Vala 8—Taute e Tau Fakaakoaga Tohi Tapu Holo ki Mua
Takitaki e Tau Tagata Fakaako ke he Fakatokatokaaga
1. Ko e ha kua aoga ke fakatutala ke he taha e manatu hagaao ke he fakatokatokaaga ha Iehova he tau fahi tapu takitaha ka fakaako Tohi Tapu?
1 Ko e foliaga ha tautolu he taute e tau fakaakoaga Tohi Tapu ke nakai ni fakaako e tau taofiaga ka e lagomatai foki e tau tagata fakaako ke eke mo vala he fakapotopotoaga Kerisiano. (Saka. 8:23) Ko e porosua Tau Fakamoli a Iehova—Ne Kaufakalataha ke Taute e Finagalo he Atua ke he Lalolagi Katoa ka lagomatai a tautolu ke taute e mena nei. Age taha e lagaki ke he tau tagata fakaako Tohi Tapu fou, ti fakamalolo ki a lautolu ke totou. Lafi ki ai, fakaaoga falu minuti gahoa he tau fakaakoaga takitaha he fahi tapu ke fakatutala ke he taha e manatu hagaao ke he fakatokatokaaga ha Iehova.
2. Fakamalolo fefe e koe e tau tagata fakaako Tohi Tapu ke fakalataha ke he tau feleveiaaga he fakapotopotoaga?
2 Tau Feleveiaaga he Fakapotopotoaga: Ko e matapatu puhala ke maeke he tau tagata fakaako Tohi Tapu ke loto fakaaue ke he fakatokatokaaga he Atua ko e fakalataha mo tautolu ke he tau feleveiaaga he fakapotopotoaga. (1 Kori. 14:24, 25) Ko e mena ia, liga kamata fakamahani e koe a lautolu he fakamaama e tau feleveiaaga ne lima he tau fahi tapu takitaha, taha e feleveiaaga he magaaho. Talahau e mataulu he lauga ma e tau tagata he tapu ia. Fakakite ki a lautolu e tohi ka fakatutala ki ai he Fakaakoaga Kolo Toko mo e he Fakaakoaga Tohi he Fakapotopotoaga. Fakamaama e Aoga Fekafekau Fakateokarasi mo e Feleveiaaga Fekafekau. Ka fai kotofaaga a koe he aoga, liga maeke ia koe ke fakataitai mo lautolu. Tutala ke he tau manatu mitaki lahi ne talahau he tau feleveiaaga. Fakaaoga e tau ata he tau tohi ha tautolu ke lagomatai a lautolu ke fakatino e tau mena fa taute i ai. Mai he fakaakoaga fakamua, uiina a lautolu ke fakalataha.
3. Ko e heigoa e tau vala he fakatokatokaaga ka liga tutala a tautolu ki ai?
3 Magaaho ka tata mai e Fakamanatuaga, tau fonoaga, mo e ahiahi mai he leveki takaiaga, fakaaoga falu minuti gahoa ke atihake e fiafia ma e tau fakaholoaga nei. Tali fakahaga e tau huhu tuga e: Ko e ha a tautolu ne fakahigoa ko e Tau Fakamoli a Iehova? Ko e ha ne ui e tautolu e tau matakavi feleveiaaga ko e tau Fale he Kautu? Ko e heigoa e tau matagahua he tau motua mo e tau fekafekau lagomatai? Fakatokatoka fefe e gahua fakamatala mo e fonua? Talaga fefe e tau tohi ha tautolu? Fakatupe fefe e fakatokatokaaga? Ko e heigoa e gahua he la ofisa mo e Kau Fakatufono ke he levekiaga he gahua?
4, 5. Maeke fefe he tau vitio ha tautolu ke ati hake e loto fakaaue ma e fakatokatokaaga?
4 Tau Vitio ke Fakaako: Taha puhala foki ke kitia he tau tagata fakaako Tohi Tapu e fakatokatokaaga homo ue atu ha Iehova ko e tau vitio. Kua fakakite he vitio To the Ends of the Earth e gahua fakamatala ha tautolu he lalolagi katoa; kua fakakite he Our Whole Association of Brothers e fakamatakainaga ha tautolu he lalolagi katoa; mo e fakakite he United by Divine Teaching e kaufakalatahaaga ne moua he Tau Fakamoli a Iehova. Ko e fifine ne moua e tau mekasini ha tautolu mo e falu tohi foki ke he lima e tau ne hihina e tau mata ha ko e vitio Jehovah’s Witnesses—The Organization Behind the Name. Kua feaki e ia e falanaki ke he Tau Fakamoli ne fa ahiahi ki a ia, ka e oti e kitekite he vitio, ne logona hifo e ia kua maeke foki ia ia ke falanaki ke he fakatokatokaaga. Ne kamata e fakaakoaga mo ia, ti he fahi tapu hake, ne fano a ia ke he tau feleveiaaga he Fale he Kautu.
5 He fakaaoga falu minuti gahoa he tau fahi tapu takitaha mo e tau tagata fakaako mo e fakaaoga e tau koloa kua foaki mai, maeke ia tautolu ke takitaki e tau tagata fakaako Tohi Tapu ke he taha ni e fakatokatokaaga kua fakaaoga e Iehova he vaha nei.