Hokotia ke he Loto he Tagata Ako Mena mo Koe
1 Fakamua ato haele hake ke he lagi, ne talahau age a Iesu ke he tau tutaki hana ke fakaako e tau tagata ke “omaoma” e tau mena oti ne poaki e ia. (Mata. 28:19, 20) Ka e ke “omaoma” e tagata ke he tau poakiaga a Keriso, kua lata e tau talahauaga ke hokotia ke he loto hana. (Sala. 119:112) Maeke fefe ia koe ke amohia e loto he tagata ne ako Tohi Tapu mo koe?
2 Liogi ke Moua e Agaga a Iehova: Ko e tauteaga he tau tutaki ko e gahua he Atua. Ko e fakamonuinaaga hana, nakai ko e tau malolo ha tautolu, ka kautu ai. (Gahua 16:14; 1 Kori. 3:7) Koenaia, kua aoga lahi he liogi ma e lagomataiaga a Iehova he fakaako e kupu moli ke he tau tagata.—Isa 50:4.
3 Kitia e Talitonuaga he Tagata Ako Mena: Ke iloa e mena ne talitonu ki ai e tau tagata mo e kakano ne talitonu pihia a lautolu ko e mena ia ha tautolu ke iloa e puhala ke tutala ke hoko ke he tau loto ha lautolu. Ko e ha e tagata ako mena ne talitonu ke he taha fakaakoaga pauaki? Heigoa ne fakamau hana a manatu ke talitonu ki ai? Ko e tau maamaaga pihia ka lagomatai aki a tautolu ke vagahau mo e lotomatala.—Gahua 17:22, 23.
4 Ati Hake mo e Loto Matala e Kakano he Kupu Tohi: Kua lata ke maama mitaki he tagata ako mena e kupu moli. (Gahua 17:24-31) Kia foaki age e tautolu e kakano he amaamanaki ha ha ia tautolu. (1 Pete. 3:15) Ka e, kia taute pihia fakatekiteki, mo e mahani totonu tumau.
5 Lafi Aki e Tau Fakatai: Kua fakamukamuka he tau fakatai e maamaaga he tagata ako mena mo e kua fakaohooho foki e logonaaga hana. Nukua lauia ai e manamanatuaga mo e loto. Nakai noa a Iesu mo e fakaaoga e tau fakatai. (Mareko 4:33, 34) Ka e moli, ke lauia mitaki e fakataiaga, kua lata ke lautonu mo e mena ne tutala, mo e hagaao ai ke he moui he tagata ako mena.
6 Fakakite e Aogaaga he Talia e Kupu Moli: Manako e tau tagata ke iloa e aoga he tau mena kua ako mo e fakagahuahua e lautolu. Lagomatai e tagata ako mena mo koe ke kitia e maamaaga he tau kupu a Paulo ia 2 Timoteo 3:14-17.
7 Aua neke fakalolelole kaeke nakai talia he falu e tau fakaakoaga hau. Nakai mafoki mai oti e tau loto. (Mata. 13:15) Pete ia, na to pipiki mai e falu tagata mo e tua. (Gahua 17:32-34) He tau laliaga hau kia lagomatai e tau tagata tokologa ke hokotia ke he tau loto e tala mitaki ke talia mo e “omaoma” e mena ne poaki e Iesu.