Ko e Fakamatala Nakai Vagahau
1 He nakai lea ha kupu, ko e tau tufugatia ha Iehova kua talahau fakaleo lahi hagaao ke he tau mahani nakai kitia hana. (Sala. 19:1-3; Roma 1:20) Tatai ai, ko e mahani mitaki ha tautolu, tau mahani Kerisiano, mo e tauteuteaga lilifu ka foaki e fakamatala nakai vagahau. (1 Pete. 2:12; 3:1-4) Kua lata ko e manako ha tautolu takitokotaha ke ‘fakalilifu ai e tau kupu he Atua, ha tautolu a Fakamoui ke he tau mena oti kana’ puhala he tau mahani ha tautolu.—Tito 2:10.
2 Maeke fefe he tau tagata nakai mitaki katoatoa ke fakakikila fakalahi e tau fakaakoaga he Tohi Tapu? Maeke hokoia ni e mena nei puhala he takitakiaga he Kupu he Atua mo e malolo he agaga tapu. (Sala. 119:105; 143:10) Ko e kupu he Atua “kua moui ia, mo e gahua malolo, kua mua foki hana matila ke he tau pelu oti kana kua matila fakafahiua.” (Hepe. 4:12) Kua hokulo e hufiaaga ki loto ia tautolu ti maeke ia tautolu ke tapulu ke he tagata fou. (Kolo. 3:9, 10) Fakatupu he agaga tapu ia tautolu e tau mahani kua mua e mitaki, tuga e totonu, mitaki, mahani molu, mo e manako fakalatalata. (Kala. 5:22, 23) Kua fakaata nakai e tautolu takitokotaha e kupu mo e agaga he Atua ke gahuahua he tau momoui ha tautolu?—Efeso 4:30; 1 Tesa. 2:13.
3 Mailoga he Falu: Ka momoui a tautolu ke he tau tutuaga ha Iehova mo e eketaha ke fakakite hana tau mahani, to mailoga he falu. Manamanatu la, ma e fakatai, ko e tagata tane ne vaiga he tau tagata gahua hana he ku. Ko e matakainaga fifine ne gahua he ofisa taha ia ne taute fakamitaki mo e fakalilifu tumau ki a ia. Ne omoi he mena ia a ia ke huhu ke he fifine ko e ha a ia ne kehe ai. Ne fakamaama he fifine ko e aga fakalilifu hana ko e fua he fakagahua e tau matapatu fakaakoaga he Tohi Tapu he moui hana. Ne tala age foki e ia e amaamanakiaga homo atu ke he Kautu. Ne kamata e tagata tane ke fakaako e Tohi Tapu ti hokotia ke papatiso. He liu atu ke he motu moli hana, ne nava e magafaoa hana he mitaki lahi e mahani hana, ti tokologa ia lautolu foki ne talia e kupu moli.
4 He gahuaaga, he aoga, po ke he fehagai mo e tau magafaoa mo e tau katofia, maeke ia tautolu ha ko e mahani mitaki ha tautolu, fakalataha mo e ha tautolu a fakamatala, ke fakaohooho e falu ke fakaheke e Atua.—Mata. 5:16.