“Kia Kikila Atu Pihia ha Mutolu a Maama”
1 Nukua pouli e tau mahani mo e tuaga fakaagaga he lalolagi kua takai viko ia tautolu. Kua fakatapakupaku he maama he kupu moli e ‘tau gahua nakai aoga’ he pouli ati maeke ai ke kalo kehe mai he tau matematekelea nei. Ko e fua, ne fakamafana he aposetolo ko Paulo e tau Kerisiano: “Kia mahani a mutolu tuga e tau tagata he maama.”—Efeso 5:8, 11.
2 “Ko e fua he Agaga” kua kehe mamao mo e pouli he lalolagi. (Efeso 5:9) Ke moua e fua nei kua lata ke eke a tautolu mo tau fakafifitakiaga mahomo atu he moui faka-Kerisiano, ko e faga tagata kua talia e Iesu. Kua lata foki ia tautolu ke fakakite e tau fua tuga e loto katoa, fakamoli, mo e ukufakina ma e kupu moli. Kua lata e fua nei ke fakakite he moui ha tautolu he tau aho takitaha mo e he fekafekauaga ha tautolu.
3 Kikila Atu he Tau Magaaho Oti: Ne tala age a Iesu ke he hana tau tutaki: “Kia kikila atu pihia ha mutolu a maama ki mua he tau tagata.” (Mata. 5:16) He fifitaki ki a Iesu, kua fakaata e tautolu e maama ha Iehova he fakamatala hagaao ke he Kautu he Atua mo e hana tau finagalo. Kua kikila atu a tautolu tuga e tau lamepa ka ahi atu a tautolu ke he tau kaina he tau tagata mo e ka folafola e tautolu e kupu moli he gahuaaga, he aoga, ke he tau katofia ha tautolu, po ke ha magaaho noa ni.—Filipi 2:15.
4 Ne pehe a Iesu to fakavihia he falu e maama. (Ioane 3:20) Ti nakai fakalolelole a tautolu ka laulahi he tau tagata ka fakaheu e “kikila atu kia lautolu e maama he vagahau mitaki he lilifu a Keriso.” (2 Kori. 4:4) Totou e Iehova e tau loto he tau tagata mo e nakai manako ke he tau tagata taute mahani kelea he vahaloto he tau tagata hana.
5 Ka muitua a tautolu ke he tau puhala ha Iehova mo e fiafia e maama fakaagaga, maeke ia tautolu ke fakaata atu ke he falu. Ka mailoga e lautolu mai he tau mahani ha tautolu kua ‘moua e [tautolu e] maama he moui,’ ti maeke foki ia lautolu ke omoomoi ke taute e tau hikiaga ke eke mo tau tagata fua he maama.—Ioane 8:12.
6 He fakakikila atu e maama ha tautolu, ta mai e tautolu e fakahekeaga ke he Tufuga mo e lagomatai a lautolu kua fakamoli ke iloa a ia mo e moua e amaamanakiaga he moui tukulagi. (1 Pete. 2:12) Ha kua moua e tautolu e maama, kia fakaaoga a e tautolu ke lagomatai aki e falu ke takitaki mai ki fafo he pouli fakaagaga mo e taute e tau gahua kua lata mo e maama.