Ka nakai fakaeneene a tautolu, to maeke he lalolagi hane viko takai ia tautolu ke fakama a tautolu he fakamatala, ati fakatupu ai a tautolu ke galo e olioli. Ko e gahua he matakavi nakai talia ka fakalolelole e makai ha tautolu. Ko e heigoa e tau lakaaga aoga ka taute e tautolu ke fakatolomaki e olioli ha tautolu he fakamatala?
2 Kia Aga Mitaki: Ko e fakatumau he aga mitaki ka lagomatai moli a tautolu. Ko e taha puhala ke taute e mena ia he manamanatu ke he ha tautolu a matagahua mua ue atu ko e ‘tau ekegahua he Atua.’ (1 Kori. 3:9) Fakalataha foki a Iesu mo tautolu he fakakatoatoa e gahua nei. (Mata. 28:20) Ti lalago e ia a tautolu aki hana a matakau he tau agelu. (Mata. 13:41, 49) Maeke ia tautolu mogoia, ke iloa mitaki kua takitaki faka-Atua e tau gahua ha tautolu. (Fakakite. 14:6, 7) Ti pete ne tau puhala ne tali mai aki he falu tagata e gahua ha tautolu, ko e taliaaga mai he lagi e taha he olioli lahi!
3 Tauteute Fakamitaki: Ko e tauteute mitaki kua lafi foki ke he olioli ha tautolu. Ke mautali ma e fekafekauaga kua nakai lata mo e tau matagahua loga. Kua gahoa ni e tau minuti ke manamanatu ke he matakupu ka tutala ke he tau mekasini fou po ke tohi ka foaki he mahina. Fifili e fakataitaiaga mai he “Talahauaga Hagaao ke he Tau Mekasini,” he Ha Tautolu a Fekafekauaga he Kautu. Fakakia e uho he Ianuari 2002, “Tau Fakataitaiaga ka Fakaaoga he Gahua ke he Fonua,” po ke kitekite ke he tohi Reasoning ma e fakafeleveiaaga nukua lauia mitaki. Kaeke ke nonaia a koe ha ko e totokoaga ne fa mahani e tau tagata he tau kaina ke fakatutu, tauteute e tali ke fakamakona aki e tau talahauaga ha lautolu mo e takitaki atu e onoonoaga ke he vala tala kua fakalagalaga e fiafia. Kua lagomatai lahi e tohi Reasoning he taute e mena nei. He fakaaoga e tau tohi nei ka foaki mai ki a tautolu e mauokafua kua lata mo tautolu ke fakamatala mo e olioli.
4 Liogi Nakai Noa: Aoga lahi e liogi ma e olioli tukulagi. Ha kua taute e tautolu e gahua ha Iehova, kua lata ia tautolu ke ole ki a ia ma e agaga hana, ko e taha he tau fua ia ko e olioli. (Kala. 5:22, NW) To foaki e Iehova ki a tautolu e malolo ke fakatumau e fakamatala. (Filipi 4:13) Ko e liogi hagaao ke he fekafekauaga ha tautolu kua lagomatai a tautolu ke fakatumau e onoonoaga hako ka feleveia a tautolu mo e tau fakaloleloleaga. (Gahua 13:52; 1 Pete. 4:13, 14) Ka hopoate e logonaaga ha tautolu, maeke he liogi ke lagomatai a tautolu ke fakamalolo mo e fiafia tumau.—Gahua 4:31.
5 Fakatutu Falu Puhala: Moli, kua olioli lahi e fekafekauaga ha tautolu ka maeke ia tautolu ke moua e tau tagata mo e fakamatala ki ai. Ko e hikihiki e setulu hau ke ahi atu he taha fale ke he taha fale he tau magaaho kehekehe, liga ke he pale la po ke afiafi-pouli, ka liga kautu lahi. Kua feleveia a koe mo e tau tagata he tau magaaho oti ka fano a koe he puhala tu, fano ke fakatau, heke he pasi, po ke fano hui he paaka. He ha he tauteute e fakatutalaaga ku ke kamata aki mo e fakailoilo ke tutala ki a lautolu kua matamata fiafia mai? Po ke gahua tupe po ke fano aoga a koe, ko e matakavi haia ke tutala a koe mo e falu he tau aho oti. Liga moua e koe e magaaho ke fakamatala he fakatu e vala tala faka-Tohi Tapu kua fakalagalaga e fiafia. Moua mai e tau lagomataiaga mitaki he lau fakamua he uho he Ha Tautolu a Fekafekauaga he Kautu ia Ianuari 2002. Ko e tau laliaga nei ka fakatolomaki e tuaga olioli he taha ke fakamatala.
6 Ha kua lagomatai he olioli a tautolu ke fakauka, ko e aoga ha ia ke fakatumau ki ai! He taute pihia, to helehele e tautolu e palepale lahi mahaki kaeke ke hokotia e gahua nakai liu taute foki nei ke he fakaotiaga. Ko e amaamanakiaga ia kua maeke ke fakatolomaki e olioli ha tautolu ke fakamatala.—Mata. 25:21.