Ko e Heigoa e Foliaga?
1 Ko e ha kua taute e tautolu e tau fakaakoaga Tohi Tapu he kaina? Ke foaki e iloilo, ke fakalauka mitaki e tau momoui he tau tagata, po ke fakafiafia e tau manamanatuaga ha lautolu ke he tau aho amui? Nakai. Ko e matapatu foliaga ha tautolu ke taute tutaki ma Iesu Keriso! (Mata. 28:19; Gahua 14:21) Kakano a ia kua lata ia lautolu ne ako tohi mo tautolu ke fakalataha auloa mo e fakapotopotoaga. Ha kua matutaki tonu e tolomakiaga fakaagaga ha lautolu ke he fakaaueina ha lautolu ma e fakatokatokaaga Kerisiano.
2 Puhala ke Folia Ai: Mai he kamataaga, kia fakamalolo tumau e tagata ako tohi ke fakalataha he tau fakapotopotoaga. (Hepe. 10:24, 25) Fakamaama age ko e tau puhala anei ke fakamalolo e tua hana, lagomatai aki a ia he taute e finagalo he Atua, mo e fakapotopoto auloa mo e falu ne manako ke fakaheke atu ki a Iehova. (Sala. 27:13; 32:8; 35:18) Ko e hau a tau kupu fakaalofa mo e fakaaue ke he fakapotopotoaga mo e tau feleveiaaga ka omoi hana manako ke fakalataha mai.
3 Lata ia lautolu ne fou ke iloa ko e fakatokatokaaga fematakainagaaki ha Iehova ne ha ha i ai ke he lalolagi katoa. Fakakite age e tau vitio Jehovah’s Witnesses—The Organization Behind the Name mo e Our Whole Association of Brothers. Lagomatai a lautolu ke kitia kua fakaaoga e Iehova e tau miliona tagata mahani Atua ke he lalolagi katoa he taute e finagalo hana. Talahau age ki a lautolu fou nei kua uiina atu foki a lautolu ke fekafekau ke he Atua.—Isa 2:2, 3.
4 Ko e mena fiafia mahaki a ia ke kitia e tagata ako Tohi Tapu eke mo taha tutaki moli a Iesu. Ko e foliaga a ia ha tautolu!—3 Ioane 4.