Fakaheke a Iehova ha ko e Tau Gahua Mitaki
1 Ka auhia a koe he afa vale, ko e mitaki ha ia ka maeke ke moua e fakamaluaga! Ka mafana mo e haohao mitaki a loto mo e ka fakamokoi e tau tagata i ai, kua fiafia a koe ke nofo ai. Kua takitaki he gahua fakamatala he Kautu e tau tagata ke he fakamaluaga pihia mai he fakatokaaga ha Satani. Maeke kia he tau mahani ha tautolu he tau aho takitaha ke lagomatai e falu ke kitia e futiakiaga mitaki he fakamaluaga nei? E, pehe a Iesu to ‘kitia ai e lautolu ha mutolu a mahani mitaki ati fakaheke atu ai a lautolu ke he Matua ha tautolu ha ha he lagi.’—Mata. 5:16.
2 Takitaki fefe e tautolu a tautolu ke maeke he tau gahua ha tautolu ke futia mai e falu ki a Iehova mo e hana fakatokatokaaga? He toka e tau kupu ha Iesu ne fakamau ia Luka 6:31 mo e 10:27 ke fakahakohako e tau momoui ha tautolu he tau aho takitaha. To fakalagalaga he mena nei a tautolu ke fakakite e logonaaga fakaalofa ma e tau tagata, he fakakehe a tautolu mai he lalolagi makalili mo e nakai fakaalofa nai.
3 Ne mailoga he matakainaga fifine e fifine fuata he poti, ne gagao he lukeluke-tahi nukua nakai maeke ke leveki hana tama tote. Ne ole e matakainaga fifine ke leveki e tama. He huhu e fifine ke he puhala ke fakakite e ia hana fakaaue, ne pehe e matakainaga fifine: ‘Fakamolemole fanogonogo ke he Tau Fakamoli a Iehova ka liliu ke ahi atu.’ Ne taute pihia he fifine, ti ko ia mo e hana tane mogonei ko e Tau Fakamoli. Fai kehe moli e tau gahua mitaki ke he puhala kua tali atu a lautolu ke he fekau he Kautu.
4 Putoia e Tau Momoui Katoa ha Tautolu: Ko e tau mahani ha tautolu he tau takatakaiaga, ha ha he gahuaaga po ke aoga, mo e ke he tau magaaho fakafiafia kua fakatupu e falu ke tamata e fifiliaga hagaao ki a tautolu mo e lotu ha tautolu. Mena ia, kua lata ia tautolu ke huhu hifo ni ki a tautolu: ‘Fefe e onoonoaga he tau tagata kitekite ki a au mo e magafaoa haku? Mailoga nakai he tau katofia e fale mo e lotopa ha tautolu kua mea mo e maopoopo? Kitia nakai he tau kapitiga gahua mo e tau kapitiga aoga ha tautolu kua fa hohoko tuai tumau mo e aga fakamakamaka a tautolu? To kitia nakai he falu e mahani fakalatalata mo e fakalilifu he tau foliga ha tautolu?’ Kua taute he tau gahua mitaki ha tautolu e tapuakiaga ha Iehova ke futiaki lahi ke he falu.
5 Ne hataki e Peteru to eke e tau Kerisiano mo va ki ai. (1 Pete. 4:4) Kua lata ke iloa moli e tautolu ke nakai fakatupu he mahani ha tautolu ha tutala kelea. (1 Pete. 2:12) Ka fakaheke he tau gahua ha tautolu he tau aho takitaha e Atua nukua tapuaki a tautolu ki ai, to tuga e lamepa a tautolu kua tu tokoluga, he futiaki e falu ke o atu ke he fakamaluaga kua foaki e Iehova.—Mata. 5:14-16.