“Kia Kikila Atu Pihia ha Mutolu a Maama”
1. Ko e heigoa e monuina kua ha ha ia tautolu ke fakailoa?
1 He matafatafa aho ke hoko ke he afiafi, ko e fulufuluola he maama kua tamai e fakahekeaga ki a Iehova ko e Atua. Ka e ha ha i ai taha vahega maama ne uiina e Iesu haana tau tutaki ke moua—ko e “maama he moui.” (Ioane 8:12) Ka moua e maama fakaagaaga nei ko e monuina pauaki, kua putoia ki ai e tau fakalagoaga mamafa. Fakaako e Iesu: “Kia kikila atu pihia ha mutolu a maama ki mua he tau tagata,” ti fai aoga foki ke he falu. (Mata. 5:16) Ki loto he lalolagi pouliuli fakaagaaga, ko e maama nei kua latatonu ni ke fakailoa, ti kua lata lahi mahaki he vaha nei! Maeke fēfē ia tautolu ke tuga e Keriso ke fakakikila ha tautolu a maama?
2. Fakakite fēfē e Iesu e aoga ke fakailoa e maama fakaagaaga?
2 Ha ko e Fakamatala: Fakaaoga e Iesu haana tau magaaho, malolō, mo e tau koloa ke fakakikila aki e maama he kupu mooli ke he tau tagata he tau kaina, he tau toloaga tagata, he tau mouga—ha mena ni kua moua a lautolu. Kua mailoga e ia e kakano uho ke moua e maama fakaagaaga mooli. (Ioane 12:46) Ke hoko atu foki ke he tau tagata tokologa, kua tauteute e Iesu haana tau tutaki ke eke mo “maama he lalolagi.” (Mata. 5:14) Kua fakakikila e lautolu ha lautolu a maama ha kua gahua fakamitaki ke he tau katofia mo e fakailoa e tau kupu mooli fakaagaaga.
3. Maeke fēfē a tautolu ke fakatātā e loto fakaaue mooli ke he maama he kupu mooli?
3 Ko e tau tagata he Atua kua makai ke he fakalagoaga ke ‘mahani tuga e tau tagata he maama,’ ti fakamatala a lautolu ke he ha mena ni kua ha ha i ai e tau tagata. (Efeso 5:8) Ko e totouaga he Tohi Tapu po ke falu tohi Kerisiano ki mua he tau tagata he tau magaaho okioki he gahuaaga po ke tau aoga, ka hafagi e puhala ke fakatutala ke he Tohiaga Tapu. He puhala nei, taha e matakainaga fifine fuata ne kamata e fakaakoaga Tohi Tapu mo e foaki e tau tohi ke he tau kapitiga toko 12 haana he vahega!
4. Ko e ha e ‘fakakikila he maama ha tautolu’ kua putoia ai e tau mahani kua mua e mitaki?
4 Ha ko e Tau Gahua Mitaki: Ke fakakikila ha tautolu a maama kua putoia ai foki e tau mahani ha tautolu he tau aho takitaha. (Efeso 5:9) He gahuaaga, he aoga, mo e he tau toloaga tagata, ko e mahani faka-Kerisiano kua kitia maali ai, ti maeke ke moua e tau magaaho ke fakatutala ke he kupu mooli he Tohi Tapu. (1 Pete. 2:12) Ma e fakatai, ko e mahani mitaki he taha tama taane lima tau ne kua maeke ke omoi haana faiaoga ke hea ke he haana tau mamatua. Ne pehē a ia, “Nakaila kitia e au ha tama ne kua malolō pihia e taofiaga ke he mahani mitaki!” E, ko e fekafekauaga mo e tau mahani mitaki ha tautolu kua maeke ke futiaki e tau tagata ke he “maama he moui” mo e tuku atu e fakaheke ke he ha tautolu a Atua.