Tau Fuata ne Tuga e Tau Mena kua Fakamaama
1. Fakakite fēfē he Tohi Tapu to kitia maaliali e tau Kerisiano, ti hagaao fēfē e tau kupu ia ke he tau Kerisiano fuata he vahā nei?
1 Ne pehē a Iesu ke he tau tutaki haana: “Ko mutolu, ko e maama he lalolagi a mutolu.” (Mata. 5:14, 16) Ke tuga e maaga i luga he fuga matiketike ne kikila po ke laā, kua kitia maaliali pihia a lautolu. He vahā nei, tokologa e tau Kerisiano fuata hane “mahani tuga ne tau mena kua fakamaama aki e lalolagi” ha ko e ha lautolu a aga tututonu mo e fakamakai ke he gahua fakamatala.—Filipi 2:15; Mala. 3:18.
2. Ko e heigoa falu puhala kua maeke ia koe ke fakamatala ke he tau faiaoga mo e tau kapitiga he vahega?
2 He Aoga: To liga fakamatala fēfē a koe he aoga? Ne fakaaoga he falu fuata e tau matakupu pehēnei he fakatutalaaga ha lautolu he vahega, tau tulaki, tupumainoa, mo e Matematekelea Tokaimaka—ke talahau ni e falu. Ne fakaaoga he taha matakainaga fifine he esei haana e matakupu ke he fakamatakutaku ke fakamatala hagaao ke he Kautu he Atua ko e amaamanakiaga mooli ma e tau tagata. Ne nava e faiaoga ke he hokotaki ne manamanatu fakamitaki, ati hafagi ai e puhala ke fakamatala fakalaulahi atu.
3. Fakamaama fēfē e koe e mahani haau he aoga?
3 Taha puhala ke mahani tuga ne tau mena kua fakamaama ko e haau a aga mo e tauteuteaga kua gali. (1 Kori. 4:9; 1 Timo. 2:9) Ka kitia he tau tama mo e tau faiaoga kua kehe ne puhala haau, to liga futiaki falu ke he kupu mooli ha ko e aga mitaki haau ti foaki foki ki a koe e magaaho ke fakamatala e kupu mooli he Tohi Tapu. (1 Pete. 2:12; 3:1, 2) Liga kua nakai mukamuka ke fakakite e mahani Atua, pete ia to fakamonuina lahi e Iehova a koe. (1 Pete. 3:16, 17; 4:14) Ke fakalagā e fiafia ke he tala mitaki, liga totou e koe e tohi fakavē ke he Tohi Tapu he tau magaaho okioki po ke toka he mena ka kitia he falu.
4. Ko e heigoa e falu mena aoga he fakamatala he aoga?
4 He fakakikila e mahani haau he aoga ka fakamalolō e tua mo e lagomatai a koe ke feaki e matalahi atihake ke fekafekau ki a Iehova. (Iere. 9:24) Kua eke foki e mena ia mo puipuiaga. Ne pehē taha matakainaga fifine, “Taha e mena aoga he talahau e tau taofiaga haaku, kua nakai lali e tau tama aoga ke fakaohooho au ke taute e tau mena ne nakai lagotatai ke he tau mena ne talahau he Tohi Tapu.”
5. (a) Puhala fe kua fakalaulahi he falu fuata e fekafekauaga ha lautolu? (e) Ko e heigoa e tau foliaga fakaagaaga haau?
5 Fakalaulahi e Fekafekauaga: Taha puhala foki he tau fuata ne tuga ne tau mena kua fakamaama he fakalaulahi e fekafekauaga ha lautolu. He oti e aoga tokoluga, ne fano taha matakainaga taane ke fekafekau he matakavi ne manako lahi ma e tau tagata fakapuloa he Kautu. Ne fakalataha a ia ke he fakapotopotoaga tote ne taha ni e motua. “Ko e magaaho fiafia lahi anei he moui haaku,” he tohi e ia ke he kapitiga. “Kua atihake mooli e fekafekauaga! Ne tutala a mautolu ke kavi ke 20 e minuti he tau gutuhala takitaha he manako e tau tagata ke fanogonogo ke he tau mena oti ka tala age e mautolu.” Ne lafi e ia: “Manako lahi au ke taute he tau fuata oti e taha mena pehē mo e logona e mena ne logona hifo e au. Kua nakai fakaai ha mena ke mitaki lahi atu ke tuga e foaki katoatoa e loto ha tautolu ke fekafekau ki a Iehova.”
6. Ko e heigoa ne nava a koe ki ai ke he tau fuata he fakapotopotoaga haau?
6 Kua matalahi ha ia ha mautolu ki a mutolu ko e tau fuata tuga ne tau mena kua fakamaama he lalolagi! (1 Tesa. 2:20) He fekafekau a koe mo e loto, solu, manatu, mo e malolō katoa ki a Iehova to helehele e koe ‘takiteau ke he mouiaga nei mo e moui he fahi atu ke moua ai e moui tukulagi.’—Mare. 10:29, 30; 12:30.