Fakamoli he Mahani Mitaki
1 Ke he vaha kaufakalatahaaga fakahanoa nei, loga e tau fuata ne folifoli fakateaga e tau momoui ha lautolu aki e tau vai lakau kona, mahani feuaki, fakafualoto, mo e favale. He taha fahi, ko e fakafifitakiaga mitaki he tau fuata lotomatala he fakapotopotoaga Kerisiano kua hauhau ke kitia mo e moli ni ko e mena fulufuluola ki a Iehova. Kua taute ai e fakamoliaga malolo lahi ke maeke ke futiaki e falu ke he kupu moli.—1 Pete. 2:12.
2 Loga e tau talahauaga ne fakakite ko e mahani mitaki he tau fuata Kerisiano kua lauia mitaki ki a lautolu ne kitekite. Tutala ai hagaao ke he taha Fakamoli fuata hana ne fakaako, kua tala age he faiaoga ke he vahega katoa hana ko e Atua he tama fifine nei, ko Iehova, ko e Atua moli. Kua talahau e ia e mena nei ha ko e mahani fakalilifu tumau he tama fifine. Taha foki e faiaoga ne tohitohi ke he Sosaiete, pehe age: “Kua manako au ke nava ki a mutolu ha ko e tau tagata fuata ne ha ha i ai he lotu ha mutolu. . . . Ko e tau fuata ha mutolu kua moli ni e fifitakiaga. Kua fakalilifu a lautolu ke he tau momotua ha lautolu, fai mahani, mo e gali e tau tapulu. Mo e kua iloa moli ni e lautolu e Tohi Tapu ha lautolu! Moli ni ko e lotu a ia!”
3 Taha foki e faiaoga ne nava e mahani mitaki he taha Fakamoli he vahega hana ne fitu e tau. Kua futiaki a ia ke he mahani totonu mo e fulumokoi he tama tane, ha kua kehe lahi mai he falu tama tane. Kua ofo a ia he makutu hana ke he tau taofiaga he lotu hana—nakai ma ke tu kehe a ia ha ko e tau mena ne talitonu ai a ia. Kua maeke ia ia ke kitia ko e hana a manamanatuaga kua fakaako mo e maeke kia ia “ke mailoga e tau mena mitaki mo e tau mena kelea.” (Hepe. 5:14) Nakai leva, ati aahi atu e matua fifine he tama tane ke he faiaoga, mo e kamata ai e fakaakoaga he Tohi Tapu. Ke he magaaho i mua, ne papatiso e faiaoga mo e gahua paionia tumau he magaaho fakamui!
4 Taha fuata tane kua paotia ha ko e mahani mitaki he taha Fakamoli he aoga hana. Moli ni kua kehe lahi a ia—he fai mahani, kua makaka, mo e mea tumau e tau taute hana; pihia foki, nakai tuga e falu tama fifine, ne nakai kalahi a ia ke he tau tama tane. Kua maeke ia ia ke kitia kua moui a ia ke he tau matapatu fakaakoaga he Tohi Tapu. Ne huhu age e fuata tane hagaao ke he hana a tau taofiaga fakalotu ti nava ha ko e tau mena ne logona e ia. Ati kamata e fakaakoaga hana, nakai leva ti papatiso, ti fakahiku kua fakalataha ke he fekafekauaga paionia mo e gahua he Peteli.
5 Kaeke ko e taha Kerisiano fuata a koe ne manako ke foaki e fakamoli mitaki ke he falu, kitekite hau a mahani ke he tau puhala oti. Aua neke tukutukuhifo e leveki hau ke talia e tau aga, tau kitekiteaga, po ke tau puhala moui fakahanoa he lalolagi. Fakatoka e fifitakiaga mua ue atu ke he hau a vagahau, tapulu, mo e tauteuteaga, nakai ni he gahua fekafekauaga he fonua mo e he tau feleveiaaga fakapotopotoaga ka e pihia foki he aoga mo e ka taute ai e tau fiafiaaga. (1 Timo. 4:12) To moua e koe e olioli moli he magaaho ka fiafia e taha tagata ke he kupu moli ha kua ‘kikila atu pihia hau a maama’ he hau a mahani mitaki.—Mata. 5:16.