“Tuga ne Tau Mena kua Fakamaama Aki”
1 Ke he fakatokaaga nei ne ha ha ai e pouli fakaagaga mo e mahani kelea, kau ko e ono e miliona he tau tagata tapuaki he Atua moli, ko Iehova, hane “tuga ne tau mena kua fakamaama aki” ke he 234 e motu he lalolagi katoa. (Filipi 2:15) Kua taute he mena nei a tautolu ke kitia maali. Fakakite fefe e tautolu e maama uho he kupu moli kua kikila mai ia Iehova?—2 Kori. 3:18.
2 Tau Mahani ha Tautolu: Mafiti e tau tagata ke mailoga e tau mahani ha tautolu. (1 Pete. 2:12) Taha e fifine ne mailoga ko e tagata gahua fakalataha ko e Fakamoli ne totonu mo e lagomatai mo e nakai fakaaoga e vagahau kiva po ke kata ke he tau vaiga nakai mea. Ka lali e falu ke fakaita e Fakamoli he fakaaoga e vagahau kiva he fakalataha mo ia, ne fakatumau ni a ia ke nakai ita ka e mauokafua ke he mena kua hako. Ko e heigoa e lauiaaga ne ha ha ai he fifine? Ne talahau e ia: “Ne nava lahi au ke he mahani hana ati kamata au ke huhu hagaao ke he Tohi Tapu. Ne kamata au ke fakaako e Kupu he Atua ti papatiso fakamui.” Kua lafi e ia: “Ko e mahani hana ne fakalagalaga au ke kumikumi ke he tau taofiaga he Tau Fakamoli a Iehova.”
3 Ko e aga ha tautolu ke he pule, ko e onoonoaga ha tautolu ke he tau gahua he lalolagi, mo e vagahau atihake ha tautolu kua fakatupu e Tau Fakamoli a Iehova ke kitia maali ko e tau tagata kua momoui ke he tau poakiaga tokoluga he Tohi Tapu. Ko e tau gahua mitaki pihia kua maeke ke fakaheke ki a Iehova mo e futiaki e falu ke he hana tapuakiaga.
4 Tau Kupu ha Tautolu: Moli, ko lautolu kua kitia e mahani mitaki ha tautolu na liga nakai iloa e kakano ko e ha ne kehe a tautolu ato tutala a tautolu ki a lautolu hagaao ke he tau taofiaga ha tautolu. Iloa nakai e lautolu ne gahua po ke o he aoga mo koe na ko e taha he Tau Fakamoli a Iehova a koe? Kumi puhala nakai a koe ke hiki e tutala noa ke he fakamatala? Ko e fifiliaga kia hau ke “kikila atu pihia ha mutolu a maama ki mua he tau tagata” ke he ha magaaho kua latatonu?—Mata. 5:14-16.
5 Ko e fakamoli e poakiaga ha tautolu ko e tau tagata fua he maama kua lata ke ha ha i ai e aga he foaki noa. Ko e aga solu katoa ka omoi a tautolu ke fakamamao he tau mena nakai aoga lahi ke maeke ke taute fakalahi e mena kua maeke ia tautolu ke he gahua fakamoui he fakamatala mo e taute tutaki.—2 Kori. 12:15.
6 He tau mahani mo e tau kupu ha tautolu, kia fakatumau a tautolu ke tuga ne tau mena kua fakamaama aki. Ka taute pihia e tautolu, to liga fakalagalaga e tautolu e falu ke fakalataha mai mo tautolu ke fakaheke ki a Iehova.