Lagomatai e tau Tagata ke Fakalataha he tau Feleveiaaga
1 “Ke he tau kapitiga he maaga . . . kua uiina mafanatia atu ke o mai mo e fakalataha auloa he tau feleveiaaga ka manako ai.” Tali mai he fakapuloaaga nei ne lomi he fufuta he Zion’s Watch Tower ia Novema 1880, kua uiina fakamakutu he Tau Fakamoli a Iehova e tau tagata ke fakapotopoto auloa mo e fakaako e Tohi Tapu. (Fakakite. 22:17) Ko e taha kakano lahi a e he tapuakiaga moli.
2 Aoga Lahi ke Fakalataha: Fua mai e tau fakamonuinaaga ha kua fakalataha a tautolu ke he fakapotopotoaga. Kua fakamahani lahi a tautolu mo e ha tautolu a Atua homo ue atu, ko Iehova. He fakapotopotoaga, kua fakalataha a tautolu ke “fakaako e Iehova.” (Isaia 54:13) Ne folafola mai he fakatokatokaaga hana e fakaholoaga hagaaki ke he tau fakaakoaga he Tohi Tapu ke futiaki fakatatatata atu a tautolu ki a ia mo e foaki e tau lagomataiaga ke fakaaoga “e finagalo oti he Atua.” (Gahua 20:27; Luka 12:42) Ne foaki mai he tau feleveiaaga e puhala ke fakamahani e tagata mo e tau puhala ke fakaako e Kupu he Atua. Tau fakamanatuaga mai he kupu Tohi ne lagomatai ke kautu mitaki e tau fakafetuiaga ha tautolu mo e falu mo Iehova hokoia ni. He feoaki mo lautolu ne fakaalofa ki a Iehova, kua fakamalolo aki e tua ha tautolu.—Roma 1:11, 12.
3 Uiina Atu Fakahako: Mai he mogo fakapa he fakaakoaga, kia uiina e tau tagata fakaako Tohi Tapu ke he tau feleveiaaga. Foaki age ki a ia e laupepa fakailoa. Fakalagalaga hana manamanatuaga ti talahau taha mena he feleveiaaga ne mole kua fakamalolo ai a koe po ke fakatutala taha mena ka lauga ki ai he feleveiaaga he fahitapu ka hau. Talahau age e tau mena he Fale he Kautu, mo e kikite kua iloa tonu e ia e puhala ke finatu ki ai.
4 Kaeke nakai maeke a ia ke fakalataha he magaaho ia, fakatumau ke uiina a ia. Fakamole e magaaho he tau fahitapu takitaha ke fakakite age e tau gahua he fakatokatokaaga ha tautolu. Fakaaoga e porosua Tau Fakamoli a Iehova mo e vitio Jehovah’s Witnesses—The Organization Behind the Name ke fakamahani aki a ia mo tautolu mo e tau feleveiaaga ha tautolu. Ta atu e falu tagata fakamatala ke fakamahani a ia mo lautolu. Puhala he liogi, kia fakaaue ki a Iehova ha ko e fakatokatokaaga mo e totoku foki e lataaga he tagata fakaako ke fakalataha auloa.
5 Aua fakauaua he lagomatai e tau tagata fou ke fakalataha mo tautolu. He tupu fakahaga e fakaaue ha lautolu ki a Iehova, to omoi ai a lautolu ke fakagahuahua e tau mena ne ako e lautolu ati kaufakalataha ke he fakatokatokaaga he Atua.—1 Kori. 14:25.